ភ្នំពេញ ៖ នៅក្នុងឱកាសនៃព្រឹត្តិការណ៍ប្រកួតកីឡាអាស៊ីអាគ្នេយ៍ Sea Games លើកទី៣២ និងអាស៊ានប៉ារ៉ាហ្គេម លើកទី១២ ដែលកម្ពុជាធ្វើជាម្ចាស់ផ្ទះ បានជះឥទ្ធិពលចំពោះវិស័យសេដ្ឋកិច្ច មិនថាអាជីវកម្មខ្នាតធំ ខ្នាតតូច ឬមធ្យមនោះទេ។ ក្នុងនោះ អាជីវកម្មបោះពុម្ពអាវ និងទង់ផ្សេងៗកំពុងញាប់ដៃញាប់ជើងយ៉ាងមមាញឹកក្នុងការផលិត និងផ្គត់ផ្គង់សេវាកម្មទាក់ទងនឹងព្រឹត្តិការណ៍កីឡាជាប្រវត្តិសាស្ត្រមួយនេះ។

ជាក់ស្ដែង អ្នកស្រី ស៊ូ សោភា ជាម្ចាស់ហាង សោភា បោះពុម្ពអាវ និងលក់ទង់ជាតិគ្រប់ប្រភេទបានមានប្រសាសន៍ឱ្យដឹងថា ក្នុងកំឡុងពេលនៃការប្រារព្ធព្រឹត្តិការណ៍កីឡាអាស៊ីអាគ្នេយ៍ ឬគេហៅថា ស៊ីហ្គេមនេះ អាជីវកម្មបោះពុម្ពអាវ ក៏ដូចជាធ្វើទង់ផ្សេងៗមានការកើនឡើងគួរឱ្យកត់សម្គាល់។

អ្នកស្រីបញ្ជាក់ថា ៖

“វាជាឱកាសល្អសម្រាប់អ្នកប្រកបអាជីវកម្មខាងបោះពុម្ពអាវនេះ ដែលហាងយើងផ្ទាល់ក៏មានកំណើននៃការធ្វើទង់ស៊ីហ្គេមនេះប្រមាណ ៣០-៤០ភាគរយ ហើយការបោះពុម្ពអាវបានកើនឡើងប្រមាណជាង ២០ភាគរយដែរ។ សម្រាប់ហាងរបស់ខ្ញុំទទួលបានភាគច្រើនគឺការធ្វើទង់ចង់ និងទង់ដាក់លើតុជាដើម ដែលមានការកម្ម៉ង់ធ្វើជាបន្តបន្ទាប់។​ ចំណែកអាវ មានទទួលអ៊ុតឡូហ្កូ អ៊ុតទឹកថ្នាំខាងមុខ និងខាងក្រោយ ជាពិសេសលើប្រភេទអាវយឺត ក៏ដូចជាអ៊ុតលេខលើអាវកីឡា ប៉ុន្តែនៅមិនទាន់មានជំនាញខ្លាំងលើផ្នែកធ្វើអាវកីឡាខ្មែរដែលកំពុងពេញនិយមខ្លាំងនៅឡើយ។”

អ្នកស្រី សោភា បានបន្ថែមទៀតថា អតិថិជនដែលមកបោះពុម្ពអាវនេះភាគច្រើនជាអ្នកដែលពាក់ព័ន្ធគណៈកម្មការ ក៏ដូចជាអ្នកគាំទ្រកីឡាផងដែរ ដែលបងប្អូនខ្លះប្រមូលគ្នាមកបោះពុម្ពអាវពាក់ដើម្បីចូលរួមការប្រកួត។ ចំណែកប្រភេទអាវកីឡា ខាងហាងមួយនេះពុំទាន់មានជំនាញគ្រប់គ្រាន់នៅឡើយទេ ដោយសារវាជាឆ្នាំដំបូងផង និងជាព្រឹត្តិការណ៍កីឡាដំបូងផង ទើបត្រៀមខ្លួនពុំទាន់បានរៀបរយ។

គួរបញ្ជាក់ដែរថា អ្នកស្រី ស៊ូ សោភា បានចាប់ផ្ដើមអាជីវកម្មនេះជាយូរមកហើយដោយមានផ្ដល់នូវសេវាកម្មជាច្រើន ដូចជា បោះមុព្ព ព្រីន ប៉ាក់ អ៊ុត នៅលើអាវ ទង់ មួក និង​ធ្វើកន្លាស់អាវជាដើម ទាំងសម្រាប់ក្រុមហ៊ុន ស្ថាប័នអង្គការ គឺអាចធ្វើបានទាំងអស់។ ជាមួយគ្នានេះ អ្នកស្រីក៏បានបង្ហាញក្ដីរំពឹងផងដែរថា ប្រសិនបើមានព្រឹត្តិការណ៍ធំៗបន្តទៀត ហាងអ្នកស្រីនឹងមានការត្រៀមទុកឱ្យបានប្រសើរជាងនេះ ដោយមានការបោះពុម្ពអាវទុកជាមុនដើម្បីឱ្យត្រូវតាមតម្រូវការរបស់អតិថិជនចង់បាន ៕