បរទេស ៖ ពិភពលោកនៅពេលបច្ចុប្បន្ននេះកំពុងស្ថិតនៅក្នុងក្រសែភ្នែករបស់អ្នកតាមដានពាក់ព័ន្ធទៅនឹងស្ថានភាពនៃព្រឹត្តិការណ៍ជាច្រើន រាប់ចាប់តាំងតែពីបញ្ហាជម្លោះរវាងរុស្ស៊ីជាមួយអ៊ុយក្រែន បញ្ហាដែលកំពុងកើតមាននៅមជ្ឈឹមបូព៍ា ជាពិសេសគឺការបោះឆ្នោតរបស់អាមេរិកដែលនឹងប្រព្រឹត្តទៅនៅខែវិច្ឆិកាខាងមុខនេះ។

ក្នុងនាមជាប្រទេសមហាអំណាចសេដ្ឋកិច្ច ព្រមទាំងអាវុធផងដែរនោះ អាមេរិក ត្រូវបានគេជឿជាក់ថាពិតជាបានជះឥទ្ធិពលខ្លាំងបំផុតទៅលើគ្រប់បញ្ហាដែលកំពុងកើតឡើងនៅលើពិភពលោក។ ដូច្នេះ ចំពោះលទ្ធផលនៃការបោះឆ្នោតរបស់អាមេរិក វាប្រាកដណាស់ថានឹងអាចកំណត់ជោគវាសនារបស់ពិភពលោកទាំងមូលផងដែរ។ យ៉ាងណាក្តី យើងអាចសង្កេតឃើញថា ក្នុងនោះក៏មានកោះតៃវ៉ាន់ផងដែរ ដែលកំពុងទន្ទឹងរង់ចាំមើលលទ្ធផលនៃការបោះឆ្នោតរបស់អាមេរិកយ៉ាងអន្ទះសារ ដ្បិតថា កោះតៃវ៉ាន់ គឺមានទំនាក់ទំនងយ៉ាងជិតស្និទ្ធជាមួយនឹងរដ្ឋាភិបាលក្រុងវ៉ាស៊ិនតោនទៅលើស្ទើរគ្រប់បញ្ហាដែលខ្លួនព្រួយបារម្ភ ជាពិសេសជម្លោះជាមួយនឹងរដ្ឋាភិបាលក្រុងប៉េកាំងតែម្ដង។

មួយក្នុងចំណោមបញ្ហាចម្បងដែលកោះតៃវ៉ាន់តែងតែពឹងផ្អែកលើអាមេរិកនោះគឺជាការធានាសុវត្ថិភាពផ្នែកសន្តិសុខជាតិ។ ជាក់ស្ដែង អស់រយៈពេលជាច្រើនឆ្នាំចុងក្រោយមកនេះរដ្ឋាភិបាលក្រុងវ៉ាស៊ិនតោនបានបញ្ចេញអាវុធពីឃ្លាំងរបស់ខ្លួនលក់ទៅឲ្យកោះតៃវ៉ាន់ក្នុងទំហំដ៏ច្រើនដោយសង្ឃឹមថាដែនកោះមួយនេះអាចមានសមត្ថភាពក្នុងការការពារដែនដីរបស់ខ្លួនទល់ទៅនឹងក្រុងប៉េកាំង។

ថ្មីៗនេះ មានការស្ទាបស្ទង់គួរឲ្យព្រួយបារម្ភមួយចំពោះកោះតៃវ៉ាន់ដែលធ្វើឡើងដោយ The Brookings Institution ត្រូវបានរកឃើញថា មនុស្សពេញវ័យតែ ១ ភាគ ៤ ប៉ុណ្ណោះ នៃចំនួនអ្នកដែលបានឆ្លើយឆ្លងសរុប១៥០០នាក់នៅកោះតៃវ៉ាន់ដែលមានការជឿជាក់ត្រឹមតែ ៥៥ ភាគរយថា អាមេរិកអាចគាំទ្រ និងបញ្ជូនជំនួយយោធានៅពេលដែលមានសង្គ្រាមផ្ទុះឡើងជាមួយចិន។

បញ្ហាទី២ ដែលកោះតៃវ៉ាន់ជឿជាក់ថា វាគឺជារឿងដែលមិនអាចរំលងអាមេរិកបាននោះគឺជាផលិតផលបន្ទះឈីបរបស់ខ្លួនដែលកំពុងគ្រប់គ្រងទីផ្សារសកល។ នៅក្នុងឆ្នាំ២០២៤នេះ កោះតៃវ៉ាន់ រំពឹងទុកថានឹងអាចទាញចំណូលបានទៅដល់ ១៥០ពាន់លានដុល្លារពីការផលិតទាំងអស់របស់ខ្លួន។ ដូច្នេះ វាគឺជារឿងសំខាន់ប្រសិនបើប្រធានាធិបតីថ្មីណាម្នាក់នឹងនៅតែមានការគិតគូរអំពីការប្រកួតប្រជែងទីផ្សារបន្ទះឈីបជាមួយនឹងបណ្តាក្រុមហ៊ុនរបស់ចិន។ បែបនេះ កោះតៃវ៉ាន់ នឹងនៅតែជាដៃគូផ្គត់ផ្គង់ និងធ្វើពាណិជ្ជកម្មធំជាងគេរបស់អាមេរិក។

ដោយឡែក បញ្ហាកិច្ចការងារនយោបាយគឺជាមូលហេតុចុងក្រោយ និងសំខាន់ជាងគេបំផុតសម្រាប់កោះតៃវ៉ាន់ដែលចាំបាច់ត្រូវតែរង់ចាំមើលលទ្ធផលនៃការបោះឆ្នោតរបស់អាមេរិក។ កោះតៃវ៉ាន់ បានបង្ហាញក្តីសង្ឃឹមខ្លាំងអស់រយៈពេលជាច្រើនទសវត្សរ៍មកហើយនៅក្នុងដំណើរការនៃការស្វែងរកទំនាក់ទំនងផ្នែកកិច្ចការងារការទូត និងនយោបាយដែលក្នុងនោះមានអាមេរិកជាអ្នកជួយត្រួសត្រាយផ្លូវ។ គួរបញ្ជាក់ថា មានប្រទេសមិនច្រើនឡើយដែលហ៊ានធ្វើទំនាក់ទំនងផ្លូវទូតជាមួយនឹងដែនកោះនេះ លើកលែងតែអាមេរិកប៉ុណ្ណោះ។ ដូច្នេះ ការខិតខំប្រឹងប្រែងដើម្បីស្វែងរកសេរីភាព និងឯករាជ្យភាពពេញសិទ្ធិជាមុខជាមាត់ចេញពីការទាមទាររបស់មហាយក្សចិននោះគឺមិនអាចខ្វះបានឡើយនូវការយល់ចិត្តពីសំណាក់មេដឹកនាំសហរដ្ឋអាមេរិក៕