ថ្វីត្បិតតែជម្លោះដោយយោធារបស់អ៊ុយក្រែន និងរុស្ស៊ីគឺជាប្រធានបទដែលបានចាក់ផ្សាយជាច្រើនលើបណ្តាសារព័ត៌មានអន្តរជាតិនានាអស់រយៈពេលជាងមួយឆ្នាំមកហើយក្តីប៉ុន្តែវាមិនមែនជាជម្លោះដោយយោធាតែមួយនោះទេដែលបានកើតឡើង និងកំពុងបន្តកើតឡើងនាពេលបច្ចុប្បន្ននៅលើពិភពលោកយើងនេះ។

The Geneva Academy បានបង្ហាញនូវរបាយការណ៍ស្រាវជ្រាវអំពីបញ្ហាជម្លោះយោធាដែលកំពុងកើតឡើងនៅតាមតំបន់នានាចាប់រាប់ពីអាស៊ីទៅដល់អឺរ៉ុបដែលចំនួនទាំងអស់មានរហូតទៅដល់ជាង១០០ ដោយក្នុងនោះខ្លះត្រូវបានចាក់ផ្សាយ ខ្លះទៀតមិនត្រូវបានផ្សព្វផ្សាយ ហើយខ្លះទៀតជាជម្លោះដែលមានអាយុកាលជាង៥០ឆ្នាំមកហើយ។

ក្នុងពេលដែលជម្លោះដោយយោធាទាំងតូចទាំងធំគឺជាបញ្ហាខ្វាយខ្វល់មួយសម្រាប់ពិភពលោកនោះ បណ្តាក្រុមហ៊ុនអ្នកផលិតអាវុធជាច្រើនកំពុងសំងំកើបលុយរាប់សិបពាន់លានដុល្លារ ហើយអាមេរិកនៅតែជាអ្នកឈរនៅកំពូលតារាងជាប្រទេសដែលអាចទាញរកប្រាក់ចំណូលពីវិបត្តប្រភេទនេះ។

របាយការណ៍ស្រាវជ្រាវដោយវិទ្យាស្ថាន SIPRI កាលពីដើមសប្តាហ៍កន្លងមកនេះបង្ហាញថា ទំហំនៃការលក់អាវុធ និងសេវាកម្មយោធានៅទូទាំងពិភពលោកដោយក្រុមហ៊ុនធំៗចំនួន១០០មានប្រមាណជា៥៩៧ពាន់លានដុល្លារគិតកាលពីឆ្នាំ២០២២។

ក្នុងចំណោមក្រុមហ៊ុនទាំង១០០នោះ ក្រុមហ៊ុនអាមេរិកចំនួន៤២អាចសម្រេចបាននូវការលក់សព្វាវុធសរុបដល់ទៅ៥១ភាគរយនៃចំណែកទាំងអស់ដែលធ្វើឲ្យអាមេរិកនៅតែឈរនៅបញ្ជីកំពូលប្រទេសរកបានចំណូលខ្លាំងជាងគេពីឧស្សាហកម្មផលិតអាវុធក្នុងទំហំសរុបប្រមាណជា៣០២ពាន់លានដុល្លារ។ ដោយឡែកក្រុមហ៊ុនផលិតអាវុធរបស់ប្លុកអឺរ៉ុបចំនួន២៦ក្នុងបញ្ជីទាំង១០០នោះគឺអាចរកចំណូលបានប្រមាណជា១២១ពាន់លានដុល្លារប៉ុណ្ណោះស្ថិតនៅក្នុអត្រាកំណើនប្រមាណជា០,៩ភាគរយធៀបទៅនឹងឆ្នាំចាស់។

យ៉ាងណាក៏ដោយ ថ្វីត្បិតតែឈរនៅកំពូលតារាងក្តី ប៉ុន្តែទំហំលក់អាវុធឆ្នាំ២០២២របស់អាមេរិកស្ថិតនៅក្នុងអត្រាធ្លាក់ចុះប្រមាណជា៧,៩ភាគរយដែលបញ្ហាចំបងមិនមានដោយខ្វះតំរូវការនោះទេ ពោលគឺដោយសារតែបញ្ហាវិបត្តិកូវីដផង និងការបញ្ហាក្នុងការរៀបចំសង្វាក់ផលិតកម្មផង ជាពិសេសអាមេរិកបានជួបនឹងបញ្ហាខ្វះខាតធនធានមនុស្សក្នុងវិស័យយោធាមួយនេះ។

គួរឲ្យដឹងដែរថា ក្រុមហ៊ុន២ប៉ុណ្ណោះរបស់រុស្សីដែលស្ថិតនៅក្នុងបញ្ជីទាំង១០០នោះគឺ Rostec និង United Shipbuilding Corporation ដែលពួកគេអាចរកប្រាក់ចំណូលសរុបដល់ទៅ២០,៨ពាន់លានដុល្លារកាលពីក្នុងឆ្នាំ២០២២៕