សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សម្រាប់វិធីសាស្ត្រក្នុងការកម្ចាត់សត្វល្អិតចង្រៃ ប្រជាកសិករអាចមានជម្រើសច្រើនដូចជាការប្រើប្រាស់ថ្នាំគីមី និងថ្នាំបែបធម្មជាតិ ដែលគេអាចលាយដោយខ្លួនឯងបាន។ សម្រាប់ការផលិតថ្នាំបែបធម្មជាតិ គេអាចប្រើវត្ថុធាតុដើមដែលជាគ្រឿងផ្សំងាយរក នៅជុំវិញផ្ទះ និងមិនប៉ះពាល់ដល់សុខភាព ជាពិសេសគឺចំណេញថវិកាពីការទិញថ្នាំគីមីនៅតាមផ្សារទៀតផង។
ចំពោះវិធីសាស្ត្រក្នុងការផលិតថ្នាំពុលធម្មជាតិ សម្រាប់កម្ចាត់ពពួកសត្វចង្រៃដែលស៊ីដំណាំ ដូចជា ប្រភេទ ចៃ ដង្កូវ និងឌ្រីប ជាដើម គឺត្រូវយកវត្ថុធាតុដើមរួមមាន គល់ស្លឹកគ្រៃ ស្លឹកក្រូចសើច ថ្នាំជក់ ខ្ទឹមស ម្ទេស ស្កររងូ បណ្ដូលពេជ្រ ខ្ញី រមៀត ស្លឹកល្ហុង ដែលគេអាចប្រើក្នុងបរិមាណ ១ខាំគ្រប់មុខ និងស្កររងូកន្លះកូនចាន។ យកស្កររងូកូរលាយជាមួយទឹក ៥-៧លីត្រ ឯវត្ថុធាតុដើមផ្សេងទៀតយកទៅចិញ្ច្រាំ បុក ឬកិនដោយប្រើមាស៊ីនក៏បាន ឱ្យតែម៉ដ្ឋល្អ ងាយស្រួលលាយបញ្ជូលគ្នា និងឆាប់ចេញជាតិជ័រ។
យកវត្ថុធាតុដើមដែលចិញ្ច្រាំហើយខ្ចប់ក្នុងកំណាត់ ឬសំណាញ់ស្អាតដែលអាចជ្រាបទឹកបាន រុំឱ្យជិត ដាក់រម្ងាស់ក្នុងឆ្នាំងដែលមានទឹកលាយជាមួយស្កររងូខាងលើ។ យកល្បាយក្នុងឆ្នាំទៅដាក់រម្ងាស់ ២-៣ម៉ោង ទុកឱ្យត្រជាក់ ស្រង់យកកាកចេញ ហើយអាចយកទឹកថ្នាំនេះទៅច្រកដបទុកសម្រាប់ប្រើប្រាស់។
សម្រាប់ការប្រើប្រាស់ គេអាចយកថ្នាំពុលនេះ ២ស្លាបព្រាបាយ លាយជាយមួយទឹក ២-៣លីត្របាញ់ទៅលើដំណាំយកស្លឹកចន្លោះពេល ៣-៥ថ្ងៃម្ដង។ ដោយឡែក កសិករក៏ត្រូវមានចំណេះដឹងក្នុងការប្រើប្រាស់ថ្នាំពុល ចៀសវាងប្រើដដែលៗច្រើនដងធ្វើឱ្យដំណាំស៊ាំនឹងថ្នាំ កសិករគួរឆ្លាស់ប្រើប្រាស់ជាមួយថ្នាំពុលធម្មជាតិដទៃទៀត។
ប្រសិទ្ធភាពនៃថ្នាំពុលធម្មជាតិនេះ មិនអាចឱ្យសត្វល្អិតងាប់ភ្លាមៗទេ ពោលគឺវាត្រូវការពេលវេលា នៅពេលដែលមានសត្វល្អិតច្រើនអាចបាញ់ ៣ ថ្ងៃជាប់គ្នាក៏បាន ប៉ុន្តែប្រសិនបើដំណាំមិនមានសត្វល្អិតស៊ី កសិករក៏អាចបាញ់ការពារ ឬបាញ់បណ្ដេញសត្វចង្រៃទាំងនោះមុនផងដែរ។ ចំពោះថ្នាំពុលនេះ គេអាចរក្សាទុកបានរយៈពេលប្រមាណ ៦ខែ ដោយឧស្សាហ៍មួលគម្របបើកនៅពេលមានហ្គាស ហើយការរក្សាទុកត្រូវទុកដាក់ឱ្យផុតពីដៃក្មេង ចៀសវាងមានបញ្ហាទោះបីវាជាថ្នាំពុលធម្មជាតិ តែវាក៏មានសារជាតិដែលអាចបង្កគ្រោះថ្នាក់បាន៕
Account
Security
Favourite Content