សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សេដ្ឋកិច្ចកម្ពុជាត្រូវបានព្យាករណ៍ថា នឹងកើនឡើងក្នុងរង្វង់ ៥.៣% កាលពីឆ្នាំ២០២៣ ហើយនឹងបន្តកើនឡើងក្នុងអត្រារង្វង់ ៦.០% នៅឆ្នាំ២០២៤ ដោយសារការងើបឡើងវិញនៃវិស័យទេសចរណ៍ និងកំណើនការនាំចេញនៃវិស័យមិនមែនកាត់ដេរ។ នេះបើយោងតាមរបាយការណ៍របស់មូលនិធិរូបិយវត្ថុអន្តរជាតិ (IMF) ដែលចេញផ្សាយកាលពីដំណាច់ខែមករា ឆ្នាំ២០២៤។
ទោះយ៉ាងណាក៏ដោយ ហានិភ័យចំពោះសេដ្ឋកិច្ចកម្ពុជានៅតែមាន។ IMF បានកត់សម្គាល់ថា ហានិភ័យដែលពិភពលោកអាចប្រឈម មានដូចជា ភាពមិនប្រាកដប្រជានៃសេដ្ឋកិច្ចពិភពលោក ភាពមិនអំណោយផលនៃភូមិសាស្ត្រនយោបាយ ការបន្តរឹតបន្តឹងគោលនយោបាយរូបិយវត្ថុ ការបែកខ្ញែកពាណិជ្ជកម្មនិងសេដ្ឋកិច្ច វិបត្តិសង្រ្គាមរុស្ស៊ី និងអ៊ុយក្រែន និងកំណើនសេដ្ឋកិច្ចយឺតនៃប្រទេសអភិវឌ្ឍន៍ជាដើម។ កត្តាទាំងនេះអាចជះឥទ្ធិពលអវិជ្ជមានលើសេដ្ឋកិច្ចកម្ពុជាផងដែរ។
ជារួម ទោះបីជាសេដ្ឋកិច្ចសកលហ៊ុមព័ទ្ធដោយហានិភ័យ និងភាពមិនប្រាកដប្រជាក្តី សេដ្ឋកិច្ចកម្ពុជា បន្តរក្សាបានកំណើនល្អប្រសើរបើធៀបនឹងបណ្តាប្រទេសមួយចំនួនក្នុងតំបន់ ដោយសារការវិលត្រឡប់ទៅរកប្រក្រតីយ៉ាងឆាប់រហ័សនៃសកម្មភាពសង្គម-សេដ្ឋកិច្ច តាមរយៈការចេញវិធានការអន្តរាគមន៍របស់រាជរដ្ឋាភិបាល សំដៅបន្ធូរបន្ថយផលប៉ះពាល់នានាមកសង្គម-សេដ្ឋកិច្ច ព្រមជាមួយនឹងការរំពឹងទុកការងើបឡើងនៃប្រទេសដៃគូពាណិជ្ជកម្មកម្ពុជា។
លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានថ្លែងកាលពីថ្មីៗនេះថា សេដ្ឋកិច្ចកម្ពុជាត្រូវបានព្យាករដោយសុទិដ្ឋិនិយមថានឹងកើនឡើងក្នុងអត្រាវិជ្ជមានល្អប្រសើរ នៅឆ្នាំ២០២៤ ដែលរួមចំណែកជាចម្បងដោយការបន្តកើនឡើងនៃវិស័យសេវាកម្ម ជាពិសេស វិស័យទេសចរណ៍ និងការងើបឡើងនៃវិស័យកម្មន្តសាល ស្របពេលដែលវិស័យកសិកម្ម សំណង់ និងអចលនទ្រព្យបន្តទទួលបានកំណើនទាប។
លោកជំទាវបណ្ឌិត បានថ្លែងបន្តថា ដើម្បីគាំទ្រគោលនយោបាយរបស់រាជរដ្ឋាភិបាល ក្នុងការពង្រឹងសន្ទុះកំណើន និងរក្សាស្ថិរភាពម៉ាក្រូសេដ្ឋកិច្ច ធនាគារជាតិនៃកម្ពុជានឹងបន្តអនុវត្តនយោបាយរូបិយវត្ថុប្រកបដោយភាពប្រុងប្រយ័ត្ន ពង្រឹងការអភិវឌ្ឍប្រព័ន្ធធនាគារ លើកកម្ពស់ប្រសិទ្ធភាព សុវត្ថិភាព និងសមាហរណកម្មនៃប្រព័ន្ធទូទាត់ ព្រមទាំងត្រៀមខ្លួនដាក់ចេញនូវនយោបាយ និងវិធានការគាំទ្រចាំបាច់នានា ប្រកបដោយភាពបុរេសកម្ម ស្របតាមស្ថានភាពសេដ្ឋកិច្ច និងគោលនយោបាយរបស់រាជរដ្ឋាភិបាល។
ទាក់ទងនឹងកំណើនសេដ្ឋកិច្ចនេះ របាយការណ៍ស្តីពីសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៤ របស់ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា សម្រាប់ឆ្នាំ ២០២៤ សេដ្ឋកិច្ចកម្ពុជានឹងបន្តនិន្នាការកើនឡើង ដោយរំពឹងថានឹងសម្រេចបានកំណើនក្នុងរង្វង់ ៦,៦% ដែលធ្វើឱ្យផលិតផលសរុបក្នុងស្រុក (ផ.ស.ស.) ថ្លៃបច្ចុប្បន្នស្ថិតក្នុងរង្វង់ ១៤២ ៩៥៧ ប៊ីលានរៀ, សមមូលនឹងប្រមាណ ៣៥ ១៦៨ លានដុល្លារអាម៉េរិក, ស្របពេលដែល ផ.ស.ស. សម្រាប់មនុស្សម្នាក់ ត្រូវបានរំពឹងថានឹងកើនឡើង ដល់ ២ ០៧១ ដុល្លារអាម៉េរិក បើធៀបនឹងប្រមាណ ១ ៩១៧ ដុល្លារអាម៉េរិក ក្នុងឆ្នាំ ២០២៣។
ការរំពឹងទុកនូវកំណើន ៦,៦% ក្នុងឆ្នាំ ២០២៤ នេះ ត្រូវបានគាំទ្រដោយវិស័យសេដ្ឋកិច្ចសំខាន់ៗ ដូចជា ៖ ទី១)-វិស័យឧស្សាហកម្មត្រូវបានព្យាករថានឹងបន្តនិន្នាការកើនឡើង ក្នុងរង្វង់ ៨,៥% ទី២)-វិស័យសេវាកម្ម ត្រូវបានព្យាករថានឹងបន្តនិន្នាការល្អ ក្នុងអត្រាកំណើន ៦,៩% ទី៣)-វិស័យកសិកម្មរំពឹងថានឹងបន្តសម្រេចបានកំណើនល្អ ក្នុងរង្វង់ ១,១% និងកំណើននៃវិស័យសំខាន់ៗផ្សេងៗទៀតជាដើម៕
Account
Security
Favourite Content