ភ្នំពេញ ៖ ក្នុងគោលដៅផ្តល់ភាពងាយស្រួល និងទាក់ទាញអ្នកទេសចរមកទស្សនាកម្ពុជាឱ្យបានកាន់តែច្រើន ធនាគារជាតិនៃកម្ពុជា បានបង្កើត និងដាក់ឱ្យប្រើប្រាស់នូវកម្មវិធីទូទាត់បាគងទេសចរ ដោយមានកិច្ចសហការជាមួយនឹងវិស័យឯកជនដែលពាក់ព័ន្ធ។ ជាក់ស្ដែង នៅព្រឹកថ្ងៃទី២២ ខែមករា ឆ្នាំ២០២៥នេះ ធនាគារជាតិនៃកម្ពុជា បានដាក់ឱ្យដំណើរការកម្មវិធីទូទាត់បាគងទេសចរ (Bakong Tourists App with VISA) ជាមួយក្រុមហ៊ុនបណ្ដាញប័ណ្ណទូទាត់អន្តរជាតិវីសា Visa ជាផ្លូវការ។

លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជាបានអញ្ជើញជាអធិបតី ក្នុងពិធីដាក់ឱ្យដំណើរការកម្មវិធីទូទាត់បាគងទេសចរ (Bakong Tourists App with VISA) ជាមួយក្រុមហ៊ុនបណ្ដាញប័ណ្ណទូទាត់អន្តរជាតិវីសា Visa នាព្រឹកថ្ងៃទី២២ ខែមករា ឆ្នាំ២០២៥ និងមានការចូលរួមពីតំណាងក្រសួង-ស្ថាប័នរាជរដ្ឋាភិបាល ក្រុមហ៊ុនបណ្តាញទូទាត់អន្តរជាតិ និងវិស័យឯកជនសរុបប្រមាណ ៣០០នាក់។

តាមរយៈដំណើរការកម្មវិធីនេះ ទេសចរអន្តរជាតិដែលធ្វើដំណើរកម្សាន្តនៅកម្ពុជា អាចធ្វើប្រតិបត្តិការទូទាត់បែបឌីជីថលបានយ៉ាងងាយស្រួល ដោយគ្រាន់តែទាញយក(Download)កម្មវិធីទូទាត់បាគងទេសចរ ដាក់ក្នុងទូរសព្ទដៃរខ្លួន ដើម្បីចុះឈ្មោះប្រើប្រាស់ ហើយភ្ជាប់ជាមួយប័ណ្ណទូទាត់វីសាដែលមានស្រាប់ពីប្រទេសដើមរបស់ខ្លួន។ បន្ទាប់ពីតភ្ជាប់រួចរាល់អ្នកប្រើប្រាស់អាចផ្ទេរប្រាក់ចូលក្នុងគណនីបាគង ហើយធ្វើប្រតិបត្តិការទូទាត់តាមខេអេច​ឃ្យូអរកូត ជាមួយអាជីវករប្រមាណ ៤,៥ លានកន្លែងនៅទូទាំងប្រទេសកម្ពុជា។

ការពិតទៅ កម្ពុជាបានដាក់ឱ្យដំណើរការកម្មវិធីបាគងទេសចរ Bakong Tourists App តាំងពីខែសីហា ឆ្នំា២០២៤ ស្របតាមគោលនយោបាយរបស់រាជរដ្ឋាភិបាល ក្នុងគោលដៅបញ្ចូលរួមគ្នារវាងសេដ្ឋកិច្ចឌីជីថល និងសង្គម ផ្តល់ជូនភ្ញៀវទេសចរជាតិ-អន្តរជាតិនូវកម្មវិធីសុវត្ថិភាព មានប្រសិទ្ធភាព និងភាពងាយស្រួល ដោយមិនចាំបាច់ដូរលុយដូចកាលពីមុនទៀតនោះឡើយ។ ដោយឡែក ការដាក់ឱ្យដំណើរការកម្មវិធី “BAKONG Tourists App with VISA” ក៏ជាគោលដៅក្នុងគោលបំណងដាក់រួមបញ្ចូលគ្នារវាងសេដ្ឋកិច្ចឌីជីថល និងសង្គម ដែលជាការពង្រឹងជំហររបស់កម្ពុជាជាប្រទេសគិតឆ្ពោះទៅមុខ តាមរយៈការផ្តល់ដល់ភ្ញៀវទេសចរអន្តរជាតិនូវកម្មវិធីសុវត្ថិភាព និងប្រសិទ្ធភាព។

នៅក្នុងឱកាសនោះ លោកជំទាវបណ្ឌិត ជា សិរី ក៏បានថ្លែងអំណរគុណចំពោះក្រុមការងារ និងភាគីពាក់ព័ន្ធចំពោះការខិតខំប្រឹងប្រែងមិនចេះនឿយហត់ក្នុងការធ្វើឱ្យគម្រោងនេះក្លាយជាការពិត។ លោកជំទាវក៏បានលើកទឹកចិត្តដល់ធនាគារ គ្រឹះស្ថានហិរញ្ញវត្ថុ និងអាជីវកម្មទាំងអស់ចូលរួមគាំទ្រ និងផ្សព្វផ្សាយកម្មវិធីយ៉ាងសកម្ម។ តាមរយៈការធ្វើការរួមគ្នាអាចធានាបាននូវការទទួលយកយ៉ាងទូលំទូលាយ និងផ្តល់អត្ថប្រយោជន៍ជាអតិបរមាសម្រាប់ភ្ញៀវទេសចរអន្តរជាតិ និងសេដ្ឋកិច្ចក្នុងស្រុក៕ អត្ថបទ ៖ វិន ឈុនហ៊ាត