សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពង់ចាម ៖ ស្ទឹងត្រង់ ជាស្រុកមួយនៃខេត្តកំពង់ចាម ស្ថិតនៅជាប់នឹងទន្លេមេគង្គ និងមានអំណោយផលខាងវិស័យកសិកម្ម ជាពិសេសលើដំណាំហូបផ្លែ និងដំណាំកសិ-ឧស្សាហកម្ម ។ តាមរយៈសក្ដានុពលនៃវិស័យកសិកម្ម និងកសិ-ឧស្សាហកម្មនៅក្នុងស្រុកស្ទឹងត្រង់ បានធ្វើឱ្យតំបន់មួយនេះអាចបង្កើតការងារជូនពលរដ្ឋរហូតដល់រាប់ម៉ឺននាក់ ។
លោក បាន ស្រេង អភិបាលស្រុកស្ទឹងត្រង់ ខេត្តកំពង់ចាម បានមានប្រសាសន៍ថា នៅក្នុងស្រុកស្ទឹងត្រង់ ខេត្តកំពង់ចាមនេះ ជាស្រុកមួយមានប្រជាពលរដ្ឋច្រើន ដោយនៅទូទាំងស្រុកមានពលរដ្ឋសរុបប្រមាណជាង១៣ម៉ឺននាក់ ហើយគ្រាន់តែផ្ទៃដីដាំដំណាំហូបផ្លែនៅទូទាំងស្រុកមានរហូតដល់ជាង ៥ម៉ឺនហិកតា ។
លោកបន្តថា ដំណាំដែលមានសក្ដានុពលសម្រាប់ការដាំដុះ និងផ្គត់ផ្គង់ទៅលើទីផ្សារក្នុងប្រទេស រួមមាន ចេកអំបូងលឿង ផ្លូវទុរេន ផ្លែសាម៉ាវ ចន្ទី មង្ឃុត ម្នាស់ និងដំណាំរួមផ្សំជាច្រើនទៀត ។ សម្រាប់ដំណាំ ដែលប្រជាពលរដ្ឋក៏ដូចជាក្រុមហ៊ុនវិនិយោគពេញនិយម និងបានដាំដុះច្រើន គឺទុរេន និងចេកអំបូងលឿង ពីព្រោះថាទឹកដីនៅក្នុងស្រុកស្ទឹងត្រង់មានជីវជាតិ និងអំណោយផលទៅលើដំណាំទាំងនោះ ។ ម្យ៉ាងទៀតដំណាំទាំងពីរនេះក៏កំពុងមានទីផ្សារខ្លាំងនៅក្រៅប្រទេស ជាពិសេសប្រទេសចិនដែលជាប្រទេសមួយមានទីផ្សារធំទូលាយ។ បន្ថែមពីលើនេះ តាមរយៈសក្ដានុពលនៃដំណាំទាំងនេះ បានបង្កើតការងារជូនពលរដ្ឋជាច្រើនសម្រាប់បង្កើតប្រាក់ចំណូល ហើយអ្វីដែលពិសេស ប្រជាពលរដ្ឋនៅក្នុងស្រុកមិនចាំបាច់ធ្វើចំណាកស្រុកទៅធ្វើការនៅស្រុកក្រៅ ឆ្ងាយពីផ្ទះ ឆ្ងាយពីស្រុកកំណើត និងរស់នៅបែកគ្រួសារនោះទេ ។
ក្នុងឱកាសជាមួយគ្នានេះ លោកក៏បានអំពាវនាវដល់ពលករខ្មែរដែលកំពុងធ្វើការនៅប្រទេសថៃ ហើយមានបំណងត្រលប់មកប្រទេសកំណើតវិញអាចមកស្វែងរកការងារនៅក្នុងស្រុកស្ទឹងត្រង់ នៅក្នុងចម្ការចេក ចម្ការទុរេន និងចម្ការកៅស៊ូជាដើម ពីព្រោះនៅក្នុងស្រុកនេះក៏មានរោងចក្រកែច្នៃ វេចខ្ចប់ ចេក និងកែច្នៃកៅស៊ូក្រេប ក៏ដូចជារោងចក្រផលិតជីសរីរាង្គ និងរោងចក្រផលិតក្រដាសផងដែរ ។ ពលករទាំងអស់អាចមកធ្វើការទំនាក់ទំនងមន្ទីរការងារ និងបណ្ដុះបណ្ដាលវិជ្ជាជីវៈខេត្តកំពង់ចាម ដើម្បីសួរនាំព័ត៌មានការងារ ។
បើតាមអ្នកស្រី ហេង ដាវី ប្រធានក្រុមហ៊ុន ឡុងស្រេង ចម្ការចេក នៅក្នុងស្រុកស្ទឹងត្រង់ បានឱ្យដឹងថា បច្ចុប្បន្ននេះ ចម្ការចេករបស់ក្រុមហ៊ុនមានផ្ទៃដីដាំដុះប្រមាណ២០០ហិកតា ហើយនៅពេលខាងមុខនេះ ក្រុមហ៊ុនគ្រោងនឹងពង្រីកផ្ទៃដីដាំដុះរហូតដល់ ៥០០ហិកតាទៀត ដូច្នេះ តម្រូវការកម្មករសម្រាប់ធ្វើការទាំងក្នុងចម្ការចេក និងក្នុងរោងចក្រវេចខ្ចប់នឹងមានកំណើនខ្ពស់សម្រាប់បំពេញការងារ ។
អ្នកស្រីបន្តថា សម្រាប់បច្ចុប្បន្ន នៅក្នុងក្រុមហ៊ុនទាំងមូលមានកម្មករ បុគ្គលិកកំពុងធ្វើការប្រមាណ ៦០០០នាក់ ហើយដោយសារតែក្រុមហ៊ុនមានផែនការពង្រីកជាបន្តបន្ទាប់ ប្រាកដណាស់ នឹងមានតម្រូវការកម្លាំងពលកម្មសម្រាប់បំពេញការងារ ។
អ្នកស្រី ហេង ដាវី បានបញ្ជាក់ថា នៅក្នុងក្រុមហ៊ុន កម្មករទាំងអស់ មានផ្ដល់ជូនកន្លែងស្នាក់នៅ ហើយនៅរៀងរាល់ខែ ក្រុមហ៊ុនក៏មានផ្ដល់ជាអង្ករ និងស្បៀងផ្សេងៗទៀតសម្រាប់ឧបត្ថម្ភដល់កម្មករ ដើម្បីចូលរួមកាត់បន្ថយការចំណាយរបស់កម្មករបានមួយចំណែកផងដែរ ៕
Account
Security
Favourite Content