ភ្នំពេញ ៖ យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា​បានឱ្យដឹងថា ទំហំនៃការនាំចេញទំនិញរបស់​កម្ពុជាក្នុងឆ្នាំ២០២៣ ទៅកាន់ប្រទេសជាសមាជិកនៃកិច្ចព្រមព្រៀងភាពជាដៃ​គូយុទ្ធសាស្ត្រ​សេដ្ឋកិច្ច​គ្រប់ជ្រុងជ្រោយក្នុងតំបន់ (RCEP) មានសម្ទុះងើបលឿនបើធៀបនឹងឆ្នាំ២០២២។ យ៉ាងណាមិញ កិច្ចព្រមព្រៀង RCEP បានចូលរួមចំណែក ៦១ភាគរយនៃទំហំពាណិជ្ជកម្មសរុប​របស់កម្ពុជាក្នុងឆ្នាំ២០២៣ ដែលគិតជាប្រាក់មានជាង ៤៨ពាន់លានដុល្លារ។ 

ទាក់ទិននឹងចំណុចនេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា និងជាអ្នក​ជំនាញសេដ្ឋកិច្ចបានកត់​សម្គាល់ឃើញថា ចាប់តាំងពីអនុវត្តកិច្ចព្រមព្រៀង RCEP នេះមក សេដ្ឋកិច្ចកម្ពុជាជារួមមានភាពល្អប្រសើរច្រើន។

អ្នកឧកញ៉ាបន្តគូសបញ្ជាក់ថា ក្រៅពីកិច្ចព្រមព្រៀងសេរីទ្វេរភាគីជាមួយចិន កូរ៉េ និងអេមីរ៉ាត់អារ៉ាប់រួមទៅ យើងក៏ចង់មានកិច្ចព្រមព្រៀងផ្សេងៗទៀតដែរ ដើម្បីទាក់ទាញវិនិយោគិនមកឱ្យកាន់តែច្រើន។

យ៉ាងណាមិញ ដើម្បីអាចទាញប្រយោជន៍ពីកិច្ចព្រមព្រៀង RCEP តាមរយៈការបង្កើនទំហំនាំចេញនៅឆ្នាំ២០២៤នេះ អ្នកឧកញ៉ាបានលើកឡើងថា៖

«កម្ពុជាយើងគួរតែធ្វើម៉េចថែទាំអ្នកវិនិយោគក្នុង​ស្រុក​យើងដើម្បីកុំឱ្យបង្កការរំខានដល់ពួកគេ និងសម្រួលបែបបទបន្ថែម ពោលគឺធ្វើយ៉ាងណាសម្រួល​ដល់អ្នកវិនិយោគនៅក្នុងប្រទេសយើង ដើម្បីឱ្យពួកគាត់អាច​ពង្រីកខ្លួនបន្ថែមទៀត។»

ទោះជាយ៉ាងណា កន្លងមក រាជរដ្ឋាភិបាលកម្ពុជាបានប្រឹងប្រែងក្នុងការសម្រុះសម្រួល ដើម្បីស្វែងរកលក្ខខណ្ឌកាន់តែប្រសើរសម្រាប់វិនិយោគិន ក៏ដូចជាព្យាយាមរកអ្នកវិនិយោគមកបណ្ដាក់ទុនបន្ថែម ទៀត។

ជាក់ស្ដែង ជានិច្ចជាកាល សម្ដេចនាយករដ្ឋមន្ត្រីបានធ្វើដំណើរទស្សនៈកិច្ចទៅកាន់ប្រទេសដៃគូកិច្ចព្រមព្រៀងពាណិជ្ជកម្មនានា ដើម្បីពង្រឹងចំណងមិត្តភាពបន្ថែម ក៏ដូចជាបង្កើនការវិនិយោគឱ្យកាន់តែច្រើនថែមទៀត។ នេះបើតាមការបញ្ជាក់បន្ថែមរបស់អ្នកឧកញ៉ា លឹម ហេង។

គួរឱ្យដឹងដែរថា កិច្ចព្រមព្រៀងភាពជាដៃគូយុទ្ធសាស្ត្រសេដ្ឋកិច្ចគ្រប់ជ្រុងជ្រោយក្នុងតំបន់កំពុងដើរ​តួយ៉ាងសំខាន់ក្នុងការលើកកម្ពស់សមាហរណកម្មសេដ្ឋកិច្ចក្នុងតំបន់ ដើម្បីជំរុញកំណើនសេដ្ឋកិច្ច និងពាណិជ្ជកម្មប្រទេសជាសមាជិក។ កិច្ចព្រមព្រៀងនេះក៏អនុញ្ញាតឱ្យប្រទេសជាសមាជិក​ទទួល​បានផលប្រយោជន៍ពីឱកាសអភិវឌ្ឍន៍របស់ប្រទេសចិនដែរ។

ដោយឡែក បច្ចុប្បន្ននេះ កិច្ចព្រមព្រៀង RCEP មានសមាជិកចំនួន១៥ប្រទេសស្ថិតក្នុងតំបន់​អាស៊ីប៉ាស៊ីហ្វិក ក្នុងនោះ ១០ប្រទេសជាសមាជិកអាស៊ាន និង៥ប្រទេសទៀតជាប្រទេស​មានទីផ្សារធំដូចជា ចិន ជប៉ុន កូរ៉េ អូស្រា្តលី និងនូវែលសេឡង់។

តាមរយៈកិច្ចព្រមព្រៀងពាណិជ្ជកម្មនេះ បច្ចុប្បន្នមុខទំនិញជាង៩០ភាគរយរបស់កម្ពុជា រួមនឹងប្រទេសជាដៃគូដទៃទៀត មិនតម្រូវឱ្យ​បង់ពន្ធនាំចេញ-នាំចូលទេ៕