សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតចាប់ពីខែមករា ដល់ដំណាច់ខែវិច្ឆិកា ឆ្នាំ២០២៤ វិនិយោគិនវៀតណាមបានបោះទុនវិនិយោគលើវិស័យនានាក្នុងប្រទេសកម្ពុជាក្នុងទំហំទឹកប្រាក់សរុបចំនួន ៥៥៧លានដុល្លារអាមេរិក និងបានឈរលើលំដាប់ទី៣ជាវិនិយោគិនដែលបោះទុនវិនិយោគនៅកម្ពុជាច្រើនជាងគេ។ នេះបើតាមឯកឧត្តម ជា វុទ្ធី អគ្គលេខាធិការនៃគម្មាធិការវិនិយោគក្រុមប្រឹក្សាអភិវឌ្ឍន៍កម្ពុជាថ្លែងកាលពីថ្ងៃដើមសប្ដាហ៍នេះ ។
ឯកឧត្តម ជា វុទ្ធី បានគូសបញ្ជាក់ពីបរិយាកាសវិនិយោគប្រកបដោយភាពអំណោយផល, ឧត្តមភាពប្រៀបធៀបរបស់កម្ពុជា រួមទាំងធនធានធម្មជាតិដ៏សម្បូរបែប, កម្លាំងពលកម្មវ័យក្មេងដែលមានជំនាញក្នុងវិស័យឧស្សាហកម្ម និងផលិតកម្ម ជាពិសេស តម្លៃពលកម្មដែលមានភាពប្រកួតប្រជែងខ្ពស់ និងការបន្តកសាងហេដ្ឋារចនាសម្ព័ន្ធសម្រាប់សម្រួលដល់ការដឹកជញ្ជូន ដែលកត្តាទាំងនេះបានធ្វើឱ្យកម្ពុជាក្លាយជាគោលដៅដ៏ទាក់ទាញសម្រាប់ការបណ្តាក់ទុនវិនិយោគ ។
ឯកឧត្តម ក៏បានអបអរសាទរនូវគម្រោងវិនិយោគរបស់វៀតណាមមួយទៀត ដែលបានដាក់ដំណើរការជាផ្លូវការនៅក្នុងប្រទេសកម្ពុជា គឺរោងចក្រកែច្នៃឈើដាំក្នុងស្រុក ដូចជាដើមអាកាសស្យា និងដើមប្រេងខ្យល់ដែលមានទីតាំងនៅក្នុងខេត្តព្រះសីហនុ ។ ក្រុមហ៊ុននេះអាចនឹងមានលទ្ធភាពពង្រីកការវិនិយោគបន្ថែមទៀតជាបន្តបន្ទាប់នាពេលដ៏ខ្លីខាងមុខ ជាពិសេសការវិនិយោគលើដំណាំឈើដាំក្នុងស្រុក ដែលមិនត្រឹមតែបានផ្គត់ផ្គង់តម្រូវការផលិតកម្មរបស់ក្រុមហ៊ុននាពេលខាងមុខប៉ុណ្ណោះទេ តែអាចយកទៅកែច្នៃធ្វើជាគ្រឿងសង្ហារឹម ខណៈកំទេចកំទីសំណល់ឈើក៏អាចយកទៅប្រើប្រាស់ជាថាមពលកកើតឡើងវិញ ហើយដំណាំឈើដាំនេះក៏អាចទទួលបានអត្ថប្រយោជន៍ពីឥណទានកាបូនផងដែរ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាចេញផ្សាយនៅព្រឹកថ្ងៃទី ៦ ខែធ្នូ ឆ្នាំ ២០២៤នេះ បានបង្ហាញថា វៀតណាមជាវិនិយោគិនដែលបានបោះទុនវិនិយោគច្រើនជាងគេក្នុងខែវិច្ឆិកា ឆ្នាំ ២០២៤ ដោយក្នុងចំណោមទុនវិនិយោគសរុបចំនួន ៩៤០លានដុល្លារអាមេរិក ប្រភពទុនពីប្រទេសវៀតណាមមានរហូតដល់៥១,០៨ភាគរយ ប្រភពទុនវិនិយោគមកពីប្រទេសចិន មាន២៤,២៦ភាគរយនិងប្រភពទុនក្នុងស្រុកមានប្រមាណ១៤,៤៩ភាគរយ ។
យោងតាមរបាយការណ៍របស់ស្ថានទូតវៀតណាមប្រចាំប្រទេសកម្ពុជាក៏បានបង្ហាញផងដែរថា គម្រោងវិនិយោគវៀតណាមនៅកម្ពុជា គិតមកដល់បច្ចុប្បន្ននេះ មានចំនួន២០៨គម្រោង ជាមួយនឹងដើមទុនចុះបញ្ជីសរុប ២,៩១ពាន់លានដុល្លារ ខណៈការវិនិយោគរបស់វៀតណាមនៅកម្ពុជាភាគច្រើន គឺផ្តោតលើវិស័យកសិកម្ម ហិរញ្ញវត្ថុ ធនាគារ ធានារ៉ាប់រង និងទូរគមនាគមន៍ ៕
Account
Security
Favourite Content