សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រហូតមកដល់ដើមខែមិថុនា ឆ្នាំ២០២៥ នេះ គម្រោងសាងសង់អាកាសយានដ្ឋានអន្តរជាតិតេជោ បានសម្រេចជិតទាំងស្រុងហើយ ដោយបានប្រមាណ៩៩ភាគរយ និងត្រៀមខ្លួនក្នុងការបើកប្រតិបត្តិការនៅអំឡុងខែកញ្ញា ឆ្នាំ២០២៥ ខាងមុខនេះ តាមការកំណត់របស់រដ្ឋលេខាធិការដ្ឋានអាកាសចរណ៍ស៊ីវិលកម្ពុជា ។
អាកាសយានដ្ឋានអន្តរជាតិតេជោ ត្រូវបានសាងសង់ឡើងផ្ទៃដីជាង ២ ៦០០ហិកតា ស្ថិតនៅស្រុកកណ្ដាលស្ទឹង ខេត្តកណ្ដាល និងស្រុកបាទី ខេត្តតាកែវ ដោយបានចំណាយថវិកាសាងសង់ប្រមាណ១៥០០លានដុល្លារអាម៉េរិក ហើយក៏ជាអាកាសយានដ្ឋានអន្តរជាតិលំដាប់ F4 ដែលអាចឱ្យយន្តហោះប្រភេទ A380 និងប្រភេទ Boeing 747 ចុះចតបានផងដែរ ។
នៅក្នុងដំណើរទស្សនកិច្ចអាកាសយានដ្ឋានអន្តរជាតិតេជោកាលពីថ្ងៃទី៣ ខែមិថុនា ឆ្នាំ២០២៥ ឯកឧត្តម Dominic Williams ឯកអគ្គរាជទូតចក្រភពអង់គ្លេសប្រចាំនៅកម្ពុជា បានលើកឡើងថា តាមរយៈអាកាសយានដ្ឋានអន្តរជាតិតេជោ នឹងនាំភ្ញៀវអន្តរជាតិពីទីជិតទីឆ្ងាយ មកកម្ពុជាកាន់តែច្រើន ហើយពួកគេនឹងមើលឃើញថា កម្ពុជា គឺជាប្រទេសទំនើបជាមួយថាមពល ដែលមានចក្ខុវិស័យ និងមានមហិច្ឆតាទៅថ្ងៃអនាគត។
ឯកឧត្តម ក៏បានបង្ហាញជំនឿជឿជាក់ថា នៅពេលដែលភ្ញៀវអន្តរជាតិមកកាន់ព្រលានយន្តហោះថ្មីនេះ ពួកគេនឹងមើលឃើញសក្តានុពលដែលកម្ពុជាមាន ហើយសម្រាប់ឯកឧត្តមផ្ទាល់ តែងតែប្រាប់ទៅពលរដ្ឋមកពីអង់គ្លេសថា កម្ពុជាល្អជាងអ្វីដែលពួកគាត់បានឃើញមុនមកដល់ទីនេះ និងច្បាស់ណាស់ ព្រលានយន្តថ្មីនេះ នឹងផ្លាស់ប្តូរឥរិយាបទរបស់ភ្ញៀវអន្តរជាតិចំពោះប្រទេសកម្ពុជា ។
អ្នកឧកញ៉ា ឆារស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានមានប្រសាសន៍ថា គិតមកដល់ពេលនេះ អាកាសយានដ្ឋានអន្តរជាតិតេជោ សម្រេចការសាងសង់ប្រមាណជាង ៩៩ភាគរយ ដោយគ្រោងបើកឱ្យដំណើរការ គឺនៅថ្ងៃទី៩ ខែកញ្ញា និងសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី២០ ខែតុលា ឆ្នាំ២០២៥ខាងមុខ ក្រោមអធិបតីភាពដ៏ខ្ពង់ខ្ពស់របស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។ បច្ចុប្បន្ននេះ ការងារដែលនៅសេសសល់គឺការសម្អាតក្នុងការដ្ឋាន និងក្រុមការងារក៏កំពុងញាប់ដៃញាប់ជើងក្នុងការរៀបចំការងារនេះដែរ ។
ទន្ទឹមនឹងអាកាសយានដ្ឋានអន្តរជាតិតេជោកាន់តែជិតរួចរាល់ និងដាក់ដំណើរការ ក្រលេកទៅមើលការអភិវឌ្ឍនៅតំបន់ជុំវិញព្រលានយន្តហោះនេះ ក៏ឃើញថាមានការរីកលូតលាស់គួរឱ្យកត់សម្គាល់ ក្នុងនោះមានដូចជាការអភិវឌ្ឍលំនៅឋាន ឃ្លាំង រោងចក្រ ឧស្សាហកម្ម ខណៈហេដ្ឋារចនាសម្ព័ន្ធតភ្ជាប់ជុំវិញតំបន់នោះ ក៏ត្រូវបានរាជរដ្ឋាភិបាលអភិវឌ្ឍន៍បានច្រើនហើយដែរ ។
អ្នកជំនាញអចលនទ្រព្យជាច្រើនបានបញ្ចេញជាទស្សនថា តំបន់ជុំវិញអាកាសយានដ្ឋានអន្តរជាតិតេជោ នឹងមានសក្ដានុពលផ្នែកឧស្សាហកម្ម ដោយវិនិយោគិនបរទេសជាច្រើន ជាពិសេសចិន កំពុងសម្លឹងមើលទីតាំងជុំវិញដើម្បីដំណើរការវិនិយោគរបស់ខ្លួន ដូចជា រោងចក្រ ឃ្លាំងស្តុកទំនិញ ខណៈតំបន់នេះក៏មានភាពងាយស្រួលក្នុងការដឹកជញ្ជូនទៅកាន់តំបន់ផ្សេងៗទៀត ៕
Account
Security
Favourite Content