បរទេស ៖ បរិបទថ្មីនៃកំណើនកំពូលមហាសេដ្ឋីដែលមានទ្រព្យសម្បត្តិរហូតដល់កម្រិតទ្រីលានដុល្លារនឹងបង្ហាញឱ្យពិភពលោកបានឃើញ ស្របពេលដែលវិបត្តិនៃភាពក្រីក្រកាន់តែមានចំនួនច្រើននៅតាមបណ្តាប្រទេសនានា និងកាន់តែអាក្រក់ខ្លាំងគួរឱ្យព្រួយបារម្ភ។

ផ្អែកតាមការស្រាវជ្រាវពីស្ថាប័នមួយចំនួនបានបង្ហាញលទ្ធផលស្រដៀងគ្នា និងបានលើកឡើងពីបុគ្គលកំពូលៗចំនួន៥រូបដែលត្រូវបានគេដាក់បញ្ចូលទៅក្នុងបញ្ជីនៃក្រុម ៤ក្បៀស (4Camma club) ​​។ ក្រុមនេះគឺសំដៅលើក្រុមហ៊ុន ឬបុគ្គលណាដែលមានក្បៀសចំនួន៤ដងនៃទំហំលុយ ឬទ្រព្យសម្បត្តិ ពោលគឺទៅដល់ខ្ទង់ទ្រីលាន​ ១,០០០,០០០,០០០,០០០។

នៅក្នុងការស្រាវជ្រាវខាងលើនេះបានព្យាករណ៍ថា បើមិនមានអ្វីប្រែប្រួលនោះទេ ត្រឹមរយៈពេលមួយទសវត្សរ៍ខាងមុខនេះ ការប្រមូលផ្តុំទ្រព្យសម្បត្តិដ៏ច្រើនសន្ធឹកសន្ធាប់នេះនឹងលេចចេញជារូបរាងឡើងមកម្តងមួយៗ ចាប់រាប់ពីលោក Elon Musk បុរសជនជាតិអាម៉េរិក ដែលជាម្ចាស់ក្រុមហ៊ុន Tesla និង SpaceX មុនគេ និងត្រូវបានក្លាយជាបុគ្គលដំបូងក្នុងប្រវត្តិសាស្ត្រដែលមានទ្រព្យសម្បត្តិទៅដល់ ៥០០ពាន់លានដុល្លារ និងក្លាយជាកំពូលមហាសេដ្ឋីលំដាប់ទី១លើពិភពលោកនាពេលបច្ចុប្បន្ននេះ ។

យ៉ាងណាក្តីកំណើនដ៏ហួសហេតុនៃទ្រព្យសម្បត្តិរបស់ក្រុមហាសេដ្ឋីទ្រីលានដុល្លារគឺវាមានភាពខុសគ្នា និងផ្ទុយស្រឡះពីកំណើននៃវិបត្តិក្រីក្រ ដែលកំពុងទាញទម្លាក់ស្ថានភាពរស់នៅរបស់ប្រជាជនរហូតទៅដល់ជិត ៧០០លាននាក់ ឬត្រូវជា ៨,៥ភាគរយនៃប្រជាជននៅលើពិភពលោក ដែលអាចមានលទ្ធភាពរកបានប្រាក់ចំណូលតិចជាង ២,១៥ ដុល្លារក្នុងមួយថ្ងៃប៉ុណ្ណោះ។ អ្វីដែលកាន់តែអាក្រក់ជាងនេះ បើយោងតាមអ្នកឃ្លាំមើល និងប្រឆាំងភាពក្រីក្រនៃអង្គការ Oxfarm បានបង្ហាញថា ភាគច្រើននៃទ្រព្យសម្បត្តិសរុបរហូតដល់៦០ភាគរយនៃក្រុមមហាសេដ្ឋី ត្រូវបានបង្កើតឡើងតាមរយៈមរតក បក្ខពួកនិយម ឬអំណាចផ្តាច់មុខនៃអាជីវកម្មទាំងដែលគ្រប់គ្នាតែងតែចាត់ទុកថា ទ្រព្យសម្បត្តិគឺជារង្វាន់សម្រាប់ទេពកោសល្យរបស់បុគ្គលសុទ្ធសាធ។ វាត្រូវបាន Oxfarm ពិពណ៌នាថា ជាការបង្កើតរបបអភិជននិយមថ្មីមួយ និងមានឥទ្ធិពលបំផុត។

គម្លាតជីវភាព និងការរស់នៅខុសគ្នាខ្លាំងនាពេលបច្ចុប្បន្ននេះ កំពុងបង្កើតភាពតានតឹងដល់សង្គមគួរឲ្យព្រួយបារម្ភ។ ចលនានយោបាយចាប់ផ្តើមកើតមាន និងកំពុងប្រមូលផ្តុំជុំវិញការស្រែកទាមទារឱ្យយកពន្ធបន្ថែមទៅលើក្រុមអ្នកមានទ្រព្យសម្បត្តិច្រើន ឬជាមហាសេដ្ឋី ដែលត្រូវបានចាត់ទុកថា ជាការរួមចំណែកដ៏សំខាន់ក្នុងការកំណត់ពីអស្ថិរភាពនៅលើសកល។ មានចម្ងល់លើកឡើងថា តើពលរដ្ឋក្រីក្ររាប់សិបលាននាក់នឹងត្រូវស៊ូទ្រាំរស់នៅក្នុងវិសមភាពសង្គមដោយរបៀបណា ខណៈដែលក្រុមសេដ្ឋីកំពូលៗប្រមាណជាង១០ភាគរយប៉ុណ្ណោះ ប៉ុន្តែមានទ្រព្យសម្បត្តិបញ្ចូលគ្នារហូតដល់ទៅ ៨៥ភាគរយនៃទ្រព្យសម្បត្តិរបស់ពិភពលោកនោះ ?