សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងគាំទ្រ និងដើម្បីជួយជំរុញការនាំចេញគ្រឿងអលង្ការ-ត្បូងមានតម្លៃកម្ពុជាទៅកាន់ទីផ្សារអន្តរជាតិឱ្យបានកាន់តែមានទំហំច្រើន និងប្រកបដោយសក្តានុពលនោះ សមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា នឹងរៀបចំពិព័រណ៍គ្រឿងអលង្ការ និងត្បូងកម្ពុជា-អន្តរជាតិ លើកទី១៥ ឆ្នាំ២០២៤ ដែលមានរយៈពេល៥ថ្ងៃ ពោលគឺចាប់ពីថ្ងៃទី២១ ដល់ទី២៥ ខែមីនា ឆ្នាំ២០២៤ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។
នៅក្នុងឆ្នាំ២០២៣កន្លងទៅនេះ កម្ពុជារកចំណូលបានពីការនាំចេញគ្រឿងអលង្ការ និងត្បូងមានតម្លៃទៅកាន់ទីផ្សារអន្ដរជាតិមានទំហំទឹកប្រាក់សរុបជាង ៨៥១លានដុល្លារ កើន ២៦១% បើធៀបនឹងឆ្នាំ២០២២។ នេះបើតាមការឲ្យដឹងពីលោកជំទាវ តាន់ ទេពីកណ្ណិកា អនុរដ្ឋលេខាធិការក្រសួងពាណិជ្ជកម្ម។
នៅក្នុងសន្និសីទសារព័ត៌មានស្ដីពីពិព័រណ៍គ្រឿងអលង្ការ និងត្បូងកម្ពុជា-អន្ដរជាតិ លើកទី១៥ ឆ្នាំ២០២៤ នៅសាលប្រជុំអគារ Morgan Tower ក្នុងទីក្រុងកោះពេជ្រ រាជធានីភ្នំពេញ នារសៀលថ្ងៃទី២២ ខែមករា លោកជំទាវបានបញ្ជាក់ថា ៖ ចំពោះទំហំពាណិជ្ជកម្មនៃការនាំចេញ គ្រឿងអលង្ការ និងត្បូងមានតម្លៃរបស់កម្ពុជាទៅទីផ្សារអន្ដរជាតិ មានការកើនឡើងជាលំដាប់រហូតដល់បរិមាណជាង ៨៥១លានដុល្លារក្នុងឆ្នាំ២០២៣ ដែលមានការកើនឡើងប្រហែល ២៦១% បើធៀបនឹងឆ្នាំ២០២២។
លោកជំទាវបានឱ្យដឹងទៀតថា នៅឆ្នាំ២០២១ កម្ពុជានាំចេញគ្រឿងអលង្ការ និងត្បូងមានតម្លៃ ១៤៩លានដុល្លារ ហើយឆ្នាំ២០២២ មានចំនួន២៦១លានដុល្លារ កើនឡើង៧៥ភាគរយធៀបទៅនឹងឆ្នាំ២០២១។
លោកជំទាវបានគូសបញ្ជាក់ថា សន្ទុះនៃកំណើនជាវិជ្ជមាននៃការនាំចេញនេះ សរបញ្ជាក់ឲ្យឃើញអំពីភាពជោគជ័យនៃកិច្ចសហប្រតិបត្ដិការដ៏ជិតស្និទ្ធ រឹងមាំ និងគ្រប់ជ្រុងជ្រោយរវាងក្រសួងពាណិជ្ជកម្ម ក្រសួងស្ថាប័នពាក់ព័ន្ធ ក៏ដូចជារាជរដ្ឋាភិបាលកម្ពុជា និងវិស័យឯកជន ក៏ដូចជាសមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជាផងដែរ។
លោកបណ្ឌិត ឆាយ ស៊ីណាត ប្រធានស្ដីទីសមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជា បានថ្លែងថា កម្ពុជាមានសក្តានុពលលើវិស័យគ្រឿងអលង្ការ និងត្បូងមានតម្លៃ។ ជាមួយគ្នានេះ ដើម្បីជំរុញវិស័យនេះឱ្យកាន់តែមានសក្តានុពល សមាគមនឹងរៀបចំពិព័រណ៍គ្រឿងអលង្ការ និងត្បូងកម្ពុជា-អន្តរជាតិ លើកទី១៥ ឆ្នាំ២០២៤ ចាប់ពីថ្ងៃទី២១ ដល់ទី២៥ ខែមីនា ឆ្នាំ២០២៤ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ។ តាមរយៈព្រឹត្តិការណ៍ប្រចាំឆ្នាំនេះ នឹងមានការរៀបចំកម្មវិធីសំខាន់ៗភ្ជាប់ជាមួយជាច្រើនដូចជា សិក្ខាសាលា ជំនួបពិភាក្សាលើការងារគ្រឿងអលង្ការ និងត្បូងមានតម្លៃកម្ពុជា កម្មវិធីកំសាន្ត និងសកម្មភាពសហប្រតិបត្តិការ រួមទាំងការជំរុញធុរកិច្ចផ្សេងៗទៀត៕
Account
Security
Favourite Content