ជីកំប៉ុស្តិ៍ ជាប្រភេទជីធម្មជាតិដែលបានមកពីការកាច់បំបែក និងការរលាយនៃវត្ថុសរីរាង្គក្រោមលក្ខខណ្ឌអាកាសធាតុសមស្របដោយមីក្រូសរីរាង្គ និងសត្វល្អិតមានប្រយោជន៍ឱ្យក្លាយទៅជាជីជាតិចិញ្ចឹមសម្រាប់ដំណាំ។ ក្នុងនោះ ជីកំប៉ុស្តិ៍ក៏មានប្រភេទផ្សេងៗគ្នាទៅតាមបច្ចេកទេសផលិត និងធាតុផ្សំខុសៗគ្នា ពិសេសជីកំប៉ុស្តិ៍ទឹក និងជីកំប៉ុស្តិ៍គោកដែលល្អសម្រាប់ដំណាំតាសក់ផ្អែម និងបន្លែ។

ជាទូទៅ ជីកំប៉ុស្តិ៍មានប្រយោជន៍ណាស់សម្រាប់បងប្អូនកសិករយើង ព្រោះវាបានផ្ដល់ជាជីសម្រាប់ដាក់ដំណាំ អាចកែប្រែគុណភាពដី ធ្វើឱ្យដីធូរ ដំណាំចាប់ឫសបានល្អ។ ម្យ៉ាងវិញទៀត វាងាយស្រួលក្នុងការផលិត ងាយរកវត្ថុធាតុដើម អាចកាត់បន្ថយចំណាយទៅលើការទិញជី ថែមទាំងអាចប្រើប្រាស់ឱ្យពីលទ្ធភាពនូវធនធានដែលមានស្រាប់ដូចជាលាមកសត្វ និងការសំណល់សរីរាង្គទាំងឡាយ។

បន្ទាប់ពីដឹងពីអត្ថប្រយោជន៍រួចមកហើយ កសិករគួរងាកមកមើលពីបច្ចេកទេសក្នុងការផលិតជីកំប៉ុស្តិ៍គោកដែលផ្ដល់ប្រសិទ្ធភាពខ្ពស់ចំពោះបន្លែ ដោយគេត្រូវការធាតុផ្សំ ៣មុខសំខាន់ៗគឺ លាមកគោ ឬលាមកក្របីពុកផុយ ១ភាគ ផេះអង្កាម ឬធ្យូងអង្កាម កន្លះភាគ និងកំបោរស ០.០៥ ភាគ។ បន្ទាប់មកប្រើទឹកធម្មតាក្នុងបរិមាណសមស្របអាចស្រោចផ្សើមនៅពេលលាយសារធាតុឱ្យចូលគ្នាសព្វ ក្រៅពីនេះគេត្រូវការថង់ប្លាស្ទិកថ្លាសម្រាប់ច្រកជី។

ក្រោយពីរកបានធាតុផ្សំរួចហើយ អ្នកផលិតក៏ត្រូវមានតង់កៅស៊ូសម្រាប់ក្រាល ឯលាមកគោដែលពុកផុយ ហើយស្ងួត យកទៅជ្រោយបំបែក និងរើសយកកម្ទេចកម្ទីដែលមិនរលាយចេញឱ្យស្អាត។ ចាក់វត្ថុធាតុដើមទាំងបីចូលគ្នាលើតង់ លាយច្របល់ឱ្យសព្វល្អ និងស្រោចទឹកឱ្យជោគល្មម។ យកល្បាយច្រកចូលថង់ប្លាស្ទិក រួចដាក់បញ្ឈរនៅកន្លែងដែលត្រូវកម្ដៅថ្ងៃបានល្អ ទុកចំហរមាត់ចោលពីម៉ោងសិនមុន និងក្របួចចងមាត់ថង់ឱ្យជិតល្អ ទុកហាលថ្ងៃប្រមាណ ១៤ថ្ងៃ ឬយូរជាងនេះកាន់តែល្អ។

ទន្ទឹមគ្នានេះដែរ ប្រសិនបើកសិករចង់បំប៉នដើម និងស្លឹកដំណាំ គេត្រូវការផលិតជីកំប៉ុស្តិ៍ទឹកមួយប្រភេទទៀតដែលផ្សំពីស្លឹកទន្ទ្រាងខេត្រ លាមកមាន់ឬលាមកប្រជៀវ ទឹកនោមគោរក្របី និងទឹកធម្មតា។ គេត្រូវយកទន្ទ្រាងខេត្តទៅកាត់ចិញ្ច្រាំខ្លីៗដែលអាចពុកផុយបានល្អ រួចលាយជាមួយវត្ថុធាតុដើមផ្សេងទៀតក្នុងពាងធំមួយរួចយកទឹកចាក់បំពេញរួចគ្របវាឱ្យជិតល្អនៅកន្លែងម្លប់ និងបើកកូរមួយថ្ងៃ​ ២ដង ក្នុងមួយដង ៥នាទី ដោយរក្សាទុកយ៉ាងតិច ២១ថ្ងៃទើបអាចប្រើបាន។ ក្នុងការប្រើប្រាស់កសិករត្រូវយកជីលាយជាមួយទឹក ឬបង្ហូរជាមួយទឹកស្រោចតាមទុយោស្រោចដំណក់ទឹក តាមគល់ដំណាំក៏បាន។

មួយវិញទៀត សម្រាប់បំប៉នផ្លែផ្អែម គេត្រូវការជីដែលផ្សំពីក្បាលត្រី ស្ករត្នោត មេជី និងទឹក ដោយយកធាតុទាំងនេះដាក់ចូលក្នុងធុង ឬកូនពាង កូរល្បាយជីរៀរាល់ ៣ថ្ងៃម្ដង ហើយត្រូវទុកពាងនៅកន្លែងម្លប់ប្រមាណ ១ខែអាចប្រើបានហើយ។ ចំណែកវិធីក្នុងការប្រើប្រាស់ក៏មិនខុសពីជីទឹកជំនួយដើមដែរ កសិករត្រូវយកជីលាយជាមួយទឹក ឬបង្ហូរជាមួយទឹកស្រោចតាមទុយោស្រោចដំណក់ទឹកតាមគល់ដំណាំ៕