កណ្តាល ៖ ដំណាំស្លឹកបាស់ ជាបន្លែបៃតងមួយប្រភេទ ដែលងាយស្រួលដាំដុះ ងាយថែទាំ អាចច្នៃធ្វើជាម្ហូបបានច្រើនមុខដ៏មានឱជារស និងមានប្រយោជន៍ចំពោះសុខភា ហើយក៏មានមនុស្សជាច្រើនចូលចិត្តទទួលទានផងដែរ។ ដោយសារមើលឃើញពីតម្រូវទីផ្សារយ៉ាងទូលាយបែបនេះ កសិករមួយចំនួនបានងាកមកចាប់យកមុខរបរដាំស្លឹកបាស់ដែលអាចរកបានប្រាក់ចំណូលគួរសមសម្រាប់ផ្គត់ផ្គង់ជីវភាពគ្រួសារ។

លោក ប្លង់ វិជ្ជា ជាកសិករដាំស្លឹកបាស់នៅក្នុងភូមិកោះគរ សង្កាត់រការខ្ពស់ ក្រុងតាខ្មៅ ខេត្តកណ្តាល បានឱ្យដឹងថា គ្រួសាររបស់លោកបានចាប់យកមុខរបរដាំស្លឹកបាស់នេះនៅលើដីទំនេរក្បែរផ្ទះប្រមាណជាង១០ឆ្នាំមកហើយ ខណៈដែលការដាំដុះទៀតសោតក៏មានលក្ខណៈងាយស្រួល ងាយថែទាំ ហើយអាចផ្តល់ផលបានរយៈយូរជាងដំណាំផ្សេងៗទៀត។

កសិករខាងលើបញ្ជាក់ថា នៅលើទំហំដីទំនេរនៅក្រោយផ្ទះប្រមាណ ២០ គុណនឹង ១៥ម៉ែត្រ​ លោក និងគ្រួសារបានសម្រេចដាំស្លឺកបាស់ ដែលក្រៅពីសម្រាប់ហូបនៅក្នុងគ្រួសារ ថែមទាំងអាចប្រមូលផលយកទៅលក់នៅលើទីផ្សារទទួលបានចំណូលគួរសម។

លោក ប្លង់ វិជ្ជា បានបញ្ជាក់ថា ៖

«សម្រាប់ផ្ទៃដីដាំដុះនៅក្រោយផ្ទះនេះក្នុងរដូវក្ដៅដែលមិនសូវអំណោយផលដល់ស្លឹកបាស់ យើងអាចប្រមូលផលម្តងបានចន្លោះពី ១៧០ដុំ ទៅ ២០០ដុំ ដោយក្នុង ១ដុំលក់បានតម្លៃ ៥០០០រៀល ហើយម៉ូយតែងយកដល់ផ្ទះ ដែលបេះម្តងៗអាចរកចំណូលបានចន្លោះពី ៨០ម៉ឺនរៀលទៅដល់ ១លានរៀល ហើយក្នុងរយៈពេលប្រមាណ១ខែ អាចប្រមូលផលម្ដង។ សម្រាប់ដំណាំយកស្លឹក ឬយកត្រួយ ដូចជាប្រភេទស្លឹកបាស់នេះ មានលក្ខណៈចាញ់ខ្យល់នៅរដូវខ្យល់ធ្លាក់ពីខាងជើងមិនសូវដុះលូតលាស់បានល្អនោះទេ ប៉ុន្តែនៅរដូវភ្លៀងធ្លាក់ ដើមវាដុះលូតលាស់បានល្អ មានរយៈពេលត្រឹម២០ថ្ងៃអាចប្រមូលផលបាន និងប្រមូលផលច្រើនចន្លោះពី ៤០០ដុំទៅ៥០០ដុំ ក៏ប៉ុន្តែនៅពេលដែលដំណាំប្រមូលផលបានច្រើន តម្លៃក៏មានការធ្លាក់ចុះផងដែរ ដែលអាចលក់ចេញបានចន្លោះពី ២៥០០រៀលទៅ៣០០០រៀលប៉ុណ្ណោះ ក្នុងមួយដុំ»។

ជាមួយគ្នានេះ លោកយាយ ហ៊ុន លីម ជាអ្នកដាំស្លឹកបាស់ម្នាក់ទៀតនៅក្នុងភូមិកោះគរបានឱ្យដឹងថា ស្លឹកបាស់មានលក្ខណៈងាយស្រួលដាំដុះជាងដំណាំស្លឹកដទៃទៀត ដោយមុនដំបូងគ្រាន់តែភ្ជួរាស់ដីហាលទុករយៈពេលពី ០៧ថ្ងៃទៅ១០​ថ្ងៃ ដាក់ជីរួចលើកជាថ្នាលចន្លោះកន្លះម៉ែត្រពីថ្នាលមួយទៅថ្នាលមួយ ដើម្បីងាយស្រួលក្នុងការដើរប្រមូលផល។​ ពេលលើកថ្នាលរួច គេត្រូវយកគ្រាប់បាស់មករោយជាពីរជួរនៅលើថ្នាល ហើយស្រោចទឹកវា បានរយៈពេល០៣ទៅ០៤ថ្ងៃ ដើមស្លឹកបាស់ចាប់ផ្តើមពន្លកឡើង។

ស្ត្រីវ័យចំណាស់រូបនេះបានបន្តថា ៖ គេត្រូវស្រោចទឹករាល់ថ្ងៃរហូតដល់អាយុមួយសប្តាហ៍ទៅ១០ថ្ងៃ​ គេត្រូវយកឬស្ស៊ីមកដោតធ្វើជ្រលង់ និងដាក់សំណាញ់ ឱ្យដើមរបស់វាអាចតោងឡើងបាន មិនយូរប៉ុន្មានត្រឹមមួយខែគេអាចប្រមូលផលបានហើយ ក្រោយប្រមូលផលរួចគេដាក់ជីបាញ់ថ្នាំជំនួយស្លឹក ហើយស្រោចទឹករាល់ថ្ងៃ ចន្លោះ២០ថ្ងៃទៅ០១ខែក្រោយគេអាចប្រមូលផលបានទៀត ហើយប្រមូលផលរៀងរាល់ខែ គ្រាន់តែថែទាំដាក់ជី និងស្រោចទឹកជាប្រចាំ វាអាចឱ្យផលចន្លោះពី០៤ឆ្នំាទៅ០៥ឆ្នាំឯណោះ ប៉ុន្តែដើម្បីរក្សាឱ្យវារស់បានយូរគេត្រូវធ្វើរបងបាំងខ្យល់ឱ្យបានជាប់ល្អ បើកាលណាខ្យល់ខ្លាំង ឬស្សីជន្លង់ដួល ស្លឹកបាស់ក៍ខូចដែរ។

លោក ឈឿង ឆូ ចៅសង្កាត់រការខ្ពស់មានប្រសាសន៍ថា ដោយសារអំណោយផលទីតំាងនៅក្បែរទីក្រុង ឬទីប្រជុំជន ប្រជាពលរដ្ឋក្នុងសង្កាត់រការខ្ពស់ ក្រៅតែពីបម្រើការងារនៅតាមសិប្បកម្ម ស្ថាប័នរដ្ឋ ឬក្រុមហ៊ុនឯកជន និងរោងចក្រផងនោះ ពួកគាត់បានឆ្លៀតពេលដាំដំណាំផ្សេងៗជាច្រើនជាលក្ខណៈគ្រួសារ ហើយដំណាំស្លឹកបាស់នេះ មានប្រជាប្រិយភាព និងមានប្រជាពលរដ្ឋដាំច្រើនជាងគេនៅក្នុងភូមិកោះគរ ។

គួរបញ្ជាក់ដែរថា ស្លឹកបាស ជាបន្លែម្យ៉ាងសំរាប់ចំអិនធ្វើម្ហូបអាហារ និងមានផលប្រយោជន៍ផ្នែកសុខភាព ។

ខាងក្រោមនេះ គឺជាផលប្រយោជន៍មួយចំនួនជួយឱ្យរាងកាយមានសុខភាពល្អ និងជួយបំបាត់អាការជំងឺផ្សេងៗដូចជា៖

– ដើមបាសមានលក្ខណៈជាវល្លិ អាចវារតោងទៅលើដើមឈើផ្សេងៗមានផ្កាពណ៌ស មានផ្លែរាងទ្រវែងស្រដៀងត្រសក់ រីឯស្លឹកមានទ្រង់ទ្រាយដូចរូបបេះដូង អាចយកស្លឹក និងត្រួយមកស្ងោរធ្វើជាអាហារដ៏ឈ្ងុយឆ្ងាញ់។

– ស្លឹកបាសមានសារធាតុ “បេតាឃែរ៉ូទីន” សំរាប់ជួយការពារការកើតមហារីកកាត់ បន្ថយជាតិស្ករក្នុងឈាម និងមានសារធាតុកាល់ស្យូម ជួយប៉ូវឆ្អឹង និងធ្មេញមានជាតិដែក និងវីតាមីន C បន្ថយអាការឆ្អល់ តឹងពោះ និងចុកពោះជាដើម ។ ប្រសិនបើទទួលទានស្លឹកបាសឱ្យបានញឹកញាប់សារធាតុសរសៃក្នុងស្លឹកបាសអាចជួយកាត់បន្ថយអត្រានៃភាពប្រថុយប្រថាននឹងការកើតមហារីកនៅក្នុងក្រពះបាន។

– ស្លឹកបាសចាត់ទុកថាជាថ្នាំត្រជាក់ ស្លឹកជួយបណ្ដេញជាតិពុល និងបំបាត់អាការគ្រុនក្ដៅ រលាក ជួយព្យាបាលអាការរមាស់ ដោយប្រើស្លឹកបាសស្រស់ប្រហែល១ក្ដាប់ដៃលាងឱ្យស្អាត និងបុកឱ្យម៉ដ្ឋលាយទឹកបន្ដិចយក ទៅលាបនៅបរិវេណដែលមានរមាស់ ក៏អាចជួយឲ្យធូរស្បើយបានផងដែរ។

– ស្លឹកបាសជាបន្លែម្យ៉ាងដែលងាយរកអាចដាំបានដោយងាយស្រួល គ្រាន់តែយកគ្រាប់ពីផ្លែទុំមកបណ្ដុះ ឬយកដើមចាស់ៗ មកដោតនៅក្នុងដីមានជីវារស្រោចទឹកឱ្យ បានញឹកញាប់ និងយកឈើមកធ្វើជាបង្គោល ឬរបងឱ្យស្លឹកបាសវៀរឡើង ។ លុះនៅពេលដែលវាដុះឡើងចេញជាផ្លែផ្កាល្អ អាចបេះស្លឹកយកទៅដាំស្ល ធ្វើជាម្ហូបអាហារដ៏មានរសជាតិឈ្ងុយឆ្ងាញ់ ប្រសិនបើកាន់តែបេះស្លឹក វាក៏កាន់តែដុះលូតលាស់។

– ផ្លែបាសគេអាចយកទៅធ្វើជាបន្លែដែលមានរសជាតិឈ្ងុយឆ្ងាញ់បានផងដែរ៕ វិន ឈុនហ៊ាត