កំពង់ធំ ៖ ពិភពលោកកាន់តែអភិវឌ្ឍ របត់សង្គមកាន់តែជឿនលឿនលើគ្រប់វិស័យ សូម្បីតែការងារកសិកម្មក៏រឹតតែមាននវានុវត្តន៍ថ្មីៗ ពិសេសផ្នែកបច្ចេកវិទ្យាកសិកម្មដើម្បីសម្រួលដល់ការងារកសិករ។ ស្របទៅនឹងនិន្នាការទាំងនេះ បុរសម្នាក់ដែលធ្លាប់បានចេញទៅបម្រើការងារជាពលករនៅក្រៅប្រទេសផ្នែកឧស្សាហកម្ម ហើយគាប់់ជួនមានមានឪពុកជាជាងជួសជុសម៉ាស៊ីនស្រាប់ផងនោះ ក៏បានចង់ចំណេះ និងជំនាញដែលខ្លួនទទួលបានពីក្រៅប្រទេស ព្យាយាមកែច្នៃបង្កើតជាគ្រឿងយន្តកសិកម្មបានជាច្រើនប្រភេទ និងដាក់លក់ក្នុងតម្លៃសមរម្យដើម្បីអាចជួយសម្រួលដល់កសិករក្នុងវិស័យដាំដុះ។

លោក អុល ចំណាប់ ជាស្ថាបនិកសិប្បកម្មផលិតគ្រឿងយន្ត ក្រោមយីហោ «បច្ចេកវិទ្យាគ្រឿងយន្ត០០៧» មានទីតាំងនៅក្រុងស្ទឹងសែន ខេត្តកំពង់ធំ បានប្រាប់ឱ្យដឹងថា ៖ ហេតុផលដំបូងដែលជំរុញឱ្យលោកសាកល្បងបង្កើតគ្រឿងយន្តកសិកម្មដែលបានឃើញនាពេលបច្ចុប្បន្ននេះ គឺផ្តើមចេញពីទឹកចិត្តស្រឡាញ់ក្នុងវិស័យមួយនេះ ជាពិសេសក្រោយពេលទទួលបានបទពិសោធន៍នៅក្រៅប្រទេសតាមរយៈការចេញទៅបម្រើការងារជាពលករនៅក្នុងផ្នែកឧស្សាហកម្ម។

លោកបានបញ្ជាក់ថា ៖

«មូលហេតុនៃកាបង្កើតគ្រឿងម៉ាស៊ីនទាំងនេះ ដោយសារខ្ញុំធ្លាប់ឃើញគ្រឿងយន្តកសិកម្មនៅក្រៅប្រទេសដូចជាប្រទេសថៃ និងកូរ៉េ មានភាពទំនើបជឿនលឿន ណាមួយមានឪពុកជាជាងម៉ាស៊ីនស្រាប់ គួបផ្សំជាមួយទឹកចិត្តស្រឡាញ់ខាងគ្រឿងម៉ាស៊ីនផងនោះ ក៏ចាប់ផ្ដើមសាកល្បងបង្កើត និងកែច្នៃគ្រឿងម៉ាស៊ីនទាំងនេះឡើង។ គោលដៅនៃការបង្កើតនេះទៀតសោត គឺចង់ជួយសម្រួល និងផ្ដល់ភាពងាយស្រួលដល់ប្រជាកសិករក្នុងការធ្វើកសិកម្ម ចំណេញទាំងពេលវេលា ចំណេញទាំងកម្លាំងពលកម្ម និងអាចកាត់បន្ថយថ្លៃដើមទៀត»។

ជាសមិទ្ធផលដែលលោកផលិតបាន និងដាក់លក់នាពេលបច្ចុប្បន្ននេះរួមមានដូចជា ម៉ាស៊ីនបូមទឹក ម៉ាស៊ីនដាំដំឡូង ម៉ាស៊ីនព្រោះស្រូវ ម៉ាស៊ីនបាញ់ថ្នាំចំការ កូនត្រាក់ទ័រភ្ជួរដី និងរុញដី ម៉ាស៊ីនកាត់ស្មៅ ម៉ាស៊ីនខួងដីដាំដំណាំ ចង្ក្រានប្រើប្រេងខ្មៅ និងសម្ភារប្រើប្រាស់ផ្សេងទៀតមានច្រើនខ្នាត ច្រើនទំហំ អាស្រ័យតាមតម្រូវការបងប្អូនប្រជាកសិករ។ ដោយឡែក ចំពោះគ្រឿងយន្តដែលមានតម្រូវការច្រើន គឺគ្រឿងម៉ាស៊ីនកសិកម្ម ដែលកសិករគាត់ត្រូវការប្រើប្រាស់តាមរដូវកាលដូចជា រដូវទឹកស្រក គេត្រូវការប្រើម៉ាស៊ីនព្រោះស្រូវ ម៉ាស៊ីនបាចជី និងម៉ាស៊ីនបូមទឹក ហើយនៅដើមឆ្នាំ កសិករអាចត្រូវការម៉ាស៊ីនដែលទាក់ទងនឹងការធ្វើចំការ រួមានដូចជា ម៉ាស៊ីនបាញ់ថ្នាំ ម៉ាស៊ីនដាំដំឡូង និងម៉ាស៊ីនកាត់ស្មៅ ។

ដោយឡែក ចំពោះតម្លៃរបស់ម៉ាស៊ីននីមួយៗគឺមានភាពខុសគ្នាអាស្រ័យតាមប្រភេទ តាមខ្នាត និងតាមកម្លាំង ជាក់ស្ដែងដូចជា ម៉ាស៊ីនបូមទឹកអាចមានតម្លៃចាប់ពី ១៥០ដុល្លារឡើងទៅ ចំណែកឯម៉ាស៊ីនព្រោះស្រូវដែលគេនិយមទិញជាងគេគឺ តួធុង ដែលមានតម្លៃ ១លាន ២៥ម៉ឺន គេអាចតភ្ជាប់ជាមួយនឹងម៉ាស៊ីនសាំង ដាក់លើរ៉ឺម៉កគោយន្ត អាចបាចបាន ១០-២០ហិកតាក្នុងមួយថ្ងៃ ហើយថែមទាំងអាចដំណើរការបាចគ្រាប់ជីជាមួយគ្នាក៏បានដែរ។

នៅក្នុងឱកាសជាមួយគ្នានេះ លោក អុល ចំណាប់ ក៏បានប្រាប់ពីដំណើរការនៃការផលិតផងដែរថា វត្ថុធាតុដើមសម្រាប់រៀបចំផ្គុំបង្កើតជាគ្រឿងម៉ាស៊ីននីមួយៗគឺមានច្រើន ប៉ុន្តែភាគច្រើនប្រមាណជាង៨០ភាគរយគឺអាចរកបាននៅក្នុងស្រុក លើកលែងតែគ្រឿងបង្គុំចាំបាច់ និងសំខាន់ៗមួយចំនួនប្រមាណ២០ភាគរយតម្រូវទិញយកមកពីក្រៅប្រទេស។ ទោះជាយ៉ាងណាក៏ដោយ តាមរយៈសិប្បកម្មកែច្នៃ និងផលិតគ្រឿងយន្តកសិកម្មខាងលើនេះ ក្រៅពីអាចបង្កើតជាផលិតផលជំនួយផ្នែកកសិកម្ម និងឧស្សាហកម្មក្នុងស្រុក ក៏បានរួមចំណែកផ្តល់ការងារ ជាពិសេសជំនាញក្នុងការជួសជុល និងបង្កើតម៉ាស៊ីនយានយន្តផ្នែកកសិកម្មដល់ប្រជាសហគមន៍ក្នុងតំបន់ប្រមាណ១០នាក់ ក៏ដូចជាផ្តល់ចំណូលសម្រាប់ទ្រទ្រង់ជីវភាពគ្រួសារផងដែរ។

គួររំឭកដែរថា លោក ចំណាប់ បានចាប់ផ្ដើមអាជីវកម្មខាងលើនេះនៅឆ្នាំ២០១៤ ដោយដំបូងឡើយលោកគ្រាន់តែជាជាងផ្សារដែក និងជួសជុលម៉ាស៊ីនតែប៉ុណ្ណោះ លុះដល់ឆ្នាំ២០២៥ លោកក៏បានចាប់ផ្ដើមដោយប្រើដើមទុនប្រមាណ ៥ពាន់ដុល្លារក្នុងការច្នៃម៉ាស៊ីនព្រោះស្រូវថ្មីមួយដែលមានសមត្ថភាពអាចជួយដល់ការងារកសិកម្ម និងបន្តច្នៃម៉ាស៊ីនផ្សេងទៀតដូចជា ម៉ាស៊ីនបូមទឹក ម៉ាស៊ីនដាំដំឡូង និងគ្រឿងម៉ាស៊ីនផ្សេងៗទៀត សរុបប្រមាណ ១០ប្រភេទ។

ដោយឡែក ចំពោះបញ្ហាដែលលោកតែងប្រឈម និងជួបប្រទះ គឺបញ្ហាគ្រឿងបង្គុំដែលស្ទើរតែ ៧០ភាគរយត្រូវធ្វើដោយដៃ នាំឱ្យការផលិតមានភាពយឺតយ៉ាវ មិនទាន់តម្រូវការរបស់អតិថិជន ហើយត្រូវចំណាយថ្លៃដើមខ្ពស់។ សម្រាប់ពេលអនាគត ស្ថាបនិកខាងលើមានបំណងចង់បង្កើតគ្រឿងម៉ាស៊ីនបន្ថែមទៀត ពោលគឺធ្វើឱ្យបានច្រើនស្របតាមតម្រូវការ និងការប្រើប្រាស់ក្នុងវិស័យកសិកម្ម មិនថាធ្វើស្រែ ឬចំការនោះទេ ហើយក៏ចង់អភិវឌ្ឍខ្លួនទៅជារោងចក្រក្នុងស្រុកមួយដែលមានខ្សែសង្វាក់ផលិតកម្មសម្បូរបែប ជឿនលឿន និងរួមចំណែកលើកស្ទួយសេដ្ឋកិច្ចជាតិ៕