កំពត ៖ ផ្កាអំបិលកំពត ជាផលិតផលសម្គាល់ភូមិសាស្ត្រមួយដែលមានកិត្តិនាមល្បីល្បាញប្រចាំខេត្តកំពត ទាំងផ្នែកគុណភាព គុណតម្លៃ និងមានតម្លៃខ្ពស់ ហើយមានតម្រូវការទីផ្សារទាំងក្នុងស្រុក និងក្រៅប្រទេស។ ក្នុងនោះ សហគ្រាស ថូង ជាសហគ្រាសឈានមុខមួយក្នុងការផលិត និងសហការជាមួយប្រជាកសិករក្នុងតំបន់ក្នុងការផលិត និងកែច្នៃអំបិលលក់នៅលើទីផ្សារ។

កញ្ញា ថូង ធីតា ជាស្ថាបនិកសហគ្រាសផលិតអំបិល ថូង អ៊ិធ័រប្រាយស៍ (THAUNG ENTERPRISE) បានប្រាប់ AMS Economy ឱ្យដឹងថា៖

«សហគ្រាស ថូង របស់យើងបច្ចុប្បន្នកំពុងផលិតអំបិលធម្មជាតិចេញពីខេត្តកំពត និងកែប ដោយយើងសហការជាមួយប្រជាកសិករក្នុងតំបន់ ហើយក្នុងនោះយើងមានប្រភេទអំបិលផ្សេងៗគ្នា ដូចជា អំបិលគ្រួស អំបិលម៉ដ្ឋ អំបិលស្លឹក អំបិលកិន និងផ្កាអំបិលជាដើម។ ជាទូទៅយើងផ្ដោតទៅលើផលិតផលទាំងអស់ តែជាយុទ្ធសាស្ត្រយើងផ្ដោតចម្បងទៅលើប្រភេទអំបិលគ្រួសដែលផ្គត់ផ្គង់ទៅលើទីផ្សារធំៗ និងផ្កាអំបិល ដែលទទួលបានការគាំទ្រទាំងក្នុង និងក្រៅប្រទេស ណាមួយវាជាប្រភេទផលិតផលដែលមានកម្រិត មានគុណតម្លៃ និងតម្លៃខ្ពស់»។

កញ្ញាបន្តថា សម្រាប់ការផលិត សហគ្រាសមួយនេះមានផលិតកម្មផ្ទាល់ខ្លួនផង និងសហការជាមួយប្រជាកសិករផង ដោយការផលិតក្នុងសហគ្រាសផ្ទាល់អាចផលិតជាមធ្យមបានប្រមាណ ៥០០០តោនក្នុងមួយឆ្នាំ និងកិច្ចសហការជាមួយប្រជាកសិករជាដៃគូអាចផលិតបានដល់ទៅ ៥ម៉ឺនតោនក្នុងមួយឆ្នាំផងដែរ។ ដោយឡែកទីផ្សារ សហគ្រាស ថូង ផ្ដោតលើទីផ្សារទំនើប តួយ៉ាងនៅតាមបណ្ដាផ្សារទំនើប ផ្សារម៉ាត និងផ្សារកសិផលជាដើម ចំណែកការនាំចេញទៅក្រៅប្រទេស ក៏មានសក្ដានុពលខ្ពស់ចំពោះអំបិលធម្មជាតិកំពត កែប។

ជាមួយនឹងជោគជ័យទាំងនេះ កញ្ញា ថូង ធីតា ក៏បានរៀបរាប់ពីជំនួយដែលសហគ្រាស ថូង ទទួលបានពីសហគ្រិនខ្មែរ ឬ KE ដែរថា៖

«សហគ្រិនខ្មែរ ឬ KE បានជួយដល់សហគ្រាស ថូង ក្នុងកញ្ចប់ជំនួយសហគ្រិនខ្មែរ សម្រាប់ការជួយគាំទ្រផ្នែកទីផ្សារ និងផលិតកម្មមួយចំនួនទៀត ជាពិសេសក្នុងអំឡុងពេលវិបត្តិកូវីដ-១៩ ដោយសារសហគ្រិនខ្មែរ ឬ KE ជាស្ថាប័នរដ្ឋាភិបាលមួយដែលមានចក្ខុវិស័យវែងឆ្ងាយក្នុងការបណ្ដុះបណ្ដាលសហគ្រិនភាព ជួយជ្រោមជ្រែង ផ្ដួចផ្ដើមរាល់សកម្មភាពទាំងឡាយណាដែលពាក់ព័ន្ធនឹងសហគ្រិនភាព»។

កញ្ញាបន្ថែមថា មិនត្រឹមតែចក្ខុវិស័យប៉ុណ្ណោះទេ សហគ្រិនខ្មែរក៏មានទាំងជំនួយ និងសកម្មភាពផ្សេងៗដើម្បីអភិវឌ្ឍសហគ្រិនភាព ទាំងផ្នែកបច្ចេកទេស ផ្នែកសមត្ថភាព ឬជំនួយផ្សេងៗទៀត ដែលតែងតែជួយគាំទ្រដល់ម្ចាស់សហគ្រាសនានា។ ហេតុនេះ សហគ្រិនដែលជាម្ចាស់សហគ្រាសនានាគួរតែស្វះស្វែង គិតគូរក្នុងការចូលរួមជាមួយសហគ្រិនខ្មែរ ឬ Khmer Enterprise នេះ។

សម្រាប់គម្រោងនាពេលអនាគត ម្ចាស់សហគ្រាសខាងលើរៀបរាប់ថា មានគម្រោងពង្រីកផលិតកម្មដើម្បីបង្កើនការផលិតអំបិលដើម្បីផ្គត់ផ្គង់ឱ្យត្រូវតាមតម្រូវការដែលកំពុងកើនឡើង និងស្វែងរកទីផ្សារថ្មីៗ ក៏ដូចជាអភិវឌ្ឍការផលិតផលអំបិលដែលមានតម្លៃបន្ថែម តាមយរៈការធ្វើឱ្យប្រសើរឡើងផ្នែកបច្ចេកវិទ្យាឱ្យកាន់តែមានប្រសិទ្ធភាព និងនិរន្តរភាព ដូចជាថាមពលពន្លឺព្រះអាទិត្យ និងការដើរក្បួនផ្សេងៗទៀត។ ក្រៅពីនេះ ក៏មានកិច្ចសហការជាមួយអាជីវកម្ម អង្គការ ឬស្ថាប័នស្រាវជ្រាវផ្សេងទៀត ដើម្បីទទួលបាននូវបច្ចេកវិទ្យា ទីផ្សារ និងជំនាញថ្មីៗ ជាពិសេសជាមួយ KE ដែលអាចទទួលបានការគាំទ្រច្រើនទាំងផ្នែកបច្ចេកទេស និងហិរញ្ញវត្ថុ៕