សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ចូលឆ្នាំចិន ជារដូវដែលអាជីវករលក់ជ្រូកខ្វៃ និងទាខ្វៃមានភាពមមាញឹកជាខ្លាំង និងអាចទទួលបានអតិថិជនច្រើនជាងពេលធម្មតា ដែលភាពច្រើនតែងទទួលបានការកុម្ម៉ង់ទុកសម្រាប់សែន ឬទទួលទានជុំគ្រួសារ សាច់ញាតិ និងបងប្អូន។ យ៉ាងណាក៏ដោយ សម្រាប់អាជីវករមិនថាទោះជាលក់ដាច់បានច្រើនដល់កម្រិតណានោះទេ អ្វីដែលសំខាន់បំផុតត្រូវតែរក្សាឱ្យបាននូវគុណភាព រសជាតិ និងអនាម័យ ផងដែរ។ នេះជាការលើកឡើងរបស់អាជីករជំនាញខ្វៃជ្រូកម្នាក់នៅតំបន់អូរ១ ក្រុងព្រះសីហនុ។
លោក អ៊ូ ខេមរា ហៅ ហេង ជាអាជីវករលក់ជ្រូកខ្វៃ និងទាខ្វៃមួយកន្លែងនៅម្ដុំអូរមួយ ខេត្តព្រះសីហនុបានរៀបរាប់ថា នៅក្នុងឱកាសនៃពិធីបុណ្យចូលឆ្នាំចិន អាជីវកម្មខ្វៃជ្រូករបស់លោកមានភាពមមាញឹកខ្លាំង ដោយមានពេលខ្លះមិនហ៊ានទទួលការកុម្ម៉ង់ពីអតិថិជនទាំងអស់នោះទេ ព្រោះខ្លាចធ្វើឱ្យគេមិនទាន់ ហើយម៉្យាងទៀត ធ្វើច្រើនក្នុងពេលតែមួយខ្លាចមានការធ្វេសប្រហែសដែលអាចបាត់បង់រសជាតិ។
លោកបានបញ្ជាក់ថា ៖
«សម្រាប់ឱកាសចូលឆ្នាំចិន ជាទូទៅខ្ញុំទទួលខ្វៃជ្រូកត្រឹមតែ ៦០ក្បាល និងទាប្រមាណ ៤០ក្បាលប៉ុណ្ណោះ ប៉ុន្តែបើតាមការកុម្ម៉ង់ជាក់ស្ដែងរបស់អតិថិជនអាចឡើងដល់ជាង ១០០ក្បាល ខ្ញុំអត់ហ៊ានទទួលច្រើនទេ ព្រោះចង់រក្សាគុណភាព ខ្លាចអតិថិជនហូបទៅអត់ឆ្ងាញ់ ភ្ញៀវយកលុយមកឱ្យហើយ ទាំងយើង ទាំងគេ គឺចង់បានជ្រូកឆ្ងាញ់ ហើយស្អាត និងមានអនាម័យល្អ»។
លោកបន្តថា សម្រាប់ការកុម្ម៉ង់នេះផងដែរ លោកទទួលត្រឹមថ្ងៃទី០៦ ប៉ុណ្ណោះ ហើយសម្រាប់ទាខ្វៃ ទាល់តែកុម្ម៉ង់ជ្រូកទើបលោកទទួលខ្វៃទាឱ្យ តែពុំមានទទួលខ្វៃទាសុទ្ធនោះទេ។ ដោយឡែក ពាក់ព័ន្ធនឹងតម្លៃវិញ ទាខ្វៃមានតម្លៃ ២០ដុល្លារក្នុងមួយក្បាល ឯជ្រូកវិញមានចាប់ពី ២៣០-២៨០ដុល្លារ ហើយជ្រូកដែលយកមកខ្វៃគឺជាជ្រូកខ្មែរទាំងអស់ដែលទិញមកត្រៀមទុក លុះដល់ថ្ងៃខ្វៃទើបធ្វើភ្លាមៗតែម្ដង។
លោក អ៊ូ ខេមរា បានបញ្ជាក់ឱ្យដឹងទៀតថា សម្រាប់អតិថិជនជ្រូកខ្វៃ និងទាខ្វៃរបស់លោកនៅក្នុងឱកាសពិធីបុណ្យចូលឆ្នាំចិន ភាគច្រើនជាម៉ូយដែលធ្លាប់ទិញ ធ្លាប់កម្ម៉ង់ដែលជាអ្នករស់នៅក្នុងក្រុងព្រះសីហនុផ្ទាល់ ប៉ុន្តែក៏មានអ្នកធ្វើដំណើរខ្លះទិញយកទៅសែនលោកយាយម៉ៅ ឬទទួលទានជួបជុំគ្រួសារផងដែរ។
នៅក្នុងឱកាសផ្តល់ព័ត៌មានជាមួយ AMS Economy អាជីវករជំនាញខ្វៃជ្រូករូបនេះក៏បានផ្តាំផ្ញើទៅដល់អាជីវករដទៃទៀតដែលទទួលខ្វៃជ្រូក គួរមានភាពស្មោះត្រង់ជាមួយអតិថិជន បើជ្រូកខ្មែរ ត្រូវច្បាស់ជាជ្រូកខ្មែរ ជ្រូកកណ្តុរត្រូវច្បាស់ជាជ្រូកកណ្តុរ ជៀសវាងយកជ្រូកនាំចូល ឬកូនជ្រូកបង្កកមកខ្វៃ ហើយកុហក់អតិថិជនដើម្បីទទួលបានចំណេញច្រើន។ លើសពីនេះ អ្វីដែលគួរយកចិត្តទុកដាក់បំផុតនោះ ការរក្សាឱ្យបាននូវរសជាតិឈ្ងុយឆ្ងាញ់ ប្រកបដោយអនាម័យទើបមិនបាត់បង់អតិថិជន៕
Account
Security
Favourite Content