សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ប្រអប់ថ្ម ឬជម្រកត្រីសិប្បនិម្មិត គឺជាគម្រោងដែលផ្ដួចផ្ដើមគំនិតឡើងដោយអង្គការអភិរក្សសមុទ្រកម្ពុជា (Marine Conservation Cambodia) ក្នុងកិច្ចការពារជីវៈចម្រុះក្រោមបាតសមុទ្រ ជាពិសេស ប្រភេទសត្វសមុទ្រដែលជិតផុតពូជឱ្យបន្តមានវត្តមាននៅដែនទឹកកម្ពុជា។
ធ្វើចេញពីស៊ីម៉ង់ត៍ មានរូបរាងជ្រុងវែង ដែលគេចំណាំប្រើប្រាស់ធ្វើជាបង្គោលរបង ពេលនេះបានក្លាយទៅជាជម្រកដ៏មានប្រសិទ្ធភាពសម្រាប់ធនធានក្រោមបាតសមុទ្រ ក្នុងនោះរួមមានស្មៅសមុទ្រផងដែរ។
បើតាមកញ្ញា ថាប់ រចនា នាយិការប្រតិបត្តិនៃអង្គការអភិរក្សសមុទ្រកម្ពុជា (MCC) បានឱ្យដឹងថា ប្រអប់ថ្ម បានដើរតួនាទីយ៉ាងសំខាន់ក្នុងការទប់ស្កាត់បទល្មើសនេសាទខុសច្បាប់ ដោយប្រើប្រាស់ មធ្យោបាយអូសសំណាញ់ទ្រង់ទ្រាយធំ ដែលវិធីសាស្ត្រនេះបានប៉ះពាល់យ៉ាងខ្លាំងទៅដល់ធនធាននៅបាតសមុទ្រ ជាពិសេសគឺស្មៅសមុទ្រ ដែលជាចំណីរបស់សត្វកម្រមួយចំនួន។
ចំពោះការសាងសង់ប្រអប់ថ្ម គឺធ្វើឡើងដោយទុកប្រហោងតូចល្មសម្រាប់ដាក់ខ្សែចងភ្ជាប់គ្នា ហើយក្រោយពេលទម្លាក់ចូលទៅក្នុងទឹកសមុទ្រហើយ ក្រុមអ្នកជ្រមុជទឹកនឹងមានភារកិច្ចតម្រៀបប្រអប់ទាំងនោះគរលើគ្នា និងចង់ឱ្យជាប់គ្នាតែម្ដង។
កញ្ញា ថាប់ រចនា បានរៀបរាប់ទៀតថា៖
«ជម្រកសិប្បនិម្មិតមួយត្រូវចំណាយប្រអប់ថ្មប្រមាណជា២០ដុំ ដែលមានទម្ងន់សរុបចន្លោះ២ ទៅ៣តោន ហើយទម្ងន់នេះសមល្មមនឹងអាចទប់កម្លាំងទាញរបស់ទូក នេសាទខុសច្បាប់បាន។ នៅពេលជម្រកត្រីសិប្បនិម្មិតត្រូវបានទម្លាក់ចូលទៅក្នុងសមុទ្រហើយ វានឹងក្លាយទៅជាកន្លែងលាក់ខ្លួន ការពារសុវត្ថិភាព ផ្ដល់ជាចំណីអាហារ និងដើរតួនាទីសំខាន់ក្នុងការចម្រោះគុណភាពទឹក»។
កញ្ញាបន្តឱ្យដឹងថា ៖ មួយរយៈពេលខ្លីក្រោយពីទម្លាក់ជម្រកសិប្បនិម្មិតនេះជាច្រើនទីតាំងនៅជុំវិញកោះអាចម៍សេះរួច ក្រុមអ្នកស្រាវជ្រាវក៏បានបន្តតាមដាន និងឃើញថា រុក្ខជាតិជាច្រើនចាប់ផ្ដើមដុះលូតលាស់មកវិញ ហើយមិនយូរប៉ុន្មាន ក្រុមការងារអភិរក្សក៏បានប្រទះឃើញវត្តមានរបស់ថនិកសត្វដ៏កម្រមួយគឺ «ជ្រូកទឹក» ហែលមកលេង និងរកចំណីនៅតំបន់ជុំវិញកោះមួយនេះ។
បើតាមកញ្ញា រចនា ជ្រូកទឹកបានបាត់វត្តមានពីដែនសមុទ្រកម្ពុជាជាច្រើនឆ្នាំមកហើយ រហូតដល់មានការសន្មត់ថា ថនិកសត្វប្រភេទនេះបានផុតពូជ។ ប្រភេទចំណីដ៏សំខាន់បំផុតរបស់ជ្រូកទឹកគឺស្មៅសមុទ្រ ហើយការលេចឡើងនៃវត្តមានរបស់ជ្រូកទឹក ក៏បានន័យថានៅទីនេះមានចំណីសម្រាប់ពួកវា។
ប្រភេទសត្វកម្រមួយទៀតដែលក្រុមការងារអភិរក្សបានប្រទះឃើញដែរនោះគឺ ផ្សោតទឹកប្រៃ (Irrawaddy dolphins)ដែលកញ្ញា រចនា អះអាងថា មានរហូតទៅដល់ប្រមាណ ៥០ក្បាល។ ជារឿយៗ ផ្សោតទាំងនោះហែលជាហ្វូងៗ បណ្ដែតខ្លួនលេងនៅជុំវិញកោះអាចម៍សេះ ព្រមទាំងរកចំណីនៅទីនេះផងដែរ។
គួរឱ្យដឹងផងដែរថា តាមរយៈកិច្ចសហប្រតិបត្តិការរវាងរដ្ឋបាលជលផលជាមួយនឹងអង្គការអភិរក្សសមុទ្រកម្ពុជា រហូតមកដល់ពេលនេះបានទម្លាក់ប្រអប់ថ្មចំនួន២០០ជម្រកហើយ នៅក្នុងទីតាំងភូមិសាស្ត្រ ខេត្តកែប ហើយនឹងបន្តកិច្ចសហការនេះដើម្បីទម្លាក់ឱ្យបានចំនួន ៥០០០ពាន់ជម្រកទៀតក្នុងរយៈពេល៥ ឆ្នាំ ដោយពង្រីកទៅខេត្តផ្សេងៗទៀតដូចជា ខេត្តកោះកុង កំពត និងព្រះសីហនុជាដើម។
លើសពីកិច្ចខិតខំប្រឹងប្រែងរបស់អង្គការអភិរក្សសមុទ្រ និងរដ្ឋបាលជលផល កញ្ញា រចនា ក៏បានកត់សម្គាល់ឃើញពីការចូលរួមយ៉ាងផុសផុលរបស់ប្រជានេសាទនៅក្នុងតំបន់នោះផងដែរ។ នេះចាត់ទុកថាជាលទ្ធផលល្អមួយនៅពេលដែលប្រជនជនបានយល់ដឹងអំពីសារៈសំខាន់នៃកិច្ចការពារធនធានជលផលក្នុងតំបន់របស់ពួកគេ៕
Account
Security
Favourite Content