បរទេស៖ យោងតាមប្រភពព័ត៌មានពី CNN បានរាយការណ៍ថា ប្រធានាធិបតីសហរដ្ឋអាម៉េរិក លោក Donald Trump បានសម្រេចផ្អាកយកពន្ធលើទំនិញដែលនាំចូលពីប្រទេសម៉ិកស៊ិក និងកាណាដាចំនួន ៣០ ថ្ងៃ បន្ទាប់ពីបានពិភាក្សាជាមួយនឹងមេដឹកនាំនៃប្រទេសទាំង២ កាលពីថ្ងៃចន្ទ សប្ដាហ៍នេះ។

កាលពីខែមុន ប្រធានាធិបតីសហរដ្ឋអាម៉េរិក លោក Donald Trump បានប្រកាសពីការយកពន្ធ ២៥ ភាគរយលើទំនិញនាំចូលពីប្រទេសម៉ិកស៊ិក និងកាណាដា ជាមួយនឹងការយកពន្ធ ១០ ភាគរយលើទំនិញចិន។ យ៉ាងណាមិញ Trump បានផ្អាកការយកពន្ធលើប្រទេសជិតខាងរបស់ខ្លួនទាំង២ ចំនួន ៣០ ថ្ងៃ បន្ទាប់ពីប្រធានាធិបតីម៉ិកស៊ិក លោកស្រី Claudia Sheinbaum និងនាយករដ្ឋមន្ត្រីកាណាដា លោក Justin Trudeau បានធ្វើការប្តេជ្ញាចិត្ត ដើម្បីពង្រឹងសន្តិសុខនៅតាមព្រំដែនរៀងៗខ្លួនជាមួយសហរដ្ឋអាម៉េរិក។ ទន្ទឹមនឹងនេះ ការដាក់ពន្ធ ១០ ភាគរយលើទំនិញនាំចូលពីប្រទេសចិន នៅតែត្រូវបានកំណត់ឱ្យចូលជាធរមានដូចដែលបានគ្រោងទុក ប៉ុន្តែ Trump គ្រោងនឹងពិភាក្សាជាមួយប្រធានាធិបតីចិន Xi Jinping នៅប៉ុន្មានថ្ងៃខាងមុខនេះ។

កាលពីថ្ងៃចន្ទ លោក Trump បានសរសេរនៅលើ Truth Social ថា ៖

«ខ្ញុំទើបតែបានពិភាក្សាជាមួយនឹងប្រធានាធិបតីម៉ិកស៊ិក Claudia Sheinbaum ដែលជាការសន្ទនាដ៏ស្និទ្ធស្នាលបំផុត។ ប្រធានាធិបតីម៉ិកស៊ិកយល់ព្រមភ្លាមៗក្នុងការដាក់ពង្រាយទាហានម៉ិកស៊ិកចំនួន ១០ ០០០ នាក់នៅតាមព្រំដែនម៉ិកស៊ិក និងសហរដ្ឋអាម៉េរិក។ ទាហានទាំងនោះនឹងត្រូវបានកំណត់ជាពិសេស ដើម្បីបញ្ឈប់រំហូរចូលនៃប្រភេទថ្នាំញៀន fentanyl និងជនចំណាកស្រុកខុសច្បាប់ចូលទៅក្នុងទឹកដីអាម៉េរិក»។

ក្រោយពីបញ្ចប់កិច្ចពិភាក្សា លោក Trump ធ្វើការប្រកាសស្រដៀងគ្នានេះអំពីការផ្អាកយកពន្ធលើកាណាដាផងដែរ បន្ទាប់ពីកាណាដាយល់ព្រមដើម្បីធានាថា អាម៉េរិកមានព្រំដែនភាគខាងជើងដែលមានសុវត្ថិភាព និងដើម្បីបញ្ឈប់ការហូរចូលគ្រឿងញៀនដូចជា Fentanyl ចូលក្នុងអាម៉េរិក។

លោកTrump បានលើកឡើងថា ៖ Fentanyl បានសម្លាប់ជនជាតិអាមេរិករាប់សែននាក់ ព្រមទាំងបានបំផ្លាញគ្រួសារ និងសហគមន៍របស់ពួកគេនៅទូទាំងប្រទេស។ បន្ទាប់ពីមានការពិភាក្សាជាមួយនឹង Trump នាយករដ្ឋមន្ត្រីកាណាដា លោក Justin Trudeau លើកឡើងថា កាណាដា បាន និងកំពុងអនុវត្តផែនការព្រំដែនមានតម្លៃ ១,៣ ពាន់លានដុល្លារ ក៏ដូចជាការប្តេជ្ញាចិត្តក្នុងការកំណត់ Fentanyl Czar និងចុះបញ្ជីក្រុមជួញដូរទៅជាភេរវករ។

យ៉ាងណាមិញ សង្រ្គាមពាណិជ្ជកម្មនៅតែជាបញ្ហាគួរឲ្យព្រួយបារម្ភសម្រាប់វិនិយោគិន ក្រុមហ៊ុន និងមេដឹកនាំនយោបាយ ដោយសារការគំរាមគំហែងយកពន្ធរបស់ Trump នៅបន្ត។ ការពន្យារពេលផ្អាកយកពន្ធចំនួន ៣០ ថ្ងៃប្រៀបបានដូចជាប្រទេសកាណាដា និងម៉ិកស៊ិកកំពុងទិញពេលវេលាបន្ថែមទៀត ប៉ុន្តែ Trump អាចនឹងយកពន្ធឡើងវិញពេលណាក៏បាន។

គួរឲ្យបញ្ជាក់ដែរថា Trump បានប្រកាសពន្ធវិសាមញ្ញប្រឆាំងនឹងដៃគូពាណិជ្ជកម្មធំជាងគេទាំង៣ របស់អាម៉េរិករួមមាន៖ ចិន កាណាដា និងម៉ិកស៊ិក ដែលបានបង្កការព្រួយបារម្ភដល់សមាជិកមួយចំនួននៃបក្សរបស់គាត់ផងដែរ។ លើសពីនេះ វាបង្កការរំខានដល់សេដ្ឋកិច្ចអាមេរិកខាងជើង ដែលធ្វើឱ្យអាជីវកម្ម និងទីផ្សារមានភាពរអាក់រអួលជាមួយនឹងភាពមិនច្បាស់លាស់ដល់អ្នកប្រើប្រាស់ ដែលទើបតែធូរស្បើយពីកម្រិតអតិផរណា។ មិនត្រឹមតែប៉ុណ្ណោះ ការគំរាមដាក់ពន្ធរបស់ Trump កំពុងផ្តើមជាសង្គ្រាមពាណិជ្ជកម្មជាបណ្តើរៗ ដោយកាណាដាឆ្លើយតបនឹងដំឡើងពន្ធសងសឹកវិញ ខណៈដែលចិននឹងចាត់វិធានការតបតជាចាំបាច់ទៅអាម៉េរិកវិញ។

សេដ្ឋវិទូមួយចំនួនបានលើកឡើងថា ប្រសិនបើ Trump អនុវត្តការដាក់ពន្ធគយនៅអាមេរិកខាងជើង នោះវានឹងធ្វើឱ្យសេដ្ឋកិច្ចកាណាដា និងម៉ិកស៊ិកធ្លាក់ចូលក្នុងវិបត្តិសេដ្ឋកិច្ចយ៉ាងឆាប់រហ័ស ហើយវាក៏នឹងបង្កឱ្យតម្លៃទំនិញប្រើប្រាស់ថ្លៃជាងមុនសម្រាប់ពលរដ្ឋអាម៉េរិកផងដែរ៕