សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ អង្គុយចិតបន្លែក្បែរអម្រែកនំបញ្ចុកនៅតាមសួនមាត់ទន្លេម្ដុំព្រះបរមរាជវាំង ស្ត្រីវ័យចំណាស់ម្នាក់ដែលជាអាជីវករលក់នំបញ្ចុកហាក់មានភាពមមាញឹកក្នុងការត្រៀមរបោយសម្រាប់អតិថិជនដែលដើរកម្សាន្តពេលល្ងាច។ ត្បិតថាវាជាមុខរបរតូចតាចក្ដី ប៉ុន្តែការលក់នំបញ្ចុកនៅតាមសួនមុខព្រះរបមរាជវាំងនេះយ៉ាងហោចណាស់ក៏អាចរកចំណូលបានគួរសមសម្រាប់ចិញ្ចឹមគ្រួសារបានដែរ។
ព្រះអាទិត្យអស់រស្មីមិនទាន់ ពន្លឺអំពូល និងគោមក៏ចាប់ផ្ដើមភ្លឺត្រៀបត្រាតាមរទេះ ថាស និងអម្រែករបស់អាជីវកររាងៗខ្លួនដើម្បីបំភ្លឺឱ្យឃើញច្បាស់នូវផលិតផល ក៏ដូចជាមុខអាជីវកម្មរបស់ខ្លួន រួមមានដូចជាចំណីអាហារក្រៅពេលជាដើម។ ជាក់ស្ដែង អ្នកស្រី អ៊ី ធី ជាអាជីវករលក់នំបញ្ចុកម្នាក់ក៏កំពុងរៀបចំយ៉ាងស្វិតស្វាញក្នុងការក្រាលកន្ទេល រៀបកៅអីខ្លះៗនៅពីមុខកន្លែងរបស់ខ្លួន ក៏ដូចជាចិតបន្លែទុកមួយកញ្ច្រែងធំ។
ដៃចិតបន្លែបណ្ដើរ ងាកមកនិយាយឆ្លើយឆ្លងជាមួយអ្នកយកព័ត៌មាន AMS Economy បណ្ដើរថា ៖
«ខ្ញុំលក់នំបញ្ចុកនេះច្រើនឆ្នាំហើយ តែទើបតែមកលក់នៅតាមមាត់ទន្លេនៅឆ្នាំ២០១៩ប៉ុណ្ណោះ ដោយសារមានបងប្អូនយើងដើរលេង ហាត់ប្រាណច្រើន ការលក់ក៏លក់បានគ្រាន់បើដែរ ដោយថ្ងៃធម្មតាអាចលក់បាន១០គីឡូនំបញ្ចុក ឯថ្ងៃបុណ្យទានក៏ដូចជាថ្ងៃចុងសប្ដាហ៍អាចលក់បានពី ១៥-២៥គីឡូនំដែរ»។
អ្នកស្រីបន្តថា ៖
«ជាធម្មតាយើងលក់ចាប់ពីម៉ោង ៥ល្ងាចទៅ ហើយអតិថិជនភាគច្រើនគាត់និយមមកហូបនៅពេលក្បាលល្ងាចខ្ទង់ម៉ោង ៥-៦នេះឯង ក្រៅពីនេះយើងក៏ចេះតែអង្គុយលក់លេងៗដល់ម៉ោង១១យប់ទើបត្រឡប់ទៅវិញ។ ដោយឡែក ទឹកសម្លរនំបញ្ចុកវិញ មានសម្លរខ្មែរលក់តម្លៃ៤០០០រៀល និងសម្លរការីលក់តម្លៃ ៥០០០រៀល ដែលអតិថិជននិយមចូលចិត្តទាំងពីមុខនេះមិនចាញ់គ្នានោះទេ»។
អាជីវកររូបនេះបានបន្ថែមថា សម្រាប់ការលក់នៅតាមសួននេះពីមុនមានគេហាមឃាត់ តែឥឡូវមិនអីនោះទេ ព្រោះអាជីវករដែលជាអ្នកលក់ដូរបានរៀបចំទីកន្លែងយ៉ាងត្រឹមត្រូវ និងរក្សាអនាម័យ ហើយក៏ត្រូវបង់ថ្លៃអនាម័យប្រចាំខែ ៤ម៉ឺនរៀលផងដែរ។ យ៉ាងណាមិញ អ្នកស្រី អ៊ី ធី ក៏មានគម្រោងចង់លក់គុយទាវឆាបន្ថែមទៀត ដោយសារទឹកត្រីគុយទាវឆាក៏អាចលាយជាមួយនំបញ្ចុកបាននៅពេលភ្ញៀវចង់ហូបនំបញ្ចុកជាមួយទឹកត្រីផ្អែមផងដែរ៕
Account
Security
Favourite Content