សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ចំពោះបងប្អូនដែលមិនមានដីធំទូលាយសម្រាប់ដាំដំណាំ សូមងាកមកចាប់អារម្មណ៍ និងមើលយុវជនម្នាក់ដែលកំពុងចាប់យកមុខរបរជាអ្នកដាំផ្សិតអំបោះ (ឬហៅដាផ្សិតអំបោះស) នៅលើដីលំនៅដ្ឋានដែលមានទំហំតូចមួយកន្លែង ប៉ុន្តែអាចរកចំណូលបានប្រចាំថ្ងៃក្នុងចន្លោះពី ១៥០,០០០រៀល ទៅដល់ ២០០,០០០រៀល ។
ជួបជាមួយយុវជន លឿ ណារី ម្ចាស់កសិដ្ឋានដង្ខៅផ្សិតអំបោះ មានទីតាំងនៅក្នុងភូមិព្រៃទទឹង ឃុំភ្នំតូច ស្រុកមង្កលបូរី ខេត្តបន្ទាយមានជ័យ បានរៀបរាប់ដោយមិនលាក់លៀមថា សព្វថ្ងៃខ្លួនបានដាំផ្សិតអំបោះចំនួន ៣រោង ដែលចំនួនសរុបប្រមាណជា ៧,០០០-៨,០០០ពាន់ថង់(កញ្ចប់) អាចឱ្យផលក្នុងមួយថ្ងៃចន្លោះពី ៣០ ទៅ ៤០គីឡូក្រាម ដោយក្នុងមួយគីឡូក្រាមមានតម្លៃ ៤៥០០រៀល (សម្រាប់តម្លៃបោះដុំ) ហើយមានចំនួនប៉ុន្មានក៏មានអ្នកចាំប្រមូលទិញទាំងអស់ដែរ។
យុវជនរូបនេះបានប្រាប់ឱ្យដឹងថា សម្រាប់បច្ចេកទេសដាំដុះ ដំបូងឡើយគេត្រូវរៀបចំរោងឱ្យបានស្អាត រឹងមាំ និងការពារកុំឱ្យមានស្រម៉ោចនៅក្នុងរោង បន្ទាប់មកគេត្រូវយកអាចម៌រណា ម្សៅដំណើប កំបោរស និងកន្ទក់មកលាយបញ្ចូលគ្នាឱ្យក្លាយជាល្បាយតែមួយ ហើយដាក់គរលើគ្នា បាញ់ទឹកស្រោចផ្សើមរយៈពេលប្រហែលកន្លះខែចាំយកថង់មកច្រក និងរោយមេផ្សិតពីលើ ទើបយកទៅតម្រៀបគ្នាដាក់ក្នុងរោងរយៈពេលប្រហែល២០ថ្ងៃ ពេលនោះកូនផ្សិត(ឬហៅថាសរសៃរស័្ពរ) នឹងដុះចេញមក ហើយគេនៅតែបន្តស្រោចទឹកមួយថ្ងៃ ២ ទៅ ៣ ដង រហូតដល់ ១០ថ្ងៃក្រោយមកទៀត ផ្សិតនឹងចាប់ផ្តើមដុះពន្លក ក្រោយពេលដុះបានចំនួនតែ ៣ថ្ងៃ គឺអាចប្រមូលផលបានហើយ។
យុវជនខាងលើបញ្ជាក់ថាបន្ថែម ៖
«ក្រោយពេលបេះ យើងបន្តស្រោចទឹកធម្មតា បន្ទាប់ពីបេះបានមួយសប្តាហ៍ ផ្សិតឱ្យផលបេះបានម្តងទៀត ឱ្យផល១សប្តាហ៍ម្តង រហូតដល់អាយុ ៤ទៅ ៥ខែ ទើបផ្សិតលែងឱ្យផល ចាំយើងរើផ្សិតចាស់ចោលរៀបថំធ្វើផ្សិតថ្មីទៀត» ។
យ៉ាងនេះក្តី យុវជនខាងលើបានត្អូញត្អែថា ដើមឡើយក៍មិនមានភាពងាយស្រួលដែរ ធ្វើដំបូងៗមិនទាន់មានបទពិសោធន៍ ពេលខ្លះផ្សិតដុះមិនស្រុះល្អ ពេលខ្លះត្រូវសត្វស្រម៉ោចមកយាយី ឬពេលខ្លះត្រូវរលួយខូចក៍មានដែរ តែដោយសារការតស៊ូជំនះមិនបោះបង់ យុវជនជាម្ចាស់កសិដ្ឋានដង្ហៅអំបោះ បានព្យាយាមដាំដុះរហូតបានជោគជ័យ ដែលរយៈពេល ៣ឆ្នាំមកនេះ អាចនិយាយបានថា ជោគជ័យទាំងបច្ចេកទេសដាំដុះ និងជោគជ័យទាំងការលក់នៅលើទីផ្សារ។
យុវជនខាងលើអះអាងថា ការងារដាំដុះផ្សិតអំបោះនេះ គឺជាការងារស្រាលដែលចាស់ៗទំនេរនៅផ្ទះក៏អាចធ្វើបានដែរ ដែលអាចរកចំណូលបានខ្ពស់ជាងការងារនៅខាងក្រៅមួយចំនួនទៀតផង ហើយសម្រាប់បងប្អូនដែលមានបំណងចង់ចេះដាំ ក៏យុវជនខាងលើពេញចិត្តចែករំលែកផងដែរ៕ វិន ឈុនហ៊ាត
Account
Security
Favourite Content