សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គ្រឹះស្ថានឥណទានជនបទចំនួន ១១៥ បានទទួលវិញ្ញាបនបត្រពីធនាគារជាតិនៃកម្ពុជា ដើម្បីធ្វើប្រតិបត្តិការផ្តល់ឥណទានខ្នាតតូចដល់ប្រជាជននៅតាមជនបទ និងទីប្រជុំជននានា ដោយបានរួមចំណែកលើកកម្ពស់ជីវភាពប្រជាជនតាមរយៈការផ្តល់លទ្ធភាពបន្ថែមក្នុងការទទួលបានសេវាហិរញ្ញវត្ថុផ្លូវការដែលមានកិច្ចការពារផ្នែកច្បាប់ និងប្រកបដោយបរិយាបន្ន។
យោងតាមរបាយការណ៍ធនាគារជាតិនៃកម្ពុជា គិតត្រឹមឆមាសទី១ ឆ្នាំ២០២៤ ឥណទានរបស់គ្រឹះស្ថានឥណទានជនបទបានថយចុះ ១១,៧% មក ១៩៥,៦ ប៊ីលានរៀល (៤៨,៤ លានដុល្លារអាមេរិក) និងមានគណនីអតិថិជនចំនួន ១០៩,៩ពាន់។
ជាមួយគ្នានេះ ឥណទានត្រូវបានផ្តល់ទៅកាន់វិស័យចម្បងៗ រួមមាន៖ កសិកម្ម ៣៣,៩% ពាណិជ្ជកម្ម ១៩,៧% គ្រួសារ ១៩,៥% សេវាកម្ម ១០,៥% សំណង់៤,៥% ដឹក- ជញ្ជូន ០,៤% និងផ្សេងៗ ១១,៥%។
ទន្ទឹមនេះ ធនាគារជាតិនៃកម្ពុជា បានឱ្យដឹងថា ការបន្តពង្រឹងការអនុលោមតាមច្បាប់ និងបទប្បញ្ញត្តិ គឺជាកត្តាចម្បងក្នុងការពង្រឹងគុណភាព និងសុខុមាលភាពរបស់គ្រឹះស្ថានឥណទានជនបទ។ ការផ្តល់ប្រាក់កម្ចីសម្រាប់ឥណទានខ្នាតតូចនៅតាមតំបន់ជនបទ និងទីប្រជុំជនមួយចំនួនបានផ្តល់សារៈសំខាន់ក្នុងការផ្គត់ផ្គង់តម្រូវការឥណទាន និងជៀសវាងការប្រើប្រាស់ឥណទានក្រៅប្រព័ន្ធ ដែលមានអត្រាការប្រាក់ខ្ពស់ និងមិនមានការគាំពារផ្នែកច្បាប់។
ទោះយ៉ាងណា គ្រឹះស្ថានឥណទានជនបទប្រឈមនឹងបញ្ហាមួយចំនួន ដូចជា ធនធានមនុស្ស នៅមានកម្រិត លទ្ធភាពនៃការស្វែងរកប្រភពទុនថ្មី ការប្រកួតប្រជែង និងការចំណាយខ្ពស់លើការរៀបចំហេដ្ឋារចនាសម្ព័ន្ធរបស់គ្រឹះស្ថាន។
សូមបញ្ជាក់ផងដែរថា គ្រឹះស្ថានឥណទានជនបទ ក៏ស្ថិតក្នុងក្នុងប្រព័ន្ធធនាគារផងដែរ ដែលបន្តរក្សាបានភាពធន់ ភាពរឹងមាំ និងជំនឿទុកចិត្តរបស់សាធារណជនជាតិ និងអន្តរជាតិ។
លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បានមានប្រសាសន៍ថា ធនាគារជាតិនៃកម្ពុជាបានតាមដាន និងវាយតម្លៃជាប្រចាំនូវហានិភ័យឥណទាន ក៏ដូចជាហានិភ័យពាក់ព័ន្ធនានា។ ក្នុងស្ថានភាពនេះ បទប្បញ្ញត្តិអនុគ្រោះត្រូវបានបន្តអនុវត្តដោយប្រុងប្រយ័ត្នសំដៅរក្សាស្ថិរភាពហិរញ្ញវត្ថុ ស្របពេលដែលការត្រួតពិនិត្យ និងការធ្វើសតេស្តលើគ្រឹះស្ថានធនាគារ និងហិរញ្ញវត្ថុត្រូវបានធ្វើឡើងជាប្រចាំ ដែលជាលទ្ធផលបានបង្ហាញថា ប្រព័ន្ធធនាគារកម្ពុជារក្សាបានភាពរឹងមាំ៕
Account
Security
Favourite Content