សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងរដ្ឋមន្ត្រីក្រសួងពាណិជ្ជកម្ម កាលពីថ្ងៃចុងសប្ដាហ៍កន្លងទៅនេះ បានរៀបចំកិច្ចជំនួបផ្គូផ្គងអាជីវកម្មរវាងអ្នកផលិត អ្នកចែកចាយ រួមទាំងផ្សារទំនើប ម៉ាត និងមីនីម៉ាត ព្រមទាំងអ្នកប្រើប្រាស់ ក្នុងគោលបំណងពង្រឹងខ្សែច្រវាក់តម្លៃផលិតផលក្នុងស្រុក ដោយក្នុងនោះ សិប្បកម្មផលិតក្នងស្រុកចំនួន៦៩ និងផ្សារទំនើប ម៉ាត និងមីនីម៉ាត ចំនួន ៦០ បានចូលរួមក្នុងវេទិកានេះ។
កិច្ចជំនួបមួយនេះ បានបង្ហាញពីការប្តេជ្ញាចិត្តរបស់រាជរដ្ឋាភិបាល ក្នុងការជំរុញការផលិតក្នុងស្រុក គាំទ្រសហគ្រាសធុនតូច និងមធ្យម និងពង្រីកទីផ្សារសម្រាប់ទំនិញផលិតនៅកម្ពុជា។ តាមរយៈការរៀបចំវេទិការផ្គូផ្គងនេះ រៀងរាល់ ៣ខែម្តង គំនិតផ្តួចផ្តើមនេះមានគោលដៅរក្សាសន្ទុះគាំទ្រ ពង្រឹងភាពជាដៃគូក្នុងខ្សែច្រវាក់តម្លៃ និងធានាវឌ្ឍនភាពយូរអង្វែងនៃការជំរុញភាពប្រកួតប្រជែងរបស់ផលិតផលក្នុងស្រុក។
ថ្លែងក្នុងជំនួបនេះ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសង្កត់ធ្ងន់លើការលើកកម្ពស់គុណភាព និងស្តង់ដារថាជាមូលដ្ឋានគ្រឹះសម្រាប់និរន្តរភាព និងភាពប្រកួតប្រជែងរយៈពេលវែងនៃផលិតផលក្នុងស្រុក។ ជាមួយគ្នានេះ ឯកឧត្តមក៏បានលើកទឹកចិត្តឱ្យអ្នកផលិត និងអ្នកចែកចាយក្នុងស្រុក អនុលោមតាមស្តង់ដារឧស្សាហកម្ម ដូចជា ធានាភាពត្រឹមត្រូវតាមស្តង់ដាររង្វាស់រង្វាល់ និងការធ្វើតេស្តវិភាគផលិតផលនៅមន្ទីរពិសោធន៍ឱ្យបានត្រឹមត្រូវ ដើម្បីធានាបាននូវទំនុកចិត្តរបស់អ្នកប្រើប្រាស់។
ឯកឧត្តមបានលើកឡើងថា៖
«ការគាំទ្រផលិតផលក្នុងស្រុកមិនមែនត្រឹមតែជាស្មារតីជាតិនិយម ដោយគ្រាន់តែការនិយាយ ឬបង្ហោះនៅលើបណ្តាញសង្គមនោះទេ តែត្រូវសម្តែងចេញតាមរយៈអាកប្បកិរិយា និងជម្រើសនៃការទិញទំនិញរបស់យើង។ បច្ចុប្បន្ន ប្រព័ន្ធអេកូឡូស៊ីនៃខ្សែច្រវាក់នេះនៅបែកខ្ញែកគ្នាច្រើន ហើយអ្នកផលិតក្នុងស្រុកភាគច្រើនក៏នៅផលិតក្នុងទំហំតូច ដែលទាមទារឱ្យមានការផ្គូផ្គង និងចងក្រងភាគីពាក់ព័ន្ធទាំងនេះ ពីអ្នកដាំដុះទៅអ្នកកែច្នៃ និងអ្នកផលិត រហូតដល់ក្រុមហ៊ុនចែកចាយ បណ្តាញលក់ដុំ-លក់រាយ និងអ្នកប្រើប្រាស់ ដើម្បីគាំទ្រសមត្ថភាពផលិតក្នុងស្រុកឱ្យមានទំហំកាន់តែធំ និងមានភាពប្រកួតប្រជែងកាន់តែខ្ពស់»។
លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានលើកឡើងពីតម្រូវការក្នុងការពង្រឹងសមត្ថភាពផលិតក្នុងស្រុក និងការរក្សាឧត្តមភាពនៃការធ្វើពាណិជ្ជកម្មអន្តរជាតិ ដើម្បីផ្តល់នូវជម្រើសមុខទំនិញចម្រុះសម្រាប់អ្នកប្រើប្រាស់។
លោកជំទាវរដ្ឋមន្រ្តី បានជម្រាបជូនថា៖
«កិច្ចជំនួបផ្គូផ្គងនេះ ពិតជាមានសារៈសំខាន់ណាស់ ដែលនឹងផ្តល់ឱកាសឱ្យសិប្បកម្មផលិតក្នុងស្រុក បានផ្សព្វផ្សាយនូវផលិតផលរបស់ខ្លួន និងជួបប្រាស្រ័យទាក់ទងផ្ទាល់ជាមួយតំណាងផ្សារទំនើប ម៉ាត និងមីនីម៉ាត សមាគម សណ្ឋាគារ និងសមាគមសហគមន៍ចុងភៅកម្ពុជា ដើម្បីអាចពិភាក្សាគ្នា និងផ្សារភ្ជាប់ព័ត៌មានទីផ្សារ ធ្វើយ៉ាងណាអាចបង្កើនការលក់ផលិតផលក្នុងស្រុក សំដៅជំរុញបន្ថែមទៀតនូវចលនាប្រើប្រាស់ផលិតផលខ្មែរ»។
លើសពីនេះ លោកជំទាវរដ្ឋមន្រ្តី បានផ្តល់អនុសាសន៍លើការងារមួយចំនួន រួមមាន ការពិនិត្យរៀបចំជំនួបផ្គូផ្គងជារៀងរាល់ ៣ ខែម្តង ដោយចាប់ផ្តើមពីរាជធានី ខេត្តសំខាន់ៗ ការលើកកម្ពស់ការយល់ដឹងអំពីការប្រើប្រាស់ផលិតផលដល់អតិថិជនជាអ្នកប្រើប្រាស់ និងលើកទឹកចិត្តដល់ផ្សារទំនើបនានា បង្កលក្ខណៈអំណោយផលដល់ការចូលដាក់តាំងលក់ផលិតផលខ្មែរជាដើម។
លោកជំទាវរដ្ឋមន្រ្តី បានបញ្ជាក់ថា៖
«វេទិកាផ្គូផ្គងនេះឆ្លុះបញ្ចាំងឱ្យឃើញពីស្មារតី និងឆន្ទៈរួមចំណែកជាមួយរាជរដ្ឋាភិបាល ក្នុងការរួមគ្នាលើកកម្ពស់ផលិតផលខ្មែរ»។
ដោយឡែក តែក្នុងគោលដៅតែមួយគឺលើកស្ទួយផលិតផលខ្មែរនោះ សមាគមសម្ព័ន្ធសហគ្រាសធុនតូច និងមធ្យមកម្ពុជា គ្រោងនឹងរៀបចំព្រឹត្តិការណ៍ពិព័រណ៍ផលិតផលក្នុងស្រុក នៅថ្ងៃទី០៥ ដល់ថ្ងៃទី០៧ ខែវិច្ឆិកា ឆ្នាំ២០២៥ នៅមជ្ឈមណ្ឌលពិព័រណ៍កោះពេជ្រ រាជធានីភ្នំពេញ ដែលមានសហគ្រាសក្នុងស្រុករហូតដល់ ២៧០សហគ្រាស និង ផលិតផលខ្មែរប្រមាណ ៣០០មុខ ៕
Account
Security
Favourite Content