សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាការពិតណាស់ ការទូទាត់ប្រាក់បច្ចុប្បន្នមានភាពងាយស្រួលណាស់ ដោយការផ្ទេរមានរយៈពេលលឿនជាងមុន និងអាចផ្ទេរពីចម្ងាយបាន។ ប៉ុន្តែភាពងាយស្រួលនេះ ក៏បានបង្កជាបញ្ហាភាន់ច្រឡំ មួយចំនួនផងដែរ។ បញ្ហាភាគច្រើនដែលអ្នកប្រើតែងតែជួប គឺការផ្ទេរប្រាក់ខុសគណនី។ បញ្ហានេះងាយនឹងកើតឡើង ដោយសារតែលេខគណនីស្រដៀង ឬឈ្មោះម្ចាស់គណនីស្រដៀងគ្នា ហេតុនេះហើយ ដើម្បីជៀសវាងការខាតបង់ អ្នកប្រើប្រាស់គួរតែត្រួតពិនិត្យ និងផ្ទៀងផ្ទាត់មុននឹងផ្ទេរប្រាក់។ ប៉ុន្តែយ៉ាងណាក៏ដោយ ប្រសិនបើករណីនេះបានកើតឡើង នោះអ្នកប្រើប្រាស់អាចស្វែងយល់ពីដំណាក់កាល និងនីតិវិធីមួយចំនួនដើម្បីស្នើសុំប្រាក់មកវិញ។
លោក ឃឹម សម្បូណ៍រតនា ប្រធាននាយកដ្ឋានទំនាក់ទំនងសាធារណៈ និងកិច្ចការទំនួលខុសត្រូវសង្គមរបស់ធនាគារ ABA បានឱ្យដឹងថា ធនាគារមានចំណែកនៅក្នុងការជួយសម្រួលរាល់បញ្ហាដែលអតិថិជនជួបប្រទះ ហេតុដូច្នេះហើយ ជំហានដំបូងអតិថិជនអាចរាយការណ៍បឋមទៅកាន់ធនាគារដែលខ្លួនកំពុងប្រើប្រាស់សេវាកម្ម។
សម្រាប់ការរាយការណ៍បឋមនេះ អ្នកប្រើប្រាស់អាចរាយការណ៍តាមគេហទំព័របណ្ដាញសង្គមរបស់ធនាគារ អាចខលប្រាប់ ឬទៅដល់សាខារបស់ធនាគារនោះតែម្ដង។ បន្ទាប់ពីការរាយការណ៍បឋមនេះ ធនាគារនឹងសួរបញ្ជាក់នូវព័ត៌មានផ្ទាល់ខ្លួនមួយចំនួន និងដំណើរដើមទងនៃករណីផ្ទេរប្រាក់ច្រឡំ ដើម្បីផ្ទៀងផ្ទាត់មុននឹងបង្កកគណនីដែលបានទទួលប្រាក់ជាបណ្ដោះអាសន្ន។
លោក ឃឹម សម្បូណ៍រតនា បានឱ្យដឹងទៀតថា៖
« បន្ទាប់ពីបានព័ត៌មានអំពីករណីនោះហើយ គាត់នឹងបញ្ចូនទៅផ្នែកពាក់ព័ន្ធ ប៉ុន្តែអតិថិជនខ្លួនឯងផ្ទាល់ក៏ត្រូវតែមានភារកិច្ចមកសាខា ដើម្បីដាក់ពាក្យក្នុងរយៈពេលយ៉ាងយូរមួយសប្ដាហ៍ បើមិនដាក់ពាក្យគឺខុសលក្ខខណ្ឌរបស់ស្ថាប័នហិរញ្ញវត្ថុ»។
ត្រង់ចំណុចនេះ លោកបានគូសបញ្ជាក់ដែរថា ការរាយការណ៍បឋមគ្រាន់តែជាការរាយការណ៍ក្រៅផ្លូវការមួយដើម្បីឱ្យធនាគារចាត់វិធានការបណ្ដោះអាសន្នប៉ុណ្ណោះ ប៉ុន្តែដើម្បីឈានទៅដោះស្រាយនូវករណីនេះ ភាគីធនាគារចាំបាច់ត្រូវមានពាក្យបណ្ដឹងពីអតិថិជន។
ចំពោះរយៈពេលនៃការដោះស្រាយវិញ អ្នកជំនាញដដែលបានអះអាងថា អាស្រ័យទៅលើលក្ខខណ្ឌនៃការធ្វើការរបស់ធនាគារនីមួយៗ។ ធនាគារខ្លះមានអតិថិជនច្រើន ដូច្នេះករណីដាក់ពាក្យបណ្ដឹងក៏មានច្រើនទៅតាមនោះដែរ។ ប៉ុន្តែទោះជាយ៉ាងណា ជាទូទៅធនាគារនឹងដោះស្រាយក្នុងរយៈពេល៣សប្ដាហ៍ ទៅ១ខែ អាស្រ័យលើករណីតូច ឬធំ។
ក្នុងនាមជាអ្នកធ្វើការក្នុងវិស័យធនាគារស្រាប់ លោកមិនលើកទឹកចិត្តឱ្យអតិថិជនបង្ហោះករណីទាំងនេះនៅលើបណ្ដាញសង្គម ព្រោះការធ្វើបែបនេះប្រៀបបាននឹងការយកព័ត៌មានផ្ទាល់ខ្លួនទៅចែកចាយជាសាធារណៈ ខណៈដែលស្ថាប័នហិរញ្ញវត្ថុព្យាយាមរក្សាឯកជនភាពរបស់អតិថិជន៕
Account
Security
Favourite Content