សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពី Investopedia បានរាយការណ៍ថា ធនាគារកណ្តាលអាម៉េរិកកំពុងរក្សាអត្រាការប្រាក់ខ្ពស់ដើម្បីរារាំងអតិផរណាឱ្យសេដ្ឋកិច្ចចុះត្រជាក់ ហើយអាចនឹងបន្តរក្សាវារហូតដល់អតិផរណាធ្លាក់ចុះ។
កាលពីសប្តាហ៍មុន ធនាគារកណ្តាលអឺរ៉ុប ECB បានកាត់បន្ថយអត្រាការប្រាក់ជាលើកដំបូងក្នុងរយៈពេល ៥ ឆ្នាំ ដែលកាត់បន្ថយពី ៤ ភាគរយមកត្រឹម ៣ ភាគរយ។ ការសម្រេចចិត្តនេះត្រូវបានប្រកាសនៅក្នុងកិច្ចប្រជុំគោលនយោបាយរូបិយវត្ថុនាពេលថ្មីៗនេះរបស់ ECB ខណៈដែលអតិផរណានៅក្នុងតំបន់អឺរ៉ូបានធ្លាក់ចុះជាង ២,៥ ភាគរយ ហើយទស្សនវិស័យអតិផរណាទាំងមូលបានប្រសើរឡើងគួរឱ្យកត់សម្គាល់។ ឥឡូវនេះ គេកំពុងរង់ចាំមើលថា តើធនាគារកណ្តាលអាម៉េរិកអាចនឹងកាត់បន្ថយអត្រាការប្រាក់របស់ខ្លួនដូចនឹងធនាគារកណ្តាលអឺរ៉ុបដែរ ឬទេ? យ៉ាងណាមិញ ការសម្រេចចិត្តរបស់ ECB ក្នុងការកាត់បន្ថយអត្រាការប្រាក់គឺផ្ទុយស្រឡះពីវិធីសាស្រ្តដែលធ្វើឡើងដោយធនាគារកណ្តាលអាមេរិក ដែលប្រកាន់ជំហររបស់ខ្លួនក្នុងការរក្សាអត្រាការប្រាក់មិនផ្លាស់ប្តូរនៅក្នុងកិច្ចប្រជុំគោលនយោបាយថ្មីៗបំផុតរបស់ខ្លួន។
ទន្ទឹមនឹងនេះ គេរំពឹងតិចតួចបំផុតដែលធនាគារកណ្តាលនឹងធ្វើការផ្លាស់ប្តូរណាមួយចំពោះគោលនយោបាយរូបិយវត្ថុ ប៉ុន្តែកិច្ចប្រជុំរបស់គណៈកម្មាធិការរៀបចំគោលនយោបាយរូបិយវត្ថុនៅថ្ងៃពុធខាងមុខនេះ នឹងបំភ្លឺអំពីពេលដែលធនាគារកណ្តាលអាចបន្ថយអត្រាការប្រាក់។ យ៉ាងណាមិញ ធនាគារកណ្តាលអាម៉េរិកអាចនឹងបន្តរក្សាអត្រាការប្រាក់នៅដដែល ៥,២៥ ភាគរយដល់ ៥,៥០ ភាគរយ ដែលជាកម្រិតខ្ពស់បំផុតក្នុងរយៈពេល ២៣ ឆ្នាំ។
ប្រសិនបើ Fed ដំឡើងអត្រាការប្រាក់ដើម្បីទប់ទល់នៃការកើនឡើងអតិផរណា ឬ បន្ថយវាដើម្បីជំរុញសេដ្ឋកិច្ច នោះវានឹងក្លាយទៅជារឿងភ្ញាក់ផ្អើលដ៏ធំចំពោះទីផ្សារហិរញ្ញវត្ថុ។ ទន្ទឹមនឹងនេះ ពាណិជ្ជករសង្ឃឹមថា Fed អាចនឹងកាត់បន្ថយអត្រាការប្រាក់ខែកញ្ញានៅឆ្នាំនេះ។ អត្រានៃការព្យាករណ៍របស់ពាណិជ្ជករលើការកាត់បន្ថយអត្រាការប្រាក់បានធ្លាក់ចុះពី ៦៨,៧ ភាគរយមកត្រឹម ៥០,៨ ភាគរយ បន្ទាប់ពីរបាយការណ៍ពីការិយាល័យស្ថិតិការងារបង្ហាញថា ការកើនឡើងប្រាក់ឈ្នួល និងកំណើនការងារអាចនឹងជំរុញសម្ពាធអតិផរណា។
មន្ត្រីធនាគារកណ្តាលបានឲ្យសញ្ញាថា ពួកគេសុខចិត្តឲ្យធនាគារកណ្តាលរក្សាអត្រាការប្រាក់ខ្ពស់ឱ្យបានយូរជាងនេះ ខណៈដែលសមាជិកគណៈកម្មាធិការគោលនយោបាយរបស់ Fed កំពុងរង់ចាំ អតិផរណាធ្លាក់ចុះដល់អត្រាប្រចាំឆ្នាំ ២ ភាគរយ មុនពេលដែលពួកគេនឹងពិចារណាបញ្ចុះអត្រាការប្រាក់សំខាន់ៗរបស់ពួកគេ ដែលមានឥទ្ធិពលលើការចំណាយលើការខ្ចីប្រាក់លើកម្ចីគ្រប់ប្រភេទ។ មិនត្រឹមតែប៉ុណ្ណោះ អត្រាអតិផរណានៅឆ្នាំ ២០២៤ ខ្ពស់ជាងការរំពឹងទុក ដែលធ្វើឲ្យការរំពឹងទុកសម្រាប់ការកាត់បន្ថយអត្រាការប្រាក់ថយចុះ។ Michael Gapen សេដ្ឋវិទូអាមេរិកនៅធនាគារ Bank of America Securities លើកឡើងថា Fed អាចកំពុងពិនិត្យឡើងវិញនូវទស្សនវិស័យរបស់ខ្លួនដើម្បីជំរុញកំណើន និងទប់ទល់អតិផរណាកាន់តែរឹងមាំ ហើយពួកគេគួរតែគ្រោងកាត់បន្ថយអត្រាការប្រាក់នៅឆ្នាំនេះ៕
Account
Security
Favourite Content