សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
មិនចាញ់ផ្លែឈើដទៃទៀតនោះទេ ផ្លែស្រកានាគពូជក្រហមកំពុងមានតម្រូវការទីផ្សារខ្ពស់ ធ្វើឱ្យកសិករដែលជាម្ចាស់ចំការកំពុងដុតដៃដុតជើងធ្វើការពង្រីកទំហំដាំដុះរហូតរាប់ពាន់បង្គោល ដើម្បីផ្គត់ផ្គង់ទីផ្សារក្នុងស្រុក។
តាម លោក ថន ភា ជាម្ចាស់ចំការស្រកានាគមួយកន្លែងស្ថិតនៅភូមិភ្នំ ឃុំទន្លេបិត ខេត្តត្បូងឃ្មុំ បានប្រាប់ឱ្យដឹងថា៖ បច្ចុប្បន្ននេះ លោកបានពង្រីកការដាំដុះដើមស្រកានាគលើផ្ទៃដីប្រមាណជាង ៣ហិកតា មាន ៧០០០បង្គោល ជាពូជស្រកានាគក្រហមក្នុងគោលបំណងជំរុញការផ្គត់ផ្គង់ទីផ្សារក្នុងស្រុកឱ្យបានគ្រប់គ្រាន់ ដោយជាធម្មតាអាចកាត់លក់ឱ្យឈ្មួញកណ្តាលយកទៅលក់បន្តបានប្រមាណ ៥០០គីឡូក្រាម ទៅ ១តោនក្នុងមួយថ្ងៃ អាស្រ័យតាមការបញ្ជាទិញ និងរដូវស្រកានាគពេញប្រមូលផល។
លោកបន្ថែមថា៖
«ស្រកានាគក្រហមអាចលក់បានបោះដុំក្នុងតម្លៃ ៤៥០០-៥០០០រៀលក្នុងមួយគីឡូក្រាម ឯលក់រាយអាចលក់ក្នុងតម្លៃ ៦០០០-៦៥០០រៀល ដោយយើងលក់ឱ្យឈ្មួញក្នុងតំបន់ផង និងលក់តាមបណ្ដាញសង្គមខ្លះដែរ។ ទោះបីយើងដាំបានស្រកានាគប្រមាណ ៧០០០បង្គោលមែន តែមានដើមចាស់ខ្លះ និងដើមថ្មីខ្លះត្រូវការមើលថែនៅឡើយ ហេតុនេះជាមធ្យមក្នុងមួយឆ្នាំយើងអាចទទួលបានទិន្នផល ១៥-២០តោនក្នុងមួយហិកតា»។
សម្រាប់ការប្រមូលផល ម្ចាស់ចំការខាងលើប្រាប់ឱ្យដឹងថា គេអាចប្រមូលផលស្រកានាគបាននៅចន្លោះខែឧសភា ដល់ខែវិច្ឆិកា ដោយក្នុងមួយខែអាចប្រមូលផលបាន ២វគ្គ ហើយមួយវគ្គៗអាចប្រមូលបាននៅចន្លោះ ២-៤ថ្ងៃ អាស្រ័យលើស្រកានាគដែលទុំជាបន្តបន្ទាប់។
ចំពោះការជ្រើសរើសពូជស្រកានាគវិញ លោក ថត ភា បញ្ជាប់ឱ្យដឹងថា ស្រកានាគមានពូជច្រើនទាំងសាច់ស និងសាច់ក្រហម ដោយដំបូងឡើយលោកបានសាកល្បងដាំនៅឆ្នាំ២០១៥ ប្រមាណ ៧០០បង្គោលមានពូជស្ទើរគ្រប់ប្រភេទ ហើយក៏បានសម្រេចចិត្តយកពូជសាច់ក្រហម និងទំហំផ្លែមធ្យម មិនធំពេក មិនតូចពេក ហើយវាមានរសជាតិឆ្ងាញ់ ងាយស្រួលដាំ ធន់នឹងជំងឺ និងមានទីផ្សារល្អ។
ពាក់ព័ន្ធនឹងបច្ចេកទេសក្នុងការដាំ គេត្រូវរៀបចំដីសម្រាប់ដាំ ពិសេសប្រព័ន្ធទឹកស្រោចស្រព និងខួងដាំបង្គោលឱ្យស្រកានាគឡើង ដែលត្រូវការចំណាយទុនច្រើន ដោយជាធម្មតាផ្ទៃដី ១ហិកតា ត្រូវការបង្គោល ១៨០០បង្គោល។ បន្ទាប់មកយកមែកស្រកានាគទៅដាំនៅតាមទីតាំងបង្គោលចំនួន ២មែក ក្នុង ១គុម្ព។ ក្នុងការដាំដុះនេះ ត្រូវការរយៈពេលប្រមាណ ៩ខែ ទើបស្រកានាគចាប់ផ្ដើមឱ្យផលរៀងរាល់រដូវ តែអ្នកដាំក៏ត្រូវការថែទាំ ពិសេសនៅរដូវប្រាំងដែលទាមទារឱ្យថែមែក បាញ់ថ្នាំ និងផ្គត់ផ្គង់ទឹកឱ្យបានគ្រប់គ្រាន់។
ទន្ទឹមគ្នានេះដែរ ការប្រកបរបរដាំស្រកានាគនេះក៏អាចជួបនូវកត្តាប្រឈមមួយចំនួនដូចជា ការផ្គត់ផ្គង់លើទីផ្សារមិនទាន់បានទូលំទូលាយ និងមិនទាន់មានស្ថិរភាពតម្លៃ ឯការដាំដុះក៏អាចប្រឈមនឹងជំងឺផ្សិតដំបៅដើមដែលអាចធ្វើឱ្យរោលដល់ផ្លែ និងកត្តាខ្យងដែលឡើងស៊ីផ្កាស្រកានាគផងដែរ។
ចុងក្រោយលោក ថន ភា ក៏សូមថ្លែងអំណរគុណដល់អតិថិជនមិនថាឈ្មួញបោះដុំ ឬអ្នកទិញរាយ ដែលតែងតែគាំទ្រផ្លែស្រកានាគក្នុងស្រុក ដាំក្នុងស្រុកភូមិផ្ទាល់ ហើយលោកក៏កំពុងពង្រីកការដាំដុះបន្ថែមទៀតដើម្បីផ្គត់ផ្គង់ឱ្យបានកាន់តែទូលំទូលាយកាត់បន្ថយការនាំចូលពីខាងក្រៅ៕
Account
Security
Favourite Content