សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ព្រឹត្តិការណ៍សំខាន់នៃការចាប់ផ្តើមសង្គ្រាមនៅអ៊ីរ៉ាក់កាលពីឆ្នាំ២០០៣ ដោយសហរដ្ឋអាម៉េរិក និងព្រឹត្តិការណ៍វាយឆ្មក់សម្លាប់មេដឹកនាំអាល់កៃដា Osama bin Laden នៅប៉ាគីស្ថានកាលពីឆ្នាំ២០១១ ព្រមទាំងព្រឹត្តិការណ៍សង្គ្រាម និងការតាមដានជម្លោះយោធាធំៗជាច្រើនទៀតដែលយើងអាចចងចាំបានគឺជាប្រតិបត្តិការដែលដឹកនាំដោយរដ្ឋាភិបាលក្រុងវ៉ាស៊ិនតោន។ ប៉ុន្តែ តើអ្នកមានដឹងទេថា បន្ទប់ដែលរៀបចំកិច្ចការងារ និងផែនការសំងាត់ដើម្បីពិភាក្សា ព្រមទាំងតាមដានព្រឹត្តិការណ៍ដោយផ្ទាល់ទាំងនោះគឺជាបន្ទប់ដ៏សំងាត់មួយដែលមានតែប្រធានាធិបតីអាម៉េរិក និងមន្ត្រីជាន់ខ្ពស់កំពូលរបស់អាម៉េរិកប៉ុណ្ណោះដែលមានសិទ្ធិប្រើប្រាស់ ហើយត្រូវបានគេហៅឈ្មោះថា Situation Room ឬបន្ទប់តាមដានស្ថានភាព ខណៈដែលពេលខ្លះវាត្រូវបានគេហៅថាជាបន្ទប់ War Room ផងដែរ។
តើ Situation Room មានប្រវត្តិយ៉ាងណា និងមានមុខងារសំខាន់ៗអ្វីខ្លះទៀតក្រៅតែពីការតាមដានប្រតិបត្តិការពិសេស រួមទាំងសង្គ្រាម និងជម្លោះយោធា ?
ជាទូទៅគេបានដឹងហើយថា បន្ទប់ស្ថានការណ៍គឺមានទីតាំងស្ថិតនៅពីខាងក្នុងអគារនៃសេតវិមាន។ វាគឺជាបន្ទប់ដែលរៀបចំឡើងដើម្បីធ្វើទំនាក់ទំនង និងស៊ើបការណ៍សំងាត់ដែលមានសុវត្ថិភាពបំផុត។បន្ទប់នេះស្ថិតនៅក្រោមដីនៅផ្នែក West Wingនៃអគារ ដោយមានទំហំប្រមាណជា ៥០០០ហ្វីតការ៉េ ឬប្រហែលជា ៤៦០ម៉ែត្រការ៉េ ដែលនៅខាងក្នុងនោះមានទាំងបន្ទប់សម្រាប់ប្រជុំ និងឃ្លាំមើល ដែលប្រើសម្រាប់ត្រួតពិនិត្យវិបត្តិ និងធ្វើការទំនាក់ទំនងប្រកបដោយសុវត្ថិភាពសម្រាប់ប្រធានាធិបតី ក្រុមមន្ត្រីកំពូល ព្រមទាំងក្រុមទីប្រឹក្សាជាន់ខ្ពស់។
គោលបំណងសំខាន់បំផុតនៃបន្ទប់ស្ថានការណ៍គឺប្រើប្រាស់សម្រាប់បម្រើជាមជ្ឈមណ្ឌលផ្តល់សញ្ញាអាសន្នកម្រិតខ្ពស់ និងឃ្លាំមើល ២៤ម៉ោងក្នុងមួយថ្ងៃ និង៧ថ្ងៃក្នុងមួយសប្តាហ៍។ វាអនុញ្ញាតឲ្យប្រធានាធិបតី ទីប្រឹក្សាសន្តិសុខជាតិ និងបុគ្គលិកសំខាន់ៗផ្សេងទៀតនូវព័ត៌មានប្រចាំថ្ងៃ និងព័ត៌មានទាន់ហេតុការណ៍ ដើម្បីផ្តល់ភាពងាយស្រួលក្នុងការបង្កើត និងអនុវត្តគោលនយោបាយសន្តិសុខជាតិ។
បន្ទប់ Situation Room ត្រូវបានបង្កើតឡើងដំបូងតាំងពីក្នុងឆ្នាំ១៩៦១ ដោយប្រធានាធិបតី John F. Kennedy បន្ទាប់ពីព្រឹត្តិការណ៍លុកលុយដែលស្គាល់ថា Bay of Pigs។ ដំបូងឡើយ វាត្រូវបានប្រើប្រាស់ជាទីតាំងដើម្បីផ្តល់ការទំនាក់ទំនងប្រកបដោយសុវត្ថិភាពអំពីស្ថានការណ៍ និងការស៊ើបការណ៍សម្ងាត់ជាមួយនឹងសេតវិមាន។ ក្រៅពីនេះ បច្ចេកវិទ្យាទំនើបៗជាច្រើនទៀតត្រូវបានបំពាក់ពីខាងក្នុងផងដែររួមទាំងបច្ចេកវិទ្យាទំនាក់ទនងតាមវីដេអូ ដែលមានសន្តិសុខកម្រិតខ្ពស់បំផុត អនុញ្ញាតឲ្យមេដឹកនាំអាម៉េរិកទូរស័ព្ទទាក់ទងជាមួយនឹងមេដឹកនាំទាំងអស់លើពិភពលោកបានគ្រប់ពេលប្រកបដោយសុវត្ថិភាព និងលាក់ការណ៍បំផុត។
យ៉ាងណាក្តី អាយុកាលជាង៦០ឆ្នាំមកហើយ បន្ទប់ Situation Room នេះត្រូវបានដាក់ឲ្យមានការជួសជុលឡើងវិញជាច្រើនដង ហើយចុងក្រោយបំផុតគឺកាលពីឆ្នាំ២០២៣កន្លងទៅនេះ ជាមួយនឹងកញ្ចប់ថវិកាប្រើប្រាស់ប្រមាណជា ៥០លានដុល្លារ។ ការរៀបចំចុងក្រោយនេះ អាម៉េរិកបានបំពាក់បច្ចេកវិទ្យាកាន់តែទំនើបៗ ថ្មីៗ ជាច្រើនផ្សេងទៀត ដែលអាចធានាបាននូវសុវត្ថិភាព និងសន្តិសុខដល់កម្រិតកំពូលសម្រាប់ក្រុមមេដឹកនាំអាម៉េរិកបំពេញកិច្ចការងារជូនជាតិ៕
Account
Security
Favourite Content