ហេតុផលចម្បងដែលជំរុញឱ្យខ្ញុំបង្កើតហត្ថានារីឡើង គឺដោយសារមើលឃើញពីបញ្ហារបស់បងប្អូនប្រជាកសិករមួយចំនួនមិនមានទីផ្សារបញ្ចេញកសិផល គាប់ជួនខ្ញុំមានជំនាញផ្នែកគីមីចំណីអាហារស្រាប់ផង ក៏មានគំនិតបង្កើតនូវអ្វីដែលជះផលវិជ្ជមានដល់ការរស់នៅ ជាពិសេសរួមចំណែកជួយដល់កសិករផង និងជួយដល់ជីវភាពបងប្អូនស្ត្រីនៅជនបទដែលជាកម្លាំងផលិតផងដែរ។ នេះជាអ្វីដែលកញ្ញា ភាព សុថុន ស្ថាបនិក ហត្ថានារី បានលើកឡើង ។

ហត្ថានារី ជាអាជីវកម្មមួយផ្ដោតលើការផលិតសម្ភារៈប្រើប្រាស់ប្រចាំថ្ងៃ និងផលិតផលបែបធម្មជាតិ មិនប៉ះពាល់ដល់សុខភាពអ្នកប្រើប្រាស់ និងបរិស្ថាននោះឡើយ ដូចជា ប្រភេទតែធម្មជាតិមាន៩រសជាតិ, ទៀនក្រអូប, ក្រមួនជំនួយដំណេក និងគ្រីមការពារមូសខាំ ដែលជាប្រភេទផលិតផលផ្តល់ប្រយោជន៍ និងជំនួយដល់សុខភាព (healing) ហើយចំពោះវត្ថុធាតុដើមទៀតសោត គឺប្រមូលទិញពីកសិករក្នុងស្រុក ទាំងប្រភេទជាដំណាំ និងជាទិន្នផលរុក្ខជាតិតាមរដូវកាលមកកែច្នៃចេញជាផលិតផល។ បន្ថែមពីនេះ អ្វីដែលកាន់តែចាប់អារម្មណ៍ទៀតនោះ គឺរាល់ផលិតផលត្រូវបានដាក់លក់ទាំងអស់ សុទ្ធតែផលិតឡើងដោយស្ត្រីនៅជនបទ ដែលជាការរួមចំណែកលើកកម្ពស់ជីវភាពដល់សហគមន៍ផងដែរ។

កញ្ញា ភាព សុថុន ដែលជាស្ថាបនិក ហត្ថានារី មានទីតាំងស្ថិតនៅសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ បានប្រាប់ AMS Economy ថា ៖ តាមការកត់សម្គាល់ ផលិតផលដែលមាននៅក្នុងហាង ហត្ថានារី គឺមានការគាំទ្រពីសំណាក់អតិថិជនស្ទើរស្មើៗគ្នា តែផលិតផលដែលគេពេញនិយមជាងគេរួមមានដូចជា តែធម្មជាតិ ៩ រសជាតិ, ទៀនក្រអូប និងសម្ភារប្រើប្រាស់ផ្សេងទៀត ដូចជា ដបទឹក និងប្រភេទកាបូបជាដើម ដែលសុទ្ធសឹងត្រូវបានផលិតឡើងដោយបងប្អូនជាស្ត្រីមេផ្ទះ ស្ត្រីពិការ និងស្ត្រីម៉េម៉ាយនៅតាមបណ្តាខេត្ត ដូចជានៅ ខេត្តសៀមរាប បាត់ដំបង បន្ទាយមានជ័យ កំពត និងភ្នំពេញ ហើយដំណើរការនៃសង្វាក់ផលិតកម្មទាំងអស់ គឺធ្វើឡើងដោយដៃទាំងស្រុង រាប់ទាំងការផលិត ការរចនានៅលើសម្បកកញ្ចប់ និងការវេចខ្ចប់គឺមិនប៉ះពាល់ដល់បរិស្ថាននោះទេ។

កញ្ញាបានបញ្ជាក់ថា​៖

«ចំពោះអតិថិជនរបស់ហត្ថានារី ភាគច្រើនជាមនុស្សស្រី មានវ័យចាប់ពី ២០-៣៥ឆ្នាំ ដែលនិយមប្រើប្រាស់ផលិតផលសុខភាព ទាំងនិស្សិត និងអ្នកធ្វើការ។ ដោយឡែក សម្រាប់ផលិតផលដែលហត្ថានារីផ្ដោតសំខាន់គឺប្រភេទទៀនក្រអូប ដែលមាន១២ក្លិន ផ្សំឡើងពីវត្ថុធាតុដើមក្នុងស្រុក ក៏ដូចជា គ្រីមធម្មជាតិ ដូចជា គ្រីមការពារមូសខាំ គ្រីមជំនួយដំណេក និងគ្រីមលាបនៅពេលឈឺក្បាល។ ចំណែកឯប្រភេទតែវិញ គឺមាន ៩រសជាតិ មានដូចជា តែរមៀត តែខ្ញី និងតែស្លឹកគ្រៃលាយស្លឹកក្រូច និងរំដេង តែផ្កាអមតៈ តែស្លឹកតើយ តែផ្កាឡេវអាវ តែម្ជូរព្រឹក និងតែព្នៅជាដើម»។

សូមជម្រាបដែរថា កញ្ញា ភាព សុថុន បានបង្កើតអាជីវកម្មនេះឡើងនៅអំឡុងឆ្នាំ២០១៩ ដោយប្រើដើមទុនតិចតួច ដោយសារខ្លួននៅកំពុងរៀនផង និងធ្វើការងារ freelance នៅឡើយ។ អ្វីដែលកញ្ញាចងចាំនោះគឺមានលុយត្រឹម​ ១៦ដុល្លារដើម្បីទិញវត្ថុធាតុដើមក្នុងការផលិតតែរុក្ខជាតិ ហើយបានដាក់លក់ជាលក្ខណៈ refill store នៅក្រុមហ៊ុន ហើយក្រោយមក ដោយមានការគាំទ្រច្រើនពីបងប្អូនដែលជាអតិថិជន ទាំងខ្មែរ និងបរទេស ទើបអាចលទ្ធភាពបង្វិលដើមទុនដើម្បីផលិតបន្ថែម និងទិញសម្ភារសម្រាប់វេចខ្ចប់ ជាមួយនឹងការបង្កើតជាយីហោផ្ទាល់ខ្លួនឯងរហូតដល់សព្វថ្ងៃនេះ។

កញ្ញា ភាព សុថុន ក៏បានបង្ហាញពីក្ដីស្រមៃរបស់ខ្លួននៅថ្ងៃអនាគតផងដែរ ពោលគឺចង់ពង្រីកការផលិត និងកែច្នៃផលិតផលពីរុក្ខជាតិនេះឱ្យកាន់តែធំ ដែលអាចជួយដល់ស្ត្រីជាអ្នកផលិតបានកាន់តែច្រើន និងមានផលិតផលធម្មជាតិច្រើនមុខដើម្បីដាកើលក់ អាចជួយសម្រួលដល់ការរស់នៅប្រចាំថ្ងៃរបស់ប្រជាជនទូទៅ ហើយក៏អាចចូលរួមចំណែកថែរក្សាបរិស្ថានផងដែរ៕