សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាធម្មតា ការប្រកបរបរអាជីវកម្ម ឬនិយាយសាមញ្ញថា ការរកស៊ីរមែងតែងជួបប្រទះនូវបញ្ហាជាច្រើន ពិសេសប្រភពទុន ប៉ុន្តែបើប្រើប្រាស់កម្ចីពីច្រើនប្រភពនោះ វាអាចធ្វើឱ្យម្ចាស់អាជីវកម្មធ្លាក់ចូលទៅក្នុងបំណុលច្រើនលើសលប់ និងពិបាកក្នុងការដោះស្រាយ។ ដូច្នេះហើយ អ្នកជំនាញសេដ្ឋកិច្ច និងហិរញ្ញវត្ថុ លោក ង៉ែត ជូ បានលើកឡើងពីមូលហេតុចម្បងចំនួន ៦ ដែលនាំឱ្យបំណុលមានបំណុលច្រើនលើសលប់ ហើយម្ចាស់អាជីវកម្ម ឬអ្នករកស៊ីគួរចៀសវាងចំណុចទាំង ៦ នេះ ដើម្បីកុំឱ្យធ្លាក់ចូលក្នុងអន្ទាក់បំណុល។
លោក ង៉ែត ជូ បានលើកឡើងថា ក្រៅពីការធ្លាក់ចុះនៃចំណូលដោយសារបញ្ហាសេដ្ឋកិច្ច ឬការគ្រប់គ្រងអាជីវកម្មមិនបានល្អ មូលហេតុចម្បងៗដែលនាំឱ្យបំណុលមានបញ្ហាគឺ៖
១) ការប្រើប្រាស់បំណុលមិនចំគោលដៅក្នុងការបង្កើនចំណូល។
២) ការប្រើបំណុលដែលមានថ្លៃដើមខ្ពស់ (រួមទាំងការប្រាក់ និងកំរៃសេវាដទៃទៀត)។
៣) ការខ្ចីបុលពីច្រើនប្រភព ជាពិសេសកម្ចីក្រៅផ្លូវការ (រួមបញ្ចូលទាំងតុងទីន និងការទិញផ្ទះបង់រំលស់ជាមួយបុរី)។
៤) ការប្រើបំណុលរយៈពេលខ្លីដើម្បីវិនិយោគរយៈពេលវែង។
៥) ការខ្ចីបុលច្រើនហួសលទ្ធភាពសង។
៦) មិនបានកត់ត្រា ឬគ្រប់គ្រងចំណូល-ចំណាយឱ្យបានច្បាស់លាស់។
ដើម្បីចៀសវាងបំណុលច្រើនលើសលប់ លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជា បានណែនាំថា អតិថិជនត្រូវរៀបចំផែនការណ៍ឱ្យបានច្បាស់ និងប្រើប្រាស់កម្ចីអោយត្រូវតាមគោលដៅ ដើម្បីធានាបាននូវជោគជ័យក្នុងការប្រើប្រាស់ឥណទាន (កម្ចី)។ លោកបានថ្លែងថា កម្ចីត្រូវតាមគោលដៅ គឺជាការប្រើប្រាស់ឱ្យត្រូវតាមផែនការណ៍ដែលបានគ្រោងទុក ដូចជាយកទៅបង្កើតមុខរប ពង្រីកមុខរប ឬទិញសំភារៈចាំបាច់ណាមួយក្នុងគោលបំណងបង្កើនប្រាក់ចំណូល ឬកាត់បន្ថយការចំណាយ។ ការប្រើប្រាស់កម្ចីត្រូវតាមគោលដៅ នឹងជួយឱ្យអតិថិជនបង្កើនប្រាក់ចំណូល លើកកម្ពស់ជីវភាពគ្រួសារ ជំរុញកំណើនសេដ្ឋកិច្ចជាតិ ក៏ដូចជាការកាត់បន្ថយភាពក្រីក្រ៕
Account
Security
Favourite Content