បរទេស ៖ អឺរ៉ុប ទីបំផុតបានសម្រេចចិត្តអនុវត្តនូវការតម្លើងពន្ធនាំចូលរថយន្តអគ្គិសនីរបស់ចិនហើយកាលពីថ្ងៃព្រហស្បត៍សប្តាហ៍នេះទោះបីជាមានការពិភាក្សាចរចាគ្នាជាច្រើនដងកន្លងមកក្តី។

ទោះបីជាយ៉ាងណាក៏ដោយ មេដឹកនាំចិន លោក Xin Jinping ហាក់ដូចជាមិនប្រតិកម្មខ្លាំងទៅនឹងគោលការណ៍ថ្មីរបស់អឺរ៉ុបឡើយ ហើយមិនត្រឹមតែប៉ុណ្ណោះ លោកថែមទាំងបានផ្ញើសារអបអរទៅដល់មេដឹកនាំសហភាពអឺរ៉ុបថ្មី គឺលោកប្រធានក្រុមប្រឹក្សាអឺរ៉ុប Antonio Costa ទៀតផង ហើយមេដឹកនាំចិនរូបនេះបានរំលេចនូវអ្វីដែលជាសារៈសំខាន់នៃទំនាក់ទំនងរវាងអឺរ៉ុប-ចិនផងដែរ។

សកម្មភាពចុងក្រោយរបស់អឺរ៉ុបនេះត្រូវបានគេមើលឃើញ និងអាចសមល្មមក្នុងការប្រកាសសង្គ្រាមពន្ធគយរវាងមហាយក្សទាំងពីរដែលភាគីទាំងសងខាងសុទ្ធតែមានទំហំសេដ្ឋកិច្ចធំប្រហាក់ប្រហែលគ្នា ខណៈដែលចិនគិតត្រឹមឆ្នាំ២០២២ មាន GDP ប្រមាណជា ១៧,៩៦ទ្រីលានដុល្លារ ចំណែកឯអឺរ៉ុបសរុបចូលគ្នាមានដល់ទៅ ១៨,៩៨ទ្រីលានដុល្លារ។

រំលឹកដែរថា គោលនយោបាយពាណិជ្ជកម្មថ្មីនេះ សហភាពអឺរ៉ុបធ្វើឡើងក្រោយពេលដែលខ្លួនបានបង្ហាញនូវការព្រួយបារម្ភខ្លាំងទៅលើផលិតផលតម្លៃធូរថ្លៃរបស់ចិនថានឹងអាចហូរចូលក្នុងទីផ្សារអឺរ៉ុបកាន់តែច្រើន និងអាចធ្វើឲ្យមានផលប៉ះពាល់ដល់អ្នកផលិតនៅអឺរ៉ុបទៅវិញ និងក្នុងពេលដែលបណ្តាក្រុមហ៊ុនចិនក្នុងស្រុកកំពុងពង្រឹងខ្លាំងទៅលើការនាំចេញទៅទីផ្សារបរទេសដោយសារតែតំរូវការក្នុងស្រុកធ្លាក់ចុះខ្លាំងគួរឲ្យបារម្ភ។

ទោះបីជាយ៉ាងណាក្តី ការអនុវត្តទើបតែបានចាប់ផ្តើម ប៉ុន្តែគេសង្កេតឃើញថាស្ថានភាពប្រឈមមុខដាក់គ្នានេះហាក់ដូចជាកាន់តែស្មុគ្រស្មាញរួចទៅហើយ និងមិនមានភាពប្រាកដប្រជានៅឡើយទេ ដោយសារតែសមាជិកអឺរ៉ុបសំខាន់ៗមួយចំនួនបានបង្ហាញអំពីការមិនគាំទ្រទៅនឹងការតម្លើងពន្ធរបស់អឺរ៉ុបនោះឡើយ។

អាល្លឺម៉ង់ ដែលជាអ្នកនាំចេញរថយន្តធំជាងគេមួយទៅក្នុងទីផ្សារចិនកាលពីឆ្នាំទៅបានចាប់យកចំណែកទីផ្សារដ៏ធំរបស់មហាយក្សអាស៊ីនេះ ឬប្រមាណជា ១ភាគ៣នៃការនាំចេញរថយន្តសរុបរបស់ខ្លួនគឺជាអ្នកមិនគាំទ្រខ្លាំងជាងគេចំពោះគោលការណ៍តតម្លើងពន្ធរបស់អឺរ៉ុបលើរថយន្តអគ្គិសនីចិន និងបានស្នើសុំឲ្យបញ្ឈប់ការងារនេះផងដែរ ហើយតាមពីក្រោយដោយបារាំងដែលជាអ្នកគាំទ្រជំហដូចគ្នានេះ។

យឺហោម៉ាករបស់អឺរ៉ុបស្ទើរតែទាំងអស់កាលពីឆ្នាំទៅមានប្រភពពីបារាំង ដែលអាចនាំចូលទីផ្សារចិនបានក្នុងគ្រាដែលរដ្ឋាភិបាលក្រុងប៉េកាំងកំពុងដំណើរការយុទ្ធនាការប្រយុទ្ធប្រឆាំងទៅនឹងទំនិញមិនស្មើភាពទីផ្សារ ឬហៅថា Anti-dumping ក្នុងគោលដៅសំខាន់ទៅលើគ្រប់ប្រភេទទំនិញរបស់អឺរ៉ុបទាំងអស់ដែលនាំចូលមកចិន។

មិនត្រឹមតែប៉ុណ្ណោះ ចិនក៏កំពុងបើកការស៊ើបអង្កេតដើម្បីអនុវត្តច្បាប់ Anti-Dumping ទៅលើផលិតផលនាំចូលរបស់អឺរ៉ុប ដូចជា សាច់ជ្រូក និងផលិតផលមួយចំនួនទៀតផងដែរក្នុងគោលបំណងដាក់សំពាធទៅលើប្រទេសអេស៉្បាញ ហូឡង់ និងដាណឺម៉ាក ដើម្បីឲ្យពួកគេធ្វើការផ្លាស់ប្តូរចិត្តចំពោះគោលការណ៍តម្លើងពន្ធរបស់អឺរ៉ុបមកលើរថយន្តអគ្គិសនីចិន។

យ៉ាងណាក៏ដោយ ការសម្រេចចិត្តបានធ្វើរួចទៅហើយ ប៉ុន្តែប្រធានក្រុមប្រឹក្សាអឺរ៉ុបថ្មី លោក Costa អតីតនាយរដ្ឋមន្ត្រីប៉ទុយហ្គាល់ នឹងអាចរៀបចំការពិភាក្សាគ្នាឡើងវិញដើម្បីដោះស្រាយបញ្ហាជម្លោះនេះ បើមិនដូច្នេះទេ រថយន្តអគ្គិសនីចិននៅពេលនេះនឹងចាប់ផ្តើមឡើងតម្លៃថ្មីរហូតទៅដល់ ៣៧,៦ភាគរយទៀតជាមិនខាន បន្ថែមពីលើតម្លៃនាំចូល និងតម្លៃពន្ធនានាមុនចូលទៅដល់ទីផ្សារអឺរ៉ុប៕