សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
Royal Sweet Pineapple ជាឈ្មោះកសិដ្ឋានមួយស្ថិតនៅស្រុកសៀមបូក ខេត្តស្ទឹងត្រែង ដែលកំពុងដាំម្នាស់ទឹកឃ្មុំ និងកែច្នៃជាផលិតផលទឹកម្នាស់ដ៏មានប្រជាប្រិយភាព។ ដោយឡែកកាលពីពេលកន្លងទៅថ្មីៗនេះ កសិដ្ឋានដែលស្ថិតប៉ែកឦសានមួយនេះបានកែច្នៃផលិតចេញជាផលិតផលថ្មីមួយទៀត គឺស្រាម្នាស់ដែលមានរសជាតិឆ្ងាញ់ ប្លែក និងកំពុងទទួលបានកាគាំទ្រខ្លាំងនៅលើទីផ្សារ។
លោក សាយ ពន្លឺចិត្តៈករុណា ដែលជាម្ចាស់កសិដ្ឋានខាងលើនេះបានមានប្រសាសន៍ប្រាប់ AMS ថា សម្រាប់ផលិតផលថ្មីរបស់សិប្បកម្មក្រោមចំណុះកសិដ្ឋាន Royal Sweet Pineapple គឺជាប្រភេទស្រាម្នាស់ដោយបានចាប់ដំណើរការផលិតបានប្រមាណ១ម៉ឺនដប ស្ថិតនៅក្នុងដំណាក់កាលសាកល្បង ដើម្បីស្ទាប់ស្ទង់មើលទីផ្សារ ហើយជាលទ្ធផលឃើញថាមានការគាំទ្រច្រើនពីសំណាក់អតិថិជនក្នុងស្រុក ក៏ដូចជាជនបរទេសគួរឱ្យកត់សម្គាល់។
លោកបានបញ្ជាក់ថា ៖
“សម្រាប់សម្ថភាពផលិតរបស់យើស គឺអាចបានប្រមាណ ១-២ម៉ឺនដប ដែលយើងបានចាប់ផ្ដើមផលិតប្រមាណ ៣ខែហើយឃើញថា ទីផ្សាររបស់យើងមានទាំងលក់នៅទីតាំងផ្ទាល់ និងតាមអនឡាញ ដែលបងប្អូនភាគច្រើនរស់នៅរាជធានីភ្នំពេញ ខេត្តស្ទឹងត្រែង និងខេត្តសៀមរាប ហើយក៏មានទាំងឈ្មួញយកទៅលក់បន្តនៅតាមតំបន់ទេសចរណ៍នានាផងដែរ”
ពាក់ព័ន្ធទៅនឹងចំណុះនៃការវេចខ្ចប់ ក៏ដូចជាតម្លៃលក់នៅលើទីផ្សារត្រូវបានម្ចាស់កសិដ្ឋានរូបនេះប្រាប់ឱ្យដឹងថា សម្រាប់ស្រាម្នាស់នេះមានចំណុះ ៧៥០មីលីលីត្រ លក់ក្នុងតម្លៃ ១០ដុល្លារ ហើយលក្ខណៈពិសេសវិញ គឺវាមានរសជាតិជូរអែមឆ្ងាញ់ ឈ្ងុយក្លិនម្នាស់ សូម្បីតែមេស្រាក៏ផលិតដោយកសិដ្ឋានខ្លួនឯងផ្ទាល់ ពោលគឺចម្រាញ់ចេញពីផ្លែម្នាស់ទឹកឃ្មុំស្រស់សុទ្ធ ១០០% ដោយធ្វើការបន្ទំរយៈពេល ៦ខែ ទើបទទួលបានស្រាផ្លែឈើប្រភេទនេះ។ ដោយឡែក សម្រាប់អ្នកទទួលទានវិញ អាចទទួលទានបានទាំងបុរស ទាំងនារី ទទួលទានមិនធ្វើទុក្ខ ដោយសារវាត្រូវបានផលិតឡើងប្រកបដោយគុណភាព និងមានបច្ចេកទេសត្រឹមត្រូវ ។
នៅក្នុងឱកាសនៃការផ្តល់ព័ត៌មានពីផលិតផលថ្មីក្នុងស្រុកខាងលើនេះ លោក សាយ ពន្លឺចិត្តៈករុណា ក៏បានបង្ហើបប្រាប់ឱ្យដឹងផងដែរថា នៅថ្ងៃអនាគត់លោកចង់បង្កើនការផលិត និងពង្រីកទីផ្សារនៅគ្រប់បណ្តាខេត្ត/ក្រុងទូទាំងប្រទេស និងដាក់លក់នៅតាមបណ្ដាលផ្សារទំនើបនានា ជាពិសេសគឺអាចនាំចេញទៅកាន់ទីផ្សារក្រៅប្រទេសថែមទៀតផង។
គួរបញ្ជាក់ដែរថា បច្ចុប្បន្នតម្រូវការទីផ្សារផ្លែម្នាស់ស្រស់កំពុងមានការកើនឡើងខ្លាំងដល់ទៅ ២-៣ តោនក្នុងមួយថ្ងៃ ប៉ុន្តែលទ្ធភាពជាក់ស្ដែងទិន្នផលម្នាស់របស់កសិដ្ឋានខាងលើអាចផ្គត់ផ្គង់បានត្រឹមតែ ៧០០គីឡូក្រាម ទៅ ១តោនប៉ុណ្ណោះក្នុងមួយថ្ងៃ ហើយខាងកសិដ្ឋានក៏កំពុងសម្រុកដាំដើមម្នាស់បន្ថែមប្រមាណជាង ១លានដើមទៀត ដើម្បីបំពេញឱ្យទាន់តម្រូវការទីផ្សារទាំងម្នាស់ស្រស់ ទាំងទឹកម្នាស់ និងស្រាម្នាស់ដែលជាផលិតផលថ្មីផងដែរ៕
Account
Security
Favourite Content