ភ្នំពេញ ៖ ស្ថានទូតឥណ្ឌានៅកម្ពុជា រួមជាមួយសមាគមអាជីវកម្មឥណ្ឌានៅកម្ពុជា (IBCC) បានរៀបចំព្រឹត្តិការណ៍ជួបជុំ និងពិភាក្សា រវាងអ្នកជំនួញភាគីឥណ្ឌា និងកម្ពុជា ក្នុងវិស័យឱសថ ដើម្បីជំរុញកិច្ចសហការ និងភាពជាដៃគូរវាងប្រទេសទាំងពីរ ។ ព្រឹត្តិការណ៍នេះត្រូវបានធ្វើឡើង​កាលពីថ្ងៃទី១១ វិច្ឆិកា ២០២៥ ដោយមានអ្នកចូលរួមជាង ១៨០ នាក់ ព្រមទាំងតំណាងពីក្រុមហ៊ុនឱសថឥណ្ឌាជាង ៥០ ដែលកំពុងដំណើរការនៅកម្ពុជា រួមជាមួយតំណាងពីមន្ទីរពេទ្យរដ្ឋ និងឯកជនជាច្រើន ។

លោក Shravan Rao ក្រុមប្រឹក្សាភិបាលនៃសមាគមអាជីវកម្មឥណ្ឌានៅកម្ពុជា បានលើកឡើងថា ប្រទេសឥណ្ឌាកំពុងក្លាយជាមជ្ឈមណ្ឌលសំខាន់មួយនៃផលិតផលឱសថមានគុណភាព និងតម្លៃសមរម្យ ហើយមានឱកាសធំសម្រាប់កិច្ចសហការជាមួយកម្ពុជា។

ឯកឧត្តមបណ្ឌិត សុខ ជួរ ទីប្រឹក្សា​ក្រសួងសុខាភិបាល និងជាអគ្គនាយករងនៃអគ្គនាយក​ដ្ឋានសុខភាព ក្រសួងសុខាភិបាល បានបញ្ជាក់ថា រដ្ឋាភិបាលកម្ពុជាបានប្តេជ្ញាបន្តពង្រឹងប្រព័ន្ធសុខាភិបាល និងធានាឱ្យមានឱសថគុណភាពល្អសម្រាប់ប្រជាពលរដ្ឋ ។

ក្នុងនោះដែរ​ លោក សុខ សុវិទ្យា អគ្គនាយកនៃអគ្គនាយកដ្ឋានសារពើពន្ធ និងអាករ បានលើកឡើងអំពីវិធានការសម្រួល និងការសហការផ្នែកច្បាប់ ដើម្បីជំរុញការនាំចេញនាំចូលផលិតផលឱសថ និងសុខាភិបាលឱ្យបាន​កាន់តែងាយស្រួល។

នៅក្នុង​ឱកាស​នោះដែរ ក្រុមហ៊ុនឱសថឥណ្ឌាចំនួន ៣ក្រុមហ៊ុនបានធ្វើបទបង្ហាញអំពីនិន្នាការ និងឱកាសក្នុងវិស័យឱសថឥណ្ឌា ជាពិសេស ផលិតផលអាហារបំប៉ន ខណៈដែលប្រទេសឥណ្ឌាជាអ្នកនាំមុខគេក្នុងការផលិត និងនាំចេញឱសថ ដោយ​មានក្រុមហ៊ុនជាង ៣ ០០០ និងរោងចក្រជាង ១ម៉ឺន​ ផលិត​ឱសថជាង ៦ម៉ឺន​ប្រភេទ។

បើតាម​ស្ថានទូត​ឥណ្ឌា​ប្រចាំកម្ពុជា​បានឱ្យដឹងថា ឧស្សាហកម្មឱសថឥណ្ឌាមានតម្លៃប្រមាណ ៥០ពាន់លានដុល្លារអាមេរិកក្នុងឆ្នាំ ២០២៣ និង​២០២៤ ហើយការនាំចេញបានកើនដល់ជាង ៣០ ពាន់លានដុល្លារ ក្នុងឆ្នាំបន្ទាប់ ។ ឥណ្ឌាផ្គត់ផ្គង់ជាង ៦០ភាគរយ នៃតម្រូវការវ៉ាក់សាំងសកល និងបានផ្គត់ផ្គង់វ៉ាក់សាំងទៅជាង ១០០ ប្រទេសក្នុងអំឡុងជំងឺរាតត្បាត COVID-19 តាមគម្រោង “Vaccine Maitri” ។

សូមជម្រាបថា សម្រាប់​ព្រឹត្តិការណ៍ជំនួបរវាង​អ្នកជំនួញក្នុងវិស័យ​ឱសថ នៅប្រទេសកម្ពុជា ​និង​ឥណ្ឌា បានផ្តល់ឱកាសដល់ក្រុមហ៊ុនឱសថឥណ្ឌា និងក្រុមហ៊ុននាំចូលឱសថកម្ពុជា ដើម្បីស្វែងរកឱកាសសហការក្នុងការធានាឱ្យមានឱសថគុណភាព និងតម្លៃសមរម្យសម្រាប់ប្រជាជនកម្ពុជា ព្រមទាំងជំរុញពាណិជ្ជកម្មរវាងប្រទេសទាំងពីរឲ្យកាន់តែល្អប្រសើរ​ ៕