សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមទិន្នន័យពីនិយ័តករធានារ៉ាប់រងកម្ពុជា នៅក្នុងឆ្នាំ២០២៣ ភាគទានធានារ៉ាប់រងក្នុងសេដ្ឋកិច្ចមានចំនួន ១.១៦% ជាមួយនឹងដង់ស៊ីតេធានារ៉ាប់រងចំនួន ២១ដុល្លារ ក្នុងប្រជាជនម្នាក់។ ជាមួយនឹងទិន្នន័យនេះ និយ័តករបានលើកទិសដៅសម្រាប់ឆ្នាំ២០៣០ ដោយធ្វើយ៉ាងណាឱ្យភាគទានធានារ៉ាប់រងទៅក្នុងសេដ្ឋកិច្ចមានរហូតទៅដល់ ៥.៥% ព្រមទាំងដង់ស៊ីតេធានារ៉ាប់រងចំនួន ១៣៥ដុល្លារអាមេរិកក្នុងប្រជាជនម្នាក់។ យ៉ាងណាក៏ដោយ ដើម្បីសម្រេចបាននូវគោលដៅនេះ ការកសាងទំនុកចិត្តនៅក្នុងទីផ្សារគឺជាការងារចាំបាច់បំផុត ហើយដើម្បីអាចកសាងទំនុកចិត្តសាធារណៈជនបាន ចាំបាច់ត្រូវពង្រឹងវិស័យធានារ៉ាប់រងទាំងមូលជាមុនសិន។
ទាក់ទិននឹងចំណុចខាងលើនេះ លោក ទូច ម៉េងឡេង ប្រធាននាយកដ្ឋានអភិវឌ្ឍន៍ទីផ្សារនៃនិយ័តករធានារ៉ាប់រងកម្ពុជា បានឱ្យដឹងថា ក្នុងនាមជាអាជ្ញាធរដែលគ្រប់គ្រងលើក្រុមហ៊ុនធានារ៉ាប់រង និយ័តករបានខិតខំធ្វើយ៉ាងណាឱ្យក្រុមហ៊ុនទាំងនោះគោរពតាមអ្វីដែលជាបទបញ្ញត្តិរួមមួយ។
លោកបានបន្តឱ្យដឹងទៀតថា និយ័តករធានារ៉ាប់រងមានតួនាទីត្រួតពិនិត្យលើក្រុមហ៊ុនធានារ៉ាប់រង ទៅលើប្រភពទុនអាជីវកម្មរបស់ពួកគេមុននឹងប្រគល់អាជ្ញាបណ្ណ ដើម្បីបញ្ចៀសឱ្យបាននូវករណីលាងលុយកខ្វក់។
លោក ទូច ម៉េងឡេង បន្តឱ្យដឹងទៀតថា៖
«សំខាន់បំផុត គឺនិយ័តករពិនិត្យមើលទៅលើគោលដៅនៃការប្រើប្រាស់ថវិកាដែលប្រមូលបានពីអតិថិជនទិញធានារ៉ាប់រង។ ដូច្នេះនិយ័តករមានតួនាទីត្រួតពិនិត្យ និងតាមដានជាប្រចាំទៅលើប្រាក់ទាំងនោះ។»
និយ័តករធានារ៉ាប់រងមានបទបញ្ញត្តិឱ្យក្រុមហ៊ុនធានារ៉ាប់រងទាំងអស់នៅកម្ពុជា រក្សាទុកថវិកាដែលបានពីអតិថិជននៅកន្លែងណាមួយដែលមានសុវត្ថិភាព។ មិនត្រឹមតែប៉ុណ្ណោះ ក្រុមហ៊ុនក៏មានកាតព្វកិច្ចផ្ញើរបាយការណ៍សាច់ប្រាក់ទៅកាន់និយ័តករជាទៀងទាត់ផងដែរ។ លើសពីនេះទៅទៀត ក្រុមហ៊ុនធានារ៉ាប់រងទាំងអស់នឹងតម្រូវឱ្យធ្វើសវនកម្មជារៀងរាល់ឆ្នាំ បន្ទាប់មកនិយ័តករនឹងយករបាយការណ៍សវនកម្មនោះទៅវាយតម្លៃអំពីកម្រិតហានិភ័យទៅលើក្រុមហ៊ុននីមួយៗ។
បើតាមអ្នកជំនាញខាងលើ ក្រុមហ៊ុនធានារ៉ាប់រងក៏តម្រូវឱ្យផ្សព្វផ្សាយជាសាធារណៈនូវរបាយការណ៍ដែលប្រមូលបានប្រាក់របស់ពួកគេផងដែរ។ ក្រៅពីនេះ និយ័តករក៏កំពុងធ្វើការងារសំខាន់ៗចំនួន៣ផ្សេងទៀតផងដែរ ដើម្បីបង្កើនទំនុកចិត្តសាធារណជន នោះគឺកិច្ចការពារអតិថិជនក្នុងករណីដែលពួកគេមានបញ្ហាជាមួយក្រុមហ៊ុនធានារ៉ាប់រង បន្ថែមការបណ្ដុះបណ្ដាលវិជ្ជាជីវៈដើម្បីពង្រឹងធនធានមនុស្សក្នុងវិស័យធានារ៉ាប់រង និងចុងក្រោយគឺបង្កើនការផ្សព្វផ្សាយអប់រំទៅលើចំណេះដឹងទូទៅពីវិស័យធានារ៉ាប់រង៕
Account
Security
Favourite Content