កោះកុង ៖ គ្រំចំពុះទា ជាអាហារសមុទ្រប្រចាំទឹកដីកោះកុង និងជាប្រភពចំណូលយ៉ាងសំខាន់សម្រាប់ប្រជាសហគមន៍នៅទីនោះផងដែរ ដោយជារៀងរាល់ឆ្នាំ គ្រំចំពុះទាតែងត្រូវបាននាំចេញទៅតាមទីផ្សារនានា (ទាំងក្នុងស្រុក និងក្រៅស្រុក) ដែលពេញនិយមទទួលទានគ្រំប្រភេទនេះ។ ដោយឡែក សម្រាប់តែសហគមន៍មួយក្នុងចំណោមសហគមន៍ផ្សេងទៀតនៃខេត្តកោះកុង គឺសហគមន៍ពាមក្រសោបបានចាប់ផ្ដើមនូវរបរចិញ្ចឹមគ្រំចំពុះទា តាំងតែពីឆ្នាំ១៩៩៣មកម្លេះ ហើយការចិញ្ចឹមនេះទៀតសោត ត្រូវបានប្រជាសហគមន៍ចាត់ទុកថាជាមុខរបរសំខាន់មួយប្រៀបបានទៅនឹងការធ្វើស្រែយ៉ាងដូច្នោះដែរ។

សហគមន៍ពាមក្រសោប មានប្រជាជនរស់នៅ ១១៥គ្រួសារ ហើយស្ទើរតែទាំងស្រុងនៃប្រជាជនគឺមានមុខរបរចិញ្ចឹមគ្រំចំពុះទានេះ។ ​ សហ​គមន៍​តំបន់​ការពារ​ធម្មជាតិ​ពាម​ក្រសោប​ក្នុង​ខេត្ត​កោះកុង ជាទូទៅ​អាច​ប្រមូល​​ផល​គ្រំ​ចំ​ពុះទាពី​ខែវិច្ឆិ​កា ដល់​ខែមី​នា ឬក៏មាន​ការព​ន្យារពេល​តិច​តួច​ដោយ​ផ្អែក​ទៅ​លើកត្តានៃ​តម្រូវ​ការពី​ទីផ្សា​រ​។ ​រីឯការប្រមូលផល គឺធ្វើឡើងមួយឆ្នាំម្ដង ដូចទៅនឹងការធ្វើស្រែដែរ។

និយាយដោយឡែកតែក្នុងសហគមន៍​តំបន់​ការពារ​ធម្មជាតិ​ពាម​ក្រសោប ក្នុងមួយឆ្នាំអាចរកចំណូលបានជាង១លានដុល្លារឯណោះ ដោយកាលពីពេលកន្លងទៅ ភាគីពាក់ព័ន្ធ ជាពិសេសក្រសួងបរិស្ថាន និងក្រសួងកសិកម្មបានព្យាយាមជួយដល់សហគមន៍ទាំងនោះ ដោយធានានិរន្តរភាពចំណូល ថ្វីដ្បិតថាចំណូលនេះជាចំណែកមួយយ៉ាងធំក្នុងការជួយស្រោចស្រង់ជីវភាពប្រជាជន និងសំខាន់បំផុត ហើយក៏ជាចំណែកមួយក្នុងការថែរក្សាធនធានធម្មជាតិដែលមានក្នុងតំបន់នោះផងដែរ។

លោក វង្ស តារា ដែលជាអនុ​ប្រធាន​សហគមន៍​ការពារ​ធម្មជាតិ​ពាម​ក្រសោបបានឱ្យដឹងថា ទីផ្សារគ្រំចំពុះទានាពេលបច្ចុប្បន្នភាគច្រើននៅតែពឹងផ្អែកខ្លាំងលើប្រទេសថៃ ប៉ុន្តែក៏មានភាពប្រសើរឡើងគួរឱ្យកត់សម្គាល់ខ្លះដែរ ដោយទីផ្សារក្នុងស្រុកចាប់ផ្ដើមមានការកើនឡើងដូចគ្នា។

លោកបន្ថែមទៀតថា ៖

“គ្រំដែលបញ្ចូនទៅប្រទេសថៃ គឺជាគ្រំស្រស់ដែលមិនទាន់បក ដូច្នេះយើងលក់បានមួយគីឡូក្នុងតម្លៃ ១២០០រៀល ទៅ ២៥០០រៀល…ចំណែកការលក់ក្នុងស្រុកភាគច្រើនគឺយើងត្រូវលាងសម្អាត និងបកស្រាប់ៗ ដែលមានតម្លៃពី ២០០០រៀល ទៅ ៣០០០រៀលអាស្រ័យទៅតាមទំហំ”

អនុប្រធានសហគមន៍រូបនេះបន្តថា ក្នុងមួយឆ្នាំសហគមន៍របស់លោកមានលទ្ធភាពលក់គ្រំរហូតទៅដល់ ២ ទៅ ៣ពាន់តោនឯណោះ ហើយបើតាមរយៈតម្លៃខាងលើ គេអាចគណនាឃើញពីតម្លៃជាមធ្យមដែលលក់គ្រំចំពុះទាគឺ ២១០០រៀល ក្នុងមួយគីឡូក្រាម។ ដូច្នេះហើយ ២ ទៅ៣ពាន់តោននៃគ្រំចំពុះទា ដែលលក់បានក្នុងមួយឆ្នាំ គិតជាទឹកប្រាក់គឺជាង ៥ពាន់លានរៀល ស្មើនឹង ១លាន៣សែនដុល្លារអាមេរិក។ ដោយឡែក សម្រាប់ការដឹកជញ្ជូនពីកោះកុងមកទីក្រុងភ្នំពេញ ក៏មានតម្លៃខុសគ្នាទៅទៀត ដោយលោកបានបញ្ជាក់ថា គ្រំស្រស់មួយគីឡូ ៦០០០រៀល គ្រំដែលបកសំបកមួយចំហៀងមានតម្លៃ ២ម៉ឺនរៀល និងគ្រំដែលបកស្អាតស្រាប់ៗគឺមានតម្លៃ ៤ម៉ឺនរៀល។ ប៉ុន្តែតម្លៃនេះគឺរាប់បញ្ចូលទាំងថ្លៃដឹកជញ្ជូន និងការវេចខ្ចប់ ពោលគឺអតិថិជនចាំតែទទួលយកស្រាប់ៗ ដោយមិនអស់ថ្លៃសេវាអ្វីឡើយ។ យ៉ាងណាមិញ លោក វង្ស តារា បានបង្ហាញពីគោលបំណងក្នុងការចង់ពង្រីកទីផ្សារក្នុងស្រុក ថ្វីត្បិតថាក្នុងស្រុកអាចលក់បានថ្លៃជាង និងមានស្ថិរភាពជាង ងាយស្រួលដឹកជញ្ជូន ព្រោះថាគ្រំប្រភេទនេះអាចរក្សាទុកបានត្រឹមតែរយៈពេល ២៤ម៉ោង ក្រោយលើកចេញពីទឹកប៉ុណ្ណោះ៕