ភ្នំពេញ ៖ ពានរង្វាន់សហគ្រិនវ័យក្មេងកម្ពុជាសម្រាប់ឆ្នាំ២០២២នេះ ត្រូវបានប្រារព្ធឡើងកាលពីថ្ងៃទី១៩ ខែធ្នូ ថ្មីៗនេះ បានចម្រាញ់យកសហគ្រិនឆ្នើមចំនួន៥នាក់ ដែលពួកគេជាម្ចាស់អាជីវកម្មខុសៗគ្នា ដោយបានជំរុញភាពជាគម្រូនៃអាជីវកម្មឱ្យកាន់តែប្រសើរ និងត្រូវតាមស្តង់ដារ។

ជាការពិតណាស់ ទម្រាំតែបាននូវជ័យលាភីទាំង៥នេះ សភាយុវពាណិជ្ជករអន្តរជាតិកម្ពុជា (JCI) និងសមាគមសហគ្រិនវ័យក្មេងកម្ពុជា (YEAC) បានសហការគ្នាដើម្បីជ្រើសរើសយ៉ាងសម្រិតសម្រាំងក្នុងចំណោមអាជីវកម្មជាច្រើនប្រភេទ។ សហគ្រិនឆ្នើមចំនួន៥រូបដែលឆ្លងកាត់ការប្រកួតប្រជែងជាច្រើនដំណាក់កាលទាំងនេះ គឺត្រូវបានអ្នកវាយតម្លៃយល់ថា ពួកគេជាគម្រូអាជីវកម្មដែលអាចលើកទឹកចិត្តដល់អាជីវកម្មផ្សេងទៀត ក៏ដូចជាជំរុញអាជីវកម្មជារួមដើរសំដៅទៅរកភាពស្តង់ដារជាក់លាក់មួយ។

ឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជា បានលើកឡើងអំពីការរៀបចំការប្រកួតប្រជែងអាជីវកម្មខាងលើថា ជាច្រើនឆ្នាំហើយដែលសមាគមធ្វើការជាមួយ JCI ដើម្បីជាការលើកទឹកចិត្តឱ្យសហគ្រិនកម្ពុជាហ៊ានវាស់ស្ទង់សមត្ថភាពរបស់ពួកគេ។ ដែលទាំងអស់នេះផងដែរ មិនមែនជាការបញ្ជាក់ថា អាជីវកម្មណាល្អជាងអាជីវកម្មណាមួយនោះទេ តែជាការជំរុញឱ្យអាជីវកម្មនីមួយៗកំណត់គោលដៅអាជីវកម្មរបស់ខ្លួនឱ្យច្បាស់លាស់។

លោកឧកញ៉ាមានប្រសាសន៍ថា ៖

“ទាំងអស់នេះគឺដើម្បីវាស់វែងថា តើអាជីវកម្មរបស់ពួកគាត់ស្ថិតនៅក្នុងកម្រិតណាមួយធៀបទៅនឹងគម្រូអាជីវកម្មស្តង់ដារមួយ។ ជាក់ស្ដែងដូចជាការជម្រុះអាជីវកម្ម ដោយយកត្រឹមតែ ៥នៅថ្ងៃនេះ គឺដើម្បីប្រាប់ទៅសហគ្រិនផ្សេងទៀតថា អាជីវកម្មប្រភេទនេះដែលយើងចង់បាន…ម៉្យាងទៀត សហគ្រិនដែលជាប់ក្នុងការជ្រើសរើសនេះគាត់នឹងមានការទទួលស្គាល់កាន់តែច្រើន ហើយក៏ជាចំណែកក្នុងការជួយរុញកំណើនសេដ្ឋកិច្ចផងដែរ”

យ៉ាងណាមិញ លោកឧកញ៉ាបានរំលេចអំពីឧបសគ្គមួយចំនួនដែលលោកបានមើលឃើញពីសហគ្រិនថ្មីៗ ដោយពួកគេភាគច្រើនមានស្មារតី មានឆន្ទៈក្នុងការកសាងអាជីវកម្ម ក៏ប៉ុន្តែពួកគេខ្វះចំណេះដឹង និងជំនាញ។ ដូច្នេះហើយ អ្វីដែលសមាគមកំពុងធ្វើនេះគឺដើម្បីកសាងចំណេះ ជំនាញ ដែលសហគ្រិនវ័យក្មេងខ្វះខាត ដើម្បីធានាអាជីវកម្មឱ្យមានភាពរឹងមុំា និងត្រូវតាមស្តង់ដារ។

គួរបញ្ជាក់ថា ពានរង្វាន់សម្រាប់សហគ្រិនត្រូវបានបែងចែកជា៥គឺ ពានរង្វាន់សហគ្រិនវ័យក្មេងឆ្នើម ពានរង្វាន់ធុរកិច្ចបរិយាប័ន្ន ពានរង្វាន់សហគ្រិនស្ត្រីឆ្នើម ពានរង្វាន់សហគ្រិនបច្ចេកវិទ្យាឆ្នើម និងពានរង្វាន់ធុរកិច្ចបង្កើតថ្មី។ ដែលការបែងចែកនេះគឺក្នុងគោលបំណងជំរុញឱ្យសហគ្រិនចូលរួមចំណែកឱ្យកាន់តែច្រើនទៅក្នុងផលប្រយោជន៍សង្គម ក៏ដូចជាសេដ្ឋកិច្ចជាតិ។ គួររំលឹកផងដែរថា ពានរង្វាន់សហគ្រិនវ័យក្មេងកម្ពុជា (CYEA) ត្រូវបានបង្កើតឡើងនៅក្នុងឆ្នាំ ២០១៥ ដោយសភាយុវពាណិជ្ជករអន្តរជាតិកម្ពុជា(JCI) រួមជាមួយនឹងសមាគមសហគ្រិនវ័យក្មេងកម្ពុជា(YEAC)។ ពានរង្វាន់នេះត្រូវបានផ្ដល់ឱ្យជារៀងរាល់ឆ្នាំទៅដល់សហគ្រិនឆ្នើមដែលបានឆ្លងកាត់ការប្រកួតប្រជែង។ ការប្រកួតប្រជែង ដើម្បីជ្រើសរើសសហគ្រិនឆ្នើមនេះដែរបានចាប់ផ្ដើមតាំងតែពីខែសីហា ឆ្នាំ២០២២មកម្លេះ៕