ត្បូងឃ្មុំ៖ សៀង ជាអាហារកែច្នៃម្យ៉ាងដែលធ្វើពីសណ្ដែកសៀងស្ងោរជាច្រើនម៉ោង ផ្អាប់ទុក ដើម្បីអាចរក្សាទុកបានយូរក៏ដូចជាអាចច្នៃជាម្ហូបអាហារបានច្រើនមុខ។ ជាមួយនឹងសង្វាក់ផលិតកម្មផលិតសៀងនេះ គេបានកត់សម្គាល់ឃើញមានសិប្បកម្មផលិតសៀងមួយកន្លែងដែលកំពុងដំណើរការផលិតបន្តពីគ្រួសារ រក្សានូវរសជាតិ អនាម័យ និងជាផ្នែកមួយជួយដល់ជីវភាពសហគមន៍ក្នុងតំបន់។

គ្រួសារសៀងឆ្ងាញ់ ជាឈ្មោះសិប្បកម្មផលិតសៀងមួយកន្លែងស្ថិតនៅភូមិស្រែស្ពៃ ឃុំគងជ័យ ស្រុកអូររាំងឪ  ខេត្តត្បូងឃ្មុំ ដែលកំពុងមានភាពមមាញឹកក្នុងការផលិតសៀងយ៉ាងប្រកបដោយរសជាតិឆ្ងាញ់ និងមានគុណភាពល្អ។

លោក ចាន់ រដ្ឋា ជាម្ចាស់សិប្បកម្មសៀងឆ្ងាញ់បានមានប្រសាសន៍ប្រាប់ AMS ថា សិប្បកម្មផលិតសៀងមួយនេះ គឺជាមុខរបរបន្តពីក្រុមគ្រួសារ ហើយក៏បានធ្វើឱ្យអាជីវកម្មមួយនេះកាន់តែរីកធំធាត់ទៅមុខ និងបានផ្តល់ការងារមួយចំនួនដល់ប្រជាសហគមន៍ ព្រមទាំងបានលើកកម្ពស់កសិផល ក៏ដូចជាផលិតផលខ្មែរផងដែរ។

លោកបញ្ជាក់ថា៖

«សិប្បកម្មរបស់យើងជាសិប្បកម្មខ្នាតតូចលក្ខណៈគ្រួសារ តែយើងបានជួយទិញសណ្ដែកសៀងពីបងប្អូននៅខេត្តស្ទឹងត្រែង ឯអង្កាមសម្រាប់ដុតភ្លើងស្ងោសណ្ដែកក៏យើងជួយទិញបងប្អូនក្នុងតំបន់ ពោលគឺយើងផលិតសៀងដែលមានរសជាតិឆ្ងាញ់ អនាម័យ ច្នៃពីផលិតផលក្នុងស្រុក ហើយលក់នៅលើទីផ្សារក្នុងស្រុកវិញ»។

លោកបានបន្តថា ៖

«បច្ចុប្បន្ន សៀងរបស់យើងមានពីរប្រភេទ គឺសៀងឆ្ងាញ់ និងសៀងឆ្ងាញ់ពិសេស ដែលក្នុងនោះសៀងឆ្ងាញ់លក់ក្នុងតម្លៃ ១ដប ២៥០០រៀល ឯសៀងឆ្ងាញ់ពិសេស ១ដបមានតម្លៃពី ៣៥០០-៥០០០រៀល និងមានជាប្រភេទកំប៉ុង ដោយ១ កំប៉ុងមានតម្លៃ ៦០០០រៀល។ ដោយឡែកសម្រាប់អតិថិជនដែលគាំទ្រសិប្បកម្មសៀងឆ្ងាញ់មានច្រើន ដែលមានទាំងអ្នករស់នៅតំបន់ និងតាមបណ្តាខេត្ត ផ្សេងៗដូចជា ខេត្តកំពង់ចាម ព្រះសីហនុ សៀមរាប ប៉ៃលិន ព្រះវិហារ កោះកុង ឧត្ដមមានជ័យ ប៉ោយប៉ែត រតនគីរី និងក្រចេះ និងរាជធានីភ្នំពេញផងដែរ»។

ម្ចាស់សិប្បកម្មសៀងរូបនេះបន្ថែមថា លក្ខណៈពិសេសដែលធ្វើឱ្យគេនិយមគាំទ្រផលិតផលរបស់សិប្បកម្មនេះ គឺការប្រកាន់ភ្ជាប់នូវរសជាតិ គុណភាព និងអនាម័យក្នុងការផលិត ដែលក្នុងមួយថ្ងៃសិប្បកម្មអាចផលិតសៀងបានប្រមាណ ១០០០គីឡូក្រាម ឬច្រើនជាងនេះប្រសិនបើបងប្អូនកម្ម៉ង់បន្ថែម។ ​

គួរបញ្ជាក់ដែរថា សិប្បកម្មផលិតសៀងខាងលើបានចាប់ផ្តើមឡើងតាំងពីចុងឆ្នាំ២០១៨ ដែលជាមុខរបរបន្តពីគ្រួសារ ដោយចាប់ផ្ដើមក្នុងដើមទុនប្រមាណ ៦០០០ដុល្លា ចំណាយលើការសាងសង់រោងសិប្បកម្ម និងទិញសម្ភារមួយចំនួន ដូចជា ពាងខាប់ និងវត្ថុធាតុដើម ដូចជា សណ្ដែកសៀង ស្ករ និងអំបិលជាដើម។

យ៉ាងណាក៏ដោយ លោក រដ្ឋា បានបង្ហាញពីកត្តាប្រឈមដែរថា សម្រាប់សិប្បកម្មមួយនេះធ្លាប់ជួបការលំបាកក្នុងសង្វាក់ផលិតកម្ម ដូចជាពេលខ្លះខ្វះវត្ថុធាតុដើម ហើយពេលខ្លះទៀតទំនិញឡើងថ្លៃជាដើម។ ប៉ុន្តែទោះជាយ៉ាងណា សិប្បកម្មមួយនេះនៅតែបន្តសកម្មភាព និងបានពង្រីកខ្លួនធំជាងមុន ខណៈដែលនៅថ្ងៃអនាគត អ្នកស្រីមានបំណងពង្រីកអាជីវកម្មឱ្យកាន់តែរឹងមាំ និងអាចផ្ដល់ការងារឱ្យកាន់តែច្រើនដល់ប្រជាសហគមន៍ផងដែរ៕