សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ របាយការណ៍របស់សហព័ន្ធស្រូវអង្ករកម្ពុជា បានឱ្យដឹងថា ក្នុងរយៈពេល៩ខែ ឆ្នាំ២០២៣កន្លងទៅនេះ កម្ពុជាទទួលបានចំណូល ១ ១៨៩លានដុល្លារ ពីការនាំចេញអង្ករ-ស្រូវ ដោយក្នុងនោះការនាំចេញអង្ករបានជាង ៤៥ម៉ឺនតោន មានទឹកប្រាក់ចំនួន ៣២៧ លានដុល្លារ ខណៈដែលការនាំចេញស្រូវបានចំនួន ៣ ០៧៧ ៤១៥តោន គិតជាទឹកប្រាក់បានប្រមាណជា ៨៦២.៣៩លានដុល្លារ តាមរយៈក្រុមហ៊ុននាំចេញអង្ករចំនួន ៥៥ក្រុមហ៊ុន ទៅកាន់គោលដៅចំនួន ៥៧ប្រទេស និងតំបន់ជុំវិញពិភពលោក។
តាមរបាយការណ៍បានបញ្ជាក់ថា សម្រាប់ការនាំចេញអង្កររបស់កម្ពុជាឆ្ពោះទៅកាន់ប្រទេសគោលដៅមួយចំនួនរួមមានដូចជា ៖
– នាំចេញទៅកាន់ប្រទេសចិន និងហុងកុងចំនួន ១៥៥ ៣៦៦ តោន គិតជាទឹកប្រាក់ចំនួន ៩៩.៦៥លានដុល្លារ។
– នាំចេញទៅកាន់ទ្វីបអឺរ៉ុបចំនួន ២៦ប្រទេសបានចំនួន ១៩០ ៧៨៨តោន គិតជាទឹកប្រាក់ចំនួន ១៣៨.៩៨លានដុល្លារ។
– នាំចេញទៅកាន់ប្រទេសសមាជិកអាស៊ានចំនួន ៥ប្រទេស បានបរិមាណចំនួន ៤៥ ៣០៦តោន គិតជាទឹកប្រាក់ចំនួន ៣១.៣២លានដុល្លារ។
– នាំចេញទៅកាន់គោលដៅផ្សេងទៀតនៅអាហ្វ្រិក មជ្ឈឹមបូព៌ាចំនួន ២៤ប្រទេស បានចំនួន ៦៦៣៣១តោន គិតជាទឹកប្រាក់បានចំនួន ៥៧.៤៩ លានដុល្លារ។
ការនាំចេញនេះ មានប្រភេទអង្ករក្រអូបគ្រប់ប្រភេទចំនួន ៨២.៤៣%, អង្ករសចំនួនជិត ១២.២៦%, អង្ករចំហ៊ុយ ៣.៣៣%, អង្ករសរីរាង្គចំនួន ១.៧៧% និងអង្ករសគ្រាប់ខ្លីចំនួន០.០២%។
ពូជអង្ករដែលបាននាំចេញរួមមាន អង្ករក្រអូបប្រណិត អង្ករក្រអូប អង្ករសគ្រាប់វែង អង្ករសំរូប និងអង្ករសរីរាង្គ។
នៅឆ្នាំ២០២២ កម្ពុជាបាននាំចេញអង្ករបានជាង ៦៣ម៉ឺនតោន ទៅកាន់ប្រទេសចំនួន៥៩ រកចំណូលបាន ៤១៤លានដុល្លារ
សូមបញ្ជាក់ថា សហព័ន្ធស្រូវអង្ករកម្ពុជាបានកំណត់គោលដៅប្រកបដោយមហិច្ឆតាក្នុងការនាំចេញអង្ករឱ្យបានយ៉ាងហោចណាស់មួយលានតោននៅឆ្នាំ២០២៥។
កម្ពុជាបានចាត់ទុកការនាំចេញអង្ករជានិច្ចកាលជាទំនិញស្នូលក្នុងការនាំចេញកសិផល។ ក្នុងរយៈពេលកន្លងទៅនេះ ការនាំចេញអង្កររបស់កម្ពុជាបានបោះជំហានទៅមុខ ខណៈពេលដែលតម្លៃបានកើនឡើង ជាពិសេស ក្នុងរយៈពេលប៉ុន្មានខែចុងក្រោយនេះ តម្លៃអង្ករនាំចេញតែងតែនៅកម្រិតខ្ពស់ ហើយបច្ចុប្បន្នទីផ្សារនាំចេញអង្កររបស់កម្ពុជា បានកត់សម្គាល់ឃើញមានកំណើនទីផ្សារដូចជា ប្រទេសចិន ហ្វ៊ីលីពីន ម៉ាឡេស៊ី សិង្ហបុរី និងប្រទេសអារ៉ាប់ប៊ីសាអូឌីតផងដែរ។
គួរកត់សម្គាល់ថា កាលពីឆ្នាំ២០២២ កម្ពុជាបាននាំចេញអង្ករចំនួន ៦៣៧ ០០០ តោនទៅកាន់ប្រទេសចំនួន៥៩ ជុំវិញពិភពលោក ដែលនាំមកនូវប្រាក់ចំណូលជិត ១,៣ ពាន់លានដុល្លារអាមេរិក។ ក្នុងនោះទីផ្សារចិនស្រូបចំនួន ៤៥% ទីផ្សារអឺរ៉ុបស្រូបចំនួន ៣៥% នៅសល់គឺប្រទេសអាហ្វ្រិក អាមេរិក រុស្ស៊ី និងប្រទេសអាស៊ីអាគ្នេយ៍មួយចំនួន។ ដោយឡែកចំណូលពីការនាំចេញស្រូវមានប្រមាណ ៨៤១លានដុល្លារអាមេរិក ក្នុងនោះកម្ពុជាក៏បាននាំចេញស្រូវ ជាង ៣,៤ លានតោនទៅប្រទេសវៀតណាមផងដែរ៕
Account
Security
Favourite Content