សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តបទៅនឹងគោលនយោបាយបើកចំហររបស់រាជរដ្ឋាភិបាលកម្ពុជាក្នុងការផ្តល់ឱកាសវិនិយោគ និងទាក់ទាញក្រុមហ៊ុនអន្តរជាតិមកកម្ពុជា ក្រុមហ៊ុន DOMI Biotechnology Co., Ltd. របស់ចិន ដែលមានជំនាញកែច្នៃផ្លែឈើស្រស់ ជាពិសេស ផ្លែដូង និងទុរេន ដែលបច្ចុប្បន្នមានទីតាំង និងកំពុងដំណើរការនៅប្រទេសថៃ បានបង្ហាញពីគោលបំណងរបស់ខ្លួនក្នុងការស្វែងយល់បន្ថែមពីឱកាសបណ្តាក់ទុនបង្កើតរោងចក្រកែច្នៃផ្លែឈើស្រស់នៅកម្ពុជាសម្រាប់នាំចេញទៅប្រទេសចិន សហរដ្ឋអាមេរិក អូស្ត្រាលី មជ្ឈិមបូព៌ា និងអ៊ីតាលី។
នៅក្នុងដំណើរទស្សនកិច្ចនៅកម្ពុជាកាលពីថ្ងៃទី១២ ខែសីហា ឆ្នាំ២០២៤ ដើម្បីសិក្សាស្វែងយល់ពីកាលានុវត្តភាពវិនិយោគនៅកម្ពុជា ជាពិសេសស្វែងរកឱកាសវិនិយោគបង្កើតរោងចក្រកែច្នៃផ្លែឈើស្រស់ដូចនៅប្រទេសថៃដែរនោះ លោក WAN YANHU ប្រធានក្រុមហ៊ុន DOMI Biotechnology Co., Ltd. បានចូលជួបពិភាក្សាការងារជាមួយឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជាដើម្បីសុំការគាំទ្រ និងទទួលអនុសាសន៍ណែនាំបន្ថែម។
ក្នុងជំនួបនេះ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានថ្លែងថា ៖ ក្នុងរយៈពេលមួយទសវត្សរ៍ចុងក្រោយនេះ រំហូរវិនិយោគចិនមកកម្ពុជាមានកំណើនខ្ពស់ជារៀងរាល់ឆ្នាំ ហើយក្នុងរយៈពេលប្រមាណជិត៨ខែ ដើមឆ្នាំ២០២៤ ការវិនិយោគចិនបានជាប់ចំណាត់ថ្នាក់លេខ១ក្នុងទំហំវិនិយោគប្រមាណ៥៣%នៃប្រភពវិនិយោគទុនសរុប។
ជាក់ស្ដែង តាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា (CDC) បានបង្ហាញថា នៅក្នុងខែកក្កដា ឆ្នាំ២០២៤ កន្លងទៅនេះ រាជរដ្ឋាភិបាល តាមរយៈក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងថ្មីចំនួន ៤១គម្រោង និងគម្រោងពង្រីកផលិតកម្មចំនួន ៣គម្រោង ដែលមានទុនវិនិយោគសរុបប្រមាណជាង ៣៩៦លានដុល្លារ និងអាចបង្កើតការងារបានប្រមាណ ២៥ពាន់កន្លែង ខណៈដែលក្រុមហ៊ុនបានបណ្តាក់ទុនសរុបប្រមាណ២៧០លានដុល្លារ។
ឯកឧត្តម ជា វុទ្ធី បានជម្រាបគណៈប្រតិភូដែលបានមកធ្វើទស្សនកិច្ច ជាពិសេសក្រុមហ៊ុន DOMI Biotechnology Co., Ltd. អំពីរចនាសម្ព័ន្ធ និងតួនាទីភារកិច្ចរបស់ក្រុមប្រឹក្សាអភិវឌ្ឍន៍កម្ពុជា ជាពិសេសផ្តោតលើការជំរុញទាក់ទាញការវិនិយោគឯកជន ដែលមានគណៈកម្មាធិការវិនិយោគកម្ពុជា ជាសេនាធិការ។ បច្ចុប្បន្នកម្ពុជាមានច្បាប់ស្តីពីវិនិយោគប្រកបដោយភាពបើកចំហ មានតម្លាភាព និងអាចប៉ាន់ប្រមាណទុកជាមុនបាន។
ឯកឧត្តមអគ្គលេខាធិការក៏បានសម្តែងនូវការស្វាគមន៍ចំពោះគម្រោងវិនិយោគបង្កើតរោងចក្រកែច្នៃផ្លែឈើស្រស់ ជាពិសេស ផ្លែដូង និងបានជំរុញលើកទឹកចិត្តឱ្យក្រុមហ៊ុនខិតខំធ្វើការកែច្នៃឱ្យអស់លទ្ធភាពនៅពេលបើកដំណើរការរោងចក្រ ដើម្បីចូលរួមចំណែកលើកកម្ពស់តម្លៃបន្ថែមក្នុងស្រុក។ ថ្នាក់ដឹកនាំ និងមន្ត្រីទាំងអស់របស់គណៈកម្មាធិការវិនិយោគកម្ពុជា រង់ចាំដោយក្តីរីករាយក្នុងផ្តល់កិច្ចសម្រួបសម្រួលគ្រប់បែបយ៉ាងជូនក្រុមហ៊ុននៅពេលក្រុមហ៊ុនសម្រេចចិត្តវិនិយោគនៅកម្ពុជា។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍នាពេលកន្លងមកថា៖ កម្ពុជា ជាប្រទេសដែលមានសក្តានុពលខ្ពស់លើវិស័យកសិកម្ម ដូច្នេះ នេះគឺជាឱកាសសម្រាប់អ្នកវិនិយោគបរទេសមកបណ្តាក់ទុន ដោយរាប់តាំងពីការដាំដុះ ប្រមូលទិញ និងការកែច្នៃ សម្រាប់ផ្គត់ផ្គង់ទីផ្សារក្នុងតំបន់ ក៏ដូចជានៅលើទីផ្សារអន្តរជាតិផងដែរ។
អ្នកឧកញ៉ាបានបន្តថា ៖ ការបណ្តាក់ទុនលើរោងចក្រកែច្នៃ គឺជាអ្វីដែលកម្ពុជាកំពុងមានតម្រូវការខ្លាំង ព្រោះដោយសារសមត្ថភាពរោងចក្រកែច្នៃនៅក្នុងស្រុកមានកម្រិត បានបង្ខំឱ្យប្រទេសកម្ពុជានាំចេញផលិតផលកសិកម្មមិនទាន់កែច្នៃជាច្រើនតោនជារៀងរាល់ឆ្នាំទៅប្រទេសជិតខាងដើម្បីកែច្នៃបន្ត។
អ្នកឧកញ៉ា លឹម ហេង បានសង្កត់ធ្ងន់ថា ៖ ការវិនិយោគលើរោងចក្រក្នុងវិស័យកសិកម្មនឹងរួមចំណែកជួយលើកកម្ពស់េសដ្ឋកិច្ចបានយ៉ាងច្រើនទៅដល់ប្រជាជនដែលជាកសិករដាំដុះ តាមរយៈការទទួលបានតម្លៃសមរម្យ និងមានទីផ្សារក្នុងស្រុកចាំទទួលទិញ។ បន្ថែមពីនេះ ប្រជាកសិករ ក៏ដូចជាសហគមន៍ក៏អាចមានឱកាសទទួលបាននូវចំណេះដឹង បច្ចេកទេសថ្មីៗស្របតាមស្ដងដារទីផ្សារដែលក្រុមហ៊ុន ឬរោងចក្រមានតម្រូវការចង់បាន។
Account
Security
Favourite Content