ភ្នំពេញ ៖ ក្រោយខកខានអស់រយៈពេលជាច្រើនទសវត្សរ៍ ប៉ុន្តែក្នុងការត្រឡប់មកវិញលើកនេះកម្ពុជាបានជាប់ឈ្មោះ និងក្លាយជាម្ចាស់ផ្ទះជាប្រវត្តិសាស្ត្រក្នុងកិច្ចរៀបចំកីឡាស៊ីហ្គេម ដែលទទួលខុសត្រូវលើរាល់ការចំណាយទាំងអស់សម្រាប់បណ្តាប្រទេសដែលចូលរួមកីឡាស៊ីហ្គេមលើកទី៣២ រហូតប្រមាណជិត ២០០ លានដុល្លារ។

តម្លៃ​នៃ​ការ​សាងសង់​ពហុកីឡដ្ឋានជាតិ​មរតក​តេ​ជោ​​ក្នុង​រាជធានី​ភ្នំពេញបាន​ចំណាយ​ទឹកប្រាក់​សរុប​ចំនួន​១៦០​លាន​ដុល្លារ ហើយក្រោយពេលសាងសង់រួចរាល់ ពហុកីឡដ្ឋានមរតកតេជោបានក្លាយទៅជាពហុកីឡដ្ឋានដែលធំជាងគេបំផុតទីពីរនៅអាស៊ីអាគ្នេយ៍ បន្ទាប់ពីពហុកីឡដ្ឋាន Bukit Jalil របស់ប្រទេសម៉ាឡេស៊ី និងមានទំហំធំជាងទ្វេដងធំជាងពហុកីឡដ្ឋាន My Dinh របស់ប្រទេសវៀតណាម។

រាជរដ្ឋាភិបាល​កម្ពុជា​បាន​ប្រកាស​កាល​ពី​ថ្ងៃ​ទី​១៨ ខែ​មេសា ថា ​នឹង​រ៉ាប់រង​រាល់​ការ​ចំណាយ​សម្រាប់ប្រតិភូកីឡាដែលមកពីបណ្តា​ប្រទេសនានា​​ចូល​រួម​ក្នុង​ការ​ប្រកួត​កីឡា​ស៊ីហ្គេម​លើក​ទី៣២ ដែល​ក្នុង​នោះ​រួម​មានទាំង​មធ្យោបាយ​ធ្វើដំណើរ ការ​ស្នាក់នៅ និង​អាហារ ហើយលើសពីនេះសូម្បីតែសិទ្ធិ​ផ្សាយ​សម្រាប់​ព្រឹត្តិការណ៍​នេះក៏​កម្ពុជានឹងពុំ​គិត​ថ្លៃ​ឡើយ។

សំណួរសួរថា តើកម្ពុជានឹងទទួលបានអ្វីត្រឡប់មកវិញក្រោយព្រឹត្តិការណ៍ស៊ីហ្គេមលើកទី៣២នេះបញ្ចប់?

ប្រាកដណាស់ថា ក្នុងនាមជាម្ចាស់ផ្ទះនៃព្រឹត្តិការណ៍ស៊ីហ្គេម ជាធម្មតាប្រទេសនីមួយៗនឹងទទួលបានផលប្រយោជន៍ជាច្រើនត្រឡប់មកវិញក្រៅតែពីការជួយផ្សព្វផ្សាយ ក៏ដូចជាការជួយជំរុញកំណើនសេដ្ឋកិច្ចមួយចំណែកណាមួយ។​​ ប៉ុន្តែសម្រាប់កម្ពុជា ព្រឹត្តិការណ៍ជាប្រវត្តិសាស្ត្រមួយនេះគឺនឹងផ្តល់ផលត្រឡប់មកវិញយ៉ាងច្រើនលើសលប់ដែលអាចទទួលបានលើសពីអ្វីដែលយើងបានចំណាយ។

ការខកខានធ្វើជាម្ចាស់ផ្ទះអស់រយៈពេលជាង៦០ឆ្នាំដោយសារបញ្ហានយោបាយ និងខ្វះខាតសន្តិភាពបានធ្វើឲ្យកម្ពុជាបាត់ឱកាសចូលរួមចំណែកជាមួយនឹងតំបន់ ជាពិសេសលើវិស័យកីឡា ប៉ុន្តែការវិលត្រឡប់មកវិញលើកនេះ ក្រៅតែពីវិស័យកីឡាហើយនោះ កម្ពុជាខ្លួនឯងនឹងទទួលបានអត្ថប្រយោជន៍ជាច្រើនដែលក្នុងនោះគឺមានការលើកកំពស់វិស័យកីឡាកាន់តែប្រសើរឡើងតាមរយៈការត្រៀមខ្លួនអស់រយៈពេលជាច្រើនឆ្នាំ និងការវិនិយោគពីសំណាក់រដ្ឋាភិបាលផងក្នុងការធ្វើឲ្យប្រសើរឡើងនៅវិស័យនេះទាំងមូល។

កម្ពុជា ជារៀងរាល់ឆ្នាំបានចំណាយថវិកាមួយចំនួនទៅលើការផ្សព្វផ្សាយពីសក្តានុពល និងភាពរុងរឿងរបស់ខ្លួនទៅកាន់ពិភពលោកដែលតាមរយៈព្រឹត្តិការណ៍លើកនេះប្រទេសក្ពុជា នឹងមិនចាំបាច់ចំណាយខ្ទង់ថវិកានេះទៀតឡើយ ពីព្រោះថាក្រៅតែពីក្រុមអ្នកសារព័ត៌មានជាង១ពាន់នាក់ដែលកម្ពុជានឹងទទួលស្វាគមន៍ក្នុងព្រឹត្តិការណ៍ដោយផ្ទាល់ហើយនោះ ក៏នឹងមានបណ្តាញសារព័ត៌មានក្នុងតំបន់ និងអន្តរជាតិជាច្រើនផ្សេងទៀតនឹងចូលរួមក្នុងការផ្សព្វផ្សាយពីកម្ពុជាដោយប្រយោលទៅកាន់ពិភពលោកផងដែរ។

អត្ថប្រយោជន៍ផ្សេងទៀតដែលកម្ពុជានឹងអាចទទួលបានពីព្រឹត្តិការណ៍ស៊ីហ្គេមលើកនេះគឺជាបទពិសោធសម្រាប់ពលរដ្ឋកម្ពុជាទាំងមូលក្នុងនាមជាម្ចាស់ផ្ទះ និងភាពជាអ្នកទទួលខុសត្រូវដើម្បីត្រៀមខ្លួនក្នុងការទទួលយកព្រឹត្តិការណ៍ធំៗ និងសំខាន់ៗផ្សេងទៀតនាពេលអនាគត។

មិនត្រឹមតែប៉ុណ្ណោះ ដោយសារតែមិនត្រូវការប្រាក់ចំណាយលើក្រុមកីឡាករនៃប្រទេសចូលរួមផងនោះ កម្ពុជានឹងអាចកសាងបាននូវទំនាក់ទំនងកាន់តែជិតស្និទ្ធជាមួយនឹងប្រជាជាតិក្នុងតំបន់កាន់តែជិតស្និទ្ធ ហើយវានឹងក្លាយទៅជាគំរូដ៏ល្អមួយក្នុងប្រវត្តិសាស្ត្រនៃប្រជាជាតិក្នុងតំបន់អាស៊ីអាគ្នេយ៍ផងដែរបើទោះបីជាកម្ពុជាមិនទាន់មានសេដ្ឋកិច្ចខ្លាំងក្លាដូចបណ្តាប្រទេសក្នុងតំបន់មួយចំនួនក្កី។

ចប់ព្រឹត្តិការណ៍នេះ កម្ពុជាជឿជាក់ថា សកម្មភាពវិនិយោគ និងសកម្មភាពអាជីវកម្មពាណិជ្ជកម្មនៅកម្ពុជានឹងអាចទទួលបានកាន់តែសកម្ម និងមមាញឹកជាងមុន ពីព្រោះថាសក្តានុពលរបស់កម្ពុជាត្រូវបានបង្ហាញទៅកាន់គ្រប់ទីកន្លែងលើពិភពលោក ជាពិសេសចំពោះក្រុមអ្នកវិនិយោគទុនបរទេស។ កាន់តែសំខាន់បំផុតនោះ សម្រាប់ជោគវាសនារបស់កម្ពុជានាពេលអនាគត ដែលបន្សល់ទុកពីកេរ្តិ៍ឈ្មោះកម្ពុជាក្នុងនាមជាម្ចាស់ផ្ទះនៃព្រឹត្តិការណ៍ស៊ីហ្គេមលើកទី៣២ដោយមិនទាមទារការចំណាយទាំងអស់ពីក្រុមប្រតិភូកីឡាករ គឺអាចជួយបង្ហាញឲ្យកាន់តែច្បាស់អំពីភាពសុខដុមរមនីយកម្មនៃការរស់នៅរបស់ពលរដ្ឋកម្ពុជាដែលកំពុងជ្រកក្រោមដំបូលសន្តិភាព និងស្របទៅនឹងពាក្យស្លោកសម្រាប់ព្រឹត្តិការណ៍ឆ្នាំនេះគឺ «កីឡារស់ក្នុងសន្តិភាព ឬSPORTS LIVE IN PEACE»៕