ភ្នំពេញ ៖ បច្ចុប្បន្ន ក្រុមហ៊ុនចែករំលែកព័ត៌មានឥណទាននៅកម្ពុជាមានតែមួយប៉ុណ្ណោះ គឺក្រុមហ៊ុន Credit Bureau Cambodia ហៅកាត់ថា CBC ។​ ក្រុមហ៊ុននេះរក្សាទុកទាំងអស់នូវព័ត៌មានឥណទាន ពោលគឺប្រវត្តិខ្ចី-សង រវាងអតិថិជន និងគ្រឹះស្ថានហិរញ្ញវត្ថុទូទាំងប្រទេសកម្ពុជា។ យ៉ាងណាក៏ដោយ ក្នុងករណីដែលអតិថិជនរកឃើញថាព័ត៌មានឥណទានរបស់ខ្លួនមិនត្រឹមត្រូវ ពួកគេអាចស្វែងយល់ពីវិធីសាស្ត្រមួយចំនួន ដើម្បីស្នើសុំកែតម្រូវព័ត៌មានឡើងវិញ។

 លោក ផៃ សុផល នាយកសេវាអតិថិជននៃក្រុមហ៊ុន CBC បានឱ្យដឹងយ៉ាងដូច្នេះថា សម្រាប់អតិថិជនដែលបានស្នើសុំរបាយការណ៍ឥណទាន នៅពេលដែលខ្លួនបានពិនិត្យមើលទៅឃើញថា ព័ត៌មានរបស់ខ្លួនមិនត្រឹមត្រូវ គឺអាចដាក់ពាក្យបណ្ដឹងទៅកាន់ CBC បាន។

ចំពោះការដាក់ពាក្យបណ្ដឹងនេះដែរ លោក ផែ សុផល បានបន្តរៀបរាប់ថា៖

«ទី១ បើសិនជាគាត់​ស្នើសុំតាមរយៈ CBC mobile app នៅក្នុងហ្នឹងគេមានកន្លែងមួយដែលអាចឱ្យគាត់ដាក់ពាក្យបណ្ដឹង….អីចឹងគាត់អាចដាក់ពាក្យបណ្ដឹងតាមហ្នឹងបាន។ ទី២ គាត់អាចទៅការិយាល័យ CBC ផ្ទាល់បាន និងទី៣ គាត់អាចផ្ញើពាក្យបណ្ដឹងមកកាន់អ៊ីម៉ែលរបស់ CBC បានដូចគ្នា»។

យ៉ាងណាមិញ នៅពេលទទួលបានពាក្យបណ្ដឹង ក្រុមការងាររបស់ CBC នឹងផ្ទៀងផ្ទាត់ទៅលើព័ត៌មាន ដោយទំនាក់ទំនងទៅកាន់អតិថិជនផ្ទាល់ដើម្បីសាកសួរ និងដើម្បីឱ្យប្រាកដថា អតិថិជនមានឯកសារ គ្រប់គ្រាន់សម្រាប់ជាភ័ស្តុតាង ក្នុងការដាក់ពាក្យបណ្ដឹង។

បើតាមការបញ្ជាក់របស់អ្នកជំនាញដដែល ដំណាក់កាលបន្ទាប់គឺក្រុមហ៊ុន CBC នឹងចាប់ផ្ដើមដោះស្រាយពាក្យបណ្ដឹង ដោយការទំនាក់ទំនងទៅកាន់គ្រឹះស្ថានហិរញ្ញវត្ថុដែលជាស្ថាប័នបញ្ចូលព័ត៌មានឱ្យអតិថិជនរូបនោះ ដើម្បីផ្ទៀងផ្ទាត់ថា តើពិតជាបានបញ្ចូលព័ត៌មានខុសមែន ឬទេ?

ករណីដែលស្ថាប័នបញ្ជាក់ថា មានកំហុសឆ្គងក្នុងការបញ្ចូលទិន្នន័យពិតមែន CBC នឹងបន្តសហការជាមួយស្ថាប័ននោះដើម្បីកែតម្រូវព័ត៌មានរបស់អតិថិជនឡើងវិញ ហើយក្រោយពេលដែលព័ត៌មាន ឥណទានត្រូវបានកែប្រែរួចរាល់ CBC នឹងជូនដំណឹងទៅកាន់អតិថិជនវិញ។

ទោះបីជាយ៉ាងណក៏ដោយ ប្រសិនបើអតិថិជននៅតែមិនទាន់ពេញចិត្តនឹងដំណោះស្រាយរបស់ CBC ទេ ពួកគេនៅតែអាចមានសិទ្ធិដាក់ពាក្យបណ្ដឹងបន្តទៀតទៅកាន់ធនាគារជាតិនៃកម្ពុជា។

ជារួមនៅក្នុងដំណើរការដោះស្រាយពាក្យបណ្ដឹងដើម្បីកែប្រែព័ត៌មានឥណទាននេះ លោក ផៃ សុផល បានបញ្ជាក់ឱ្យដឹងថា មានរយៈពេល ១៥ថ្ងៃ នៃថ្ងៃធ្វើការ​បន្ទាប់ពីបានទទួលពាក្យ​បណ្ដឹងរបស់អតិថិជន៕