តាកែវ ៖ ក្រុមការងាររាជរដ្ឋាភិបាល ចុះមូលដ្ឋានខេត្តកំពត-ខេត្តកែប-ខេត្តព្រះសីហនុ កាលពីថ្ងៃទី១៨ ខែមីនា ឆ្នាំ២០២៥ បានផ្តល់ជូនជាផ្ទះសំណាញ់ ១០០ខ្នង ដល់សហគមន៍កសិកម្មទំនើប «បន្លែផ្ទះសំណាញ់ត្រាំកក់»។ ការផ្តល់ជូននេះ គឺដើម្បីបន្ថែមភាពរឹងមាំមួយកម្រិតទៀតដល់ស្ថិរភាពនៃការផ្គត់ផ្គង់បន្លែពីក្នុងសហគមន៍ទៅកាន់ទីផ្សារក្នុងស្រុក និងបង្កើតសមត្ថភាពប្រកួតប្រជែងនៃផលិតកម្មបន្លែជាមួយបន្លែនាំចូល។

ឯកឧត្តម​ ឃឹម​ ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១៩ ខែមីនា ឆ្នាំ២០២៥ បានបញ្ជាក់ថា៖ ការផ្តល់ជូនជាផ្ទះសំណាញ់«១០០ខ្នង» ពីក្រុមការងាររាជរដ្ឋាភិបាលចុះមូលដ្ឋានខេត្តកំពត-ខេត្តកែប-ខេត្តព្រះសីហនុ ជូនដល់កសិករជាសមាជិក និងសហគមន៍កសិកម្មទំនើប«បន្លែផ្ទះសំណាញ់ត្រាំកក់» នឹងក្លាយទៅជាមូលដ្ឋានគ្រឹះដ៏សំខាន់ក្នុងការពង្រីកវិសាលភាពនៃប្រតិបត្តិការរបស់សហគមន៍កសិកម្មទំនើបនៅត្រាំកក់ និងពន្លឿនការធ្វើសមហរណកម្មនៃផលិតកម្មបន្លែដែលមានស្រាប់នៅក្នុងស្រុកត្រាំកក់ នឹងបម្រើផលប្រយោជន៍ដោយផ្ទាល់ផង ដោយប្រយោលផង ដល់បងប្អូនកសិករជាច្រើនពាន់គ្រួសារនៅក្នុងតំបន់នេះ។

ជំនួសមុខឱ្យ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម ​រុក្ខាប្រមាញ់ និងនេសាទ ក៏ដូចជាសហគមន៍អ្នកដាំបន្លែនៅក្នុងឃុំត្រាំកក់ទាំងមូល ឯកឧត្តម ​ឃឹម ហ្វីណង់ បានថ្លែងអំណរគុណយ៉ាងជ្រាលជ្រៅដល់ ឯកឧត្តម ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងក្រុមការងាររាជរដ្ឋាភិបាលចុះមូលដ្ឋានខេត្តទាំង៣ សម្រាប់ការវិនិយោគលើការអភិវឌ្ឍសេដ្ឋកិច្ចសហគមន៍មូលដ្ឋានប្រកបដោយអត្ថន័យមួយនេះ។

ជាមួយគ្នានេះ ឯកឧត្តម​ ឃឹម​ ហ្វីណង់ បានបញ្ជាក់ពីកិច្ចព្រមព្រៀងហិរញ្ញប្បទានឥតសំណងបំពេញបន្ថែមលើទុនវិនិយោគពីគម្រោងពិពិធកម្មកសិកម្មកម្ពុជា ជូនដល់សហគមន៍កសិកម្មទំនើបត្រាំកក់ផងដែរ រួមមាន៖ -ហិរញ្ញប្បទានឥតសំណង៤០%ស្មើនឹងតម្លៃ ១៦២​,១៥០ដុល្លារអាមេរិក។ ការជួយធ្វើផ្លូវថ្នល់ប្រវែង​​​៥,៥គីឡូម៉ែត្រ (ផ្លូវក្រាលកៅស៊ូប្រភេទ DBSTប្រវែង ២.៥គម និងបេតុងទទឹង៦ម ប្រវែង ៣គម) ដែលគ្រោងថវិកាប្រមាណ ១,៥០១,២០០ដុល្លារអាមេរិក ។

ដោយឡែក ការជួយទៅដល់ប្រព័ន្ធធារាសាស្រ្តក្រៅកសិដ្ឋាន៖ កែលម្អប្រព័ន្ធធារាសាស្រ្ត ដើម្បីពង្រីកផ្ទៃដីស្រោចស្រពប្រព័ន្ធទុយោ ចែកចាយទឹក សម្រាប់ផ្ទៃដីដាំដុះចំនួន ១,១៥០ហិកតា ដែលគ្រោងចំណាយថវិកាប្រមាណ ២,៣៨០,០០០ ដុល្លារអាមេរិក។

ឯកឧត្តម​ ឃឹម​ ហ្វីណង់ បានបញ្ជាក់ថា នេះគឺជាការវិនិយោគសាធារណៈក្នុងទ្រង់ទ្រាយធំមួយពីសំណាក់រាជរដ្ឋាភិបាល ចាក់បញ្ចូលទៅក្នុងការអភិវឌ្ឍសេដ្ឋកិច្ចសហគមន៍មូលដ្ឋាន ដែលបានបង្ហាញពីការប្តេជ្ញាចិត្តឈរជើងរឹងមាំយូរអង្វែងនៅលើទីតាំងយុទ្ធសាស្ត្រនៃកិច្ចសហប្រតិបត្តិការ«ត្រីវិស័យ» រវាងសហគមន៍កសិកម្មទំនើបនៃក្រសួងកសិកម្ម សហគមន៍កសិករប្រើប្រាស់ទឹកនៃក្រសួងធនធានទឹក និងគម្រោងភូមិគំរូនៃក្រសួងអភិវឌ្ឍន៍ជនបទ។