សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពីរ៉យទ័រ បានរាយការណ៍ថា អារ៉ាប៊ីសាអូឌីត បានត្រៀមខ្លួនរួចជាស្រេចដើម្បីពិភាក្សាអំពីការជួញដូររូបិយប័ណ្ណនានាក្រៅពីប្រាក់ដុល្លារអាមេរិក ខណៈដែលខ្លួនក៏កំពុងពង្រឹងកិច្ចទំនាក់ទំនងពាណិជ្ជកម្មជាមួយប្រទេសមហាអំណាចសេដ្ឋកិច្ចយក្សចិន។
កាលពីថ្ងៃដើមសប្ដាហ៍កន្លងទៅនេះ រដ្ឋមន្ត្រីហិរញ្ញវត្ថុរបស់អារ៉ាប៊ីសាអូឌីត លោក Mohammed Al-Jadaan បានលើកឡើងថា ៖ វាមិនមានបញ្ហាអ្វីនោះទេក្នុងការពិភាក្សាអំពីរបៀបដោះស្រាយក្នុងការរៀបចំខ្សែចង្វាក់ពាណិជ្ជកម្ម ថាតើគួរប្រើប្រាស់ជាប្រាក់ដុល្លារអាមេរិក ជាប្រាក់អឺរ៉ូ ឬ ជាប្រាក់រីយ៉ាល់របស់អារ៉ាប៊ីសាអូឌីត?
ផែនការនេះត្រូវបានរៀបចំឡើងបន្ទាប់ពីប្រធានាធិបតីចិន លោក Xi Jinping បាននិយាយថា ទីក្រុងប៉េកាំងត្រៀមខ្លួនជាស្រេចដើម្បីធ្វើការទិញថាមពលជាប្រាក់យ័នជំនួសឱ្យប្រាក់ដុល្លារអាមេរិកក្នុងការធ្វើពាណិជ្ជកម្មជាមួយសមាជិកនៃក្រុមប្រឹក្សាសហប្រតិបត្តិការនៃតំបន់ឈូងសមុទ្រ (GCC)។ លោកប្រធានាធិបតីក៏បានគូសបញ្ជាក់ពីភាពចាំបាច់នៃការផ្លាស់ប្តូរនេះផងដែរ នៅក្នុងកិច្ចប្រជុំកំពូលចិន-អារ៉ាប់ ដែលរៀបចំដោយអារ៉ាប៊ីសាអូឌីត កាលពីថ្ងៃដើមសប្តាហ៍នេះកន្លងទៅនេះ។
នៅក្នុងរយៈពេលប៉ុន្មានឆ្នាំចុងក្រោយនេះ អារ៉ាប៊ីសាអូឌីត បានបង្ហាញពីឆន្ទៈក្នុងការជំរុញកិច្ចសហប្រតិបត្តិការពាណិជ្ជកម្មប្រេងជាមួយប្រទេសចិន ដែលជាប្រទេសនាំចូលប្រេងឆៅដ៏ធំបំផុតរបស់ពិភពលោក។ កាលពីខែកន្លងទៅនេះ ចិន និងអារ៉ាប៊ីសាអូឌីត បានព្រមព្រៀងគ្នាក្នុងការពង្រីកពាណិជ្ជកម្មប្រេងឆៅ ខណៈដែលពួកគេបានធ្វើឱ្យប្រសើរឡើងនូវទំនាក់ទំនងរបស់ពួកគេទៅជាភាពជាដៃគូយុទ្ធសាស្ត្រ ក្នុងអំឡុងពេលដំណើរទស្សនកិច្ចរបស់ប្រធានាធិបតីចិន Xi Jinping នៅរដ្ឋធានីរីយ៉ាដប្រទេសអារ៉ាប៊ីសាអូឌីត។
មិនត្រឹមតែប៉ុណ្ណោះ ចិនមានបំណងជំរុញរូបិយប័ណ្ណប្រាក់យ័នរបស់ខ្លួននៅក្នុងពាណិជ្ជកម្មប្រេងអន្តរជាតិ។ ក្នុងអំឡុងដំណើរទស្សនកិច្ចនោះផងដែរ លោកប្រធានាធិបតី Xi Jinping បានសន្យាថានឹងបង្កើនកិច្ចខិតខំប្រឹងប្រែងដើម្បីលើកកម្ពស់ការប្រើប្រាស់ប្រាក់យ័ននៅក្នុងវិស័យថាមពល និងបានស្នើនៅក្នុងកិច្ចប្រជុំកំពូលមួយក្នុងរដ្ឋធានីអារ៉ាប៊ីសាអូឌីតថា បណ្តាប្រទេសនៃក្រុមប្រឹក្សាសហប្រតិបត្តិការនៃតំបន់ឈូងសមុទ្រ (GCC) គួរតែអនុវត្តការទូទាត់ពាណិជ្ជកម្មរបស់ខ្លួនជាប្រាក់យ័ន។
ថ្មីៗនេះ និន្នាការឆ្ពោះទៅរកការផ្លាស់ប្តូរទៅជារូបិយប័ណ្ណជាតិ ត្រូវបានអនុវត្តដោយប្រទេសសំខាន់ៗនៅក្នុងខ្សែសង្វាក់ពាណិជ្ជកម្មពិភពលោក ដោយសារគោលនយោបាយនៃទណ្ឌកម្មបន្ទាប់បន្សំរបស់ទីក្រុងវ៉ាស៊ីនតោននៅតែបន្តមាន។ គេយល់ឃើញថា ការចៀសឆ្ងាយពីប្រាក់ដុល្លារ អាចជាលទ្ធផលដែលប្រទេសលោកខាងលិចដាក់ទណ្ឌកម្មមកលើរុស្ស៊ី ដែលជាប្រទេសផលិត និងអ្នកនាំចេញថាមពលដ៏សំខាន់មួយរបស់ពិភពលោក ជាពិសេសវិធានការនេះត្រូវបានអនុវត្តមុនដំបូងគេក្នុងវិស័យថាមពល។
គួរឲ្យបញ្ជាក់ផងដែរថា អារ៉ាប៊ីសាអូឌីត គឺជាប្រទេសសម្បូរប្រេងដ៏ធំមួយរបស់ពិភពលោក ពេលនេះកំពុងស្វែងរកការពង្រឹងទំនាក់ទំនងរបស់ខ្លួនជាមួយដៃគូពាណិជ្ជកម្មសំខាន់ៗ រួមទាំងប្រទេសចិនផងដែរ។ ការត្រៀមខ្លួនសម្រាប់ការពិភាក្សាលើបញ្ហាដែលរៀបចំដោយទីក្រុងរីយ៉ាដ អាចជាសញ្ញាថាក្រុមហ៊ុននាំចេញប្រេងដ៏ធំបំផុតរបស់ពិភពលោកបានបើកចំហររួចជាសេ្រចក្នុងការចៀសឆ្ងាយពីប្រាក់ដុល្លារអាមេរិក ខណៈដែលរីយ៉ាល់គឺជារូបិយប័ណ្ណជាតិរបស់អារ៉ាប៊ីសាអូឌីតធ្លាប់មានសម្ព័ន្ធភាពល្អជាមួយនឹងប្រាក់ដុល្លារអាមេរិក៕
Account
Security
Favourite Content