សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
មន្ត្រីកសិកម្មឃុំ ជាទីភ្នាក់ងារផ្សព្វផ្សាយបច្ចេកទេសកសិកម្មដល់ប្រជាកសិករតាមតំបន់ដោយផ្ទាល់ តាមរយៈការចុះពន្យល់ណែនាំពីបច្ចេកទេស និងវិធានការផ្សេងៗនៅពេលកសិករជួបបញ្ហា។ ក្នុងនោះ មន្ត្រីកសិកម្មប្រចាំឃុំមួយរូបដែលកំពុងបំពេញតួនាទី និងភារកិច្ចរបស់ខ្លួនក្នុងខេត្តកំពង់ធំ បានបង្ហាញពីការប្ដេជ្ញាចិត្តក្នុងនាមជាមន្ត្រីកសិកម្មចូលរួមជាមួយប្រជាកសិករ ដែលធ្វើយ៉ាងណាអាចជំរុញការបង្ករបង្កើនផលឱ្យទទួលបានលទ្ធផលវិជ្ជមាន។
លោក វឿន ឆេងវុន ជាមន្ត្រីកសិកម្មប្រចាំឃុំសំបូរណ៍ ស្រុកប្រាសាទសំបូរ ខេត្តកំពង់ធំ បានប្រាប់ពីមូលហេតុដែលជំរុញឱ្យលោកចាប់យកការងារជាមន្ត្រីកសិកម្មក្នុងស្រុកកំណើតរបស់ខ្លួនវិញថា៖
«មូលហេតុដែលខ្ញុំប្រឡងធ្វើជាមន្ត្រីកសិកម្ម ហើយត្រឡប់មកស្រុកវិញ ដើម្បីចុះជួយពន្យល់កសិករពីការប្រើប្រាស់ជីគីមី ព្រោះតាមការសង្កេតគឺមានការប្រើប្រាស់សារធាតុគីមីច្រើន ធ្វើឱ្យប៉ះពាល់ដល់ប្រព័ន្ធអេកូឡូស៊ី បាត់បង់សត្វល្អិតមានប្រយោជន៍ ហើយមួយទៀតក៏ដើម្បីជួយជំរុញបច្ចេកទេសដាំដុះរបស់កសិករក្នុងឃុំសំបូរណ៍នេះឱ្យបានកាន់តែប្រសើរ»។
ជាមួយនឹងការតាំងចិត្តខ្ពស់ លោក វឿន ឆេងវុន បានចុះមកប្រចាំការនៅក្នុងភូមិឃុំខាងលើអស់រយៈពេលប្រមាណ ៦ខែ ហើយបើតាមការសិក្សាកន្លងមកគឺ ឃុំសំបូរណ៍នេះផ្ទាល់មានដំណាំសក្ដានុពលចំនួន ៣ ធំៗគឺ ស្វាយចន្ទីប្រមាណ ២៣០០ហិកតា ស្រូវប្រាំងប្រមាណជា ១២០០ហិកតា និងដំណាំសេដ្ឋកិច្ចមួយទៀត គឺ ដំឡូងមីមានផ្ទៃដីដាំដុះប្រមាណ ៩៩០ហិកតា ក្រៅពីនេះក៏មានបន្លែ និងដំណាំបន្ទាប់បន្សំផ្សេងទៀតផងដែរ។
មន្ត្រីកសិកម្មវ័យក្មេងរូបនេះរៀបរាប់ទៀតថា ៖
«អនុវត្តតាមគោលការណ៍របស់ក្រសួង យើងបានចុះផ្សព្វផ្សាយចំនួន ១០ភូមិ អំពីការដាំដុះស្រូវផ្ការំដួង ដែលជាពូជរបស់ជាតិ ដូច្នេះហើយកសិករមួយចំនួនគាត់ក៏បានចាប់អារម្មណ៍ក្នុងការដាំដុះស្រូវពូជផ្ការំដូលនេះ ហើយយើងក៏បានជួយសម្របសម្រួលពូជស្រូវដល់កសិករបានមួយចំនួន ដោយក្នុងនោះមាន ៤គ្រួសារដែលយើងបានជ្រើសរើសជាកសិករគំរូ ដាំពូជផ្ការំដួលសុទ្ធនៅក្នុងសហគមន៍កសិកម្មយើងផ្ទាល់»។
លោកបន្តថា ៖
«ក្រៅពីនេះ សកម្មភាពកន្លងមកគឺយើងបានចុះផ្សព្វផ្សាយជាមួយកសិករពាក់ព័ន្ធនឹងការប្រើប្រាស់ជីលើដំណាំដំឡូងមី ជាក់ស្ដែងនៅកសិករនៅក្នុងតំបន់មានចំណេះដឹងកសិកម្មនៅមានកម្រិត ដែលយើងបានណែនាំពីការប្រើជីទ្រាប់បាត និងការថែទាំនៅចន្លោះពេលដាំដុះ។ មួយទៀតគឺបញ្ហារោគម៉ូសាអ៊ិចដែលកើតលើដំណាំដំឡូងមី ដែលយើងបានពន្យល់ពីមូលហេតុ និងវិធានការសំខាន់ៗផងដែរ»។
ជាមួយនឹងការបង្ហើបប្រាប់ពីកិច្ចការងាររបស់ខ្លួនប្រចាំឃុំសំបូរណ៍ ស្រុកប្រាសាទសំបូរ ខេត្តកំពង់ធំ លោក វឿន ឆេងវុន ក៏បង្ហាញពីក្ដីរំពឹងទុកដែរថា ក្នុងពេលល៣ឆ្នាំទៅមុខទៀត កសិករក្នុងឃុំសំបូរណ៍នឹងមានការយល់ដឹងច្រើនពាក់ព័ន្ធនឹងការធ្វើកសិកម្ម និងការបង្កើនទិន្នផលដំណាំសេដ្ឋកិច្ចធំៗ ហើយជាយោបល់របស់លោកផ្ទាល់ កសិករគួរតែយកចិត្តទុកដាក់ទៅលើការសម្អាតដីស្រែឱ្យស្អាត ដោយហាលដីទុកប្រមាណ ១សប្ដាហ៍បន្ទាប់ពីភ្ជួរលើកទី១ ដើម្បីការពារកុំឱ្យមានស្មៅយាយីច្រើនដល់ដំណាំស្រូវ ទើបផលដំណាំអាចទទួលបានល្អ៕
Account
Security
Favourite Content