ឆ្នាំ២០២៤ ជាពេលវេលាដែលកាន់តែមានការប្រកួតប្រជែងទៅលើគ្រប់មុខអាជីវកម្ម ក៏ដូចជាមុខជំនួញនានាតាមរយៈការប្រើប្រាស់ប្រព័ន្ធឌីជីថល់ ខណៈដែលរាជរដ្ឋាភិបាលក៏បាន និងកំពុងជំរុញឱ្យមានការសិក្សា អនុវត្តបច្ចេកវិទ្យាឱ្យបានស៊ីជម្រៅដែលស្របទៅនឹងយុទ្ធសាស្ត្របញ្ចកោណដំណាក់កាលទី១ ។

យ៉ាងណាក៏ដោយ ទោះជាអ្នកកំពុងដំណើរការអាជីវកម្ម ឬគ្រោងនឹងចាប់ផ្តើមអាជីវកម្មថ្មីក្តី ក៏ត្រូវតែពិចារណាទៅលើវិធី ៦ យ៉ាងខាងក្រោមនេះ ដែលអាចក្លាយជាជំនួយការរបស់អ្នកដ៏មានប្រសិទ្ធភាពដើម្បីបង្កើនលទ្ធភាពក្នុងការពង្រីកអាជីវកម្មបាន។

១.ផ្តោតការទំនាក់ទំនងអាជីវកម្មដែលមានអាយុកាលវែង ៖ តើផលិតផលរបស់អ្នកជាវត្ថុដែលអតិថិជនរបស់អ្នកមិនអាចខ្វះបាន ឬមានគុណប្រយោជន៍ខ្លាំងប៉ុណ្ណា ? មិនថាអាជីវកម្មរបស់អ្នកជាការលក់សេវាកម្ម ឬផលិតផលនោះទេ អ្នកត្រូវតែច្នៃប្រតិដ្ឋវាឲ្យទៅជាផលិតផលដែលមានទំនាក់ទំនងខ្លាំងជាមួយនឹងអតិថិជន។

២.យល់ និងផ្តោតសំខាន់លើអតិថិជនគោលដៅ ៖ ការប្រកួតប្រជែងកើតមាននៅគ្រប់ទីកន្លែង ប៉ុន្តែតើអ្នកបានដឹងទេថា អតិថិជនប្រភេទណាដែលបានគិតថាផលិតផលរបស់អ្នកគឺវត្ថុដ៏អស្ចារ្យបំផុតសម្រាប់ពួកគេទេ? ស្វែងរក និងកំណត់ឲ្យបានច្បាស់នូវក្រុមអតិថិជនទាំងនោះ ហើយស្វែងយល់បន្ថែមអំពីចំណង់របស់គេ នោះអាជីវកម្មរបស់អ្នកនឹងគ្មានពាក្យថាលក់មិនដាច់នោះឡើយ។

៣.បណ្តាញសង្គម ៖ ក្នុងសម័យកាលនេះ បណ្តាញសង្គមត្រូវបានប្រដូចទៅនឹងកាំភ្លើងធំ និងទំនើបបំផុតសម្រាប់ធ្វើសង្គ្រាមប្រជែងទីផ្សារ។ តើអ្នកបានយល់ដឹងអ្វីខ្លះពីវា? យ៉ាងហោចណាស់ក៏បានដឹងពីរបៀបនៃការប្រើប្រាស់ជាមូលដ្ឋានដែរ ទើបអ្នកអាចស្វែងរកអ្នកជំនាញមកជួយអ្នកបាន បើមិនដូច្នេះ សូម្បីតែគេនិយាយអ្វីក៏អ្នកមិនយល់ដែរថា ត្រូវធ្វើម៉េចទើបអាចទាញយកប្រយោជន៍ពីវាបាន។

៤.ទាក់ទងផ្ទាល់ជាមួយនឹងអតិថិជន ៖ ជាក្បាច់ថ្មី និងងាយស្រួលមែនទែន។ បច្ចុប្បន្នមនុស្សម្នាក់យ៉ាងហោចណាស់ក៏មាន Facebook, Twitter, Linkedin ឬ Telegram ដែរ ដែលវាសុទ្ធតែជាសេវាដោយមិនមានចំណាយប្រាក់ច្រើនឡើយ។ តើអ្នកពិតជាចង់ឲ្យយីហោរបស់អ្នកល្បីល្បាញ និងទទួលស្គាល់ខ្លាំងដែរឬទេ។ អតិថិជនម្នាក់ ប្រើវិធីទំនាក់ទំនងមួយទល់នឹងមួយជារឿងល្អបំផុតទោះបីជាត្រូវចំណាយពេលច្រើនបន្តិចក្តី។

៥ . ផ្តល់ជូនកញ្ចប់ពិសេសសាមញ្ញៗ និងងាយៗ ៖ ឌីសាញកញ្ចប់ផលិតផលរបស់អ្នកឲ្យលើសពីផលិតផលធម្មតាជាមួយនឹងគុណតម្លៃបន្ថែម ប៉ុន្តែក្នុងលក្ខខណ្ឌងាយៗ និងសាមញ្ញ អាចទទួលយកបាន។ ឧទាហរណ៍ ទិញម៉ូតូក្នុងខែនេះ ប្រគល់ជូនមួកសុវត្ថិភាព ស្រោមដៃឈុតជិះម៉ូតូជាដើម។

៦.វិនិយោគលើយីហោរបស់អ្នកម្តងទៀត ៖ ពិនិត្យលើទិន្នន័យលក់របស់អ្នកពីត្រីមាសទី១ ដល់ត្រីមាសទី៤ ថាតើពេលណាដែលការលក់របស់អ្នកធ្លាក់ចុះខ្លាំង។ ដូចនេះអ្នកនឹងអាចរៀបចំកញ្ចប់ថវិកាមួយចំនួនដើម្បីត្រៀមសម្រាប់ផែនការឆ្នាំក្រោយនៅក្នុងរដូវកាលមួយនោះ ឬចាយទៅលើការផ្សព្វផ្សាយយីហោបន្ថែមទៀតពីចម្ងាយ៕