ភ្នំពេញ៖ សហព័ន្ធដំឡូងមីកម្ពុជា និងសមាគមដំឡូងមីវៀតណាម បានចុះអនុស្សរណៈនៃការយោគយល់គ្នាលើការទិញ-លក់ដំឡូងមីស្រស់ក្នុងបរិមាណប្រមាណ ៩លានតោនក្នុងួយឆ្នាំ កាលពីរសៀលថ្ងៃទី២៣ ​ខែតុលា ឆ្នាំ២០២៥ នៅទីស្ដីការក្រសួងពាណិជ្ជកម្ម។

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានអញ្ជើញជាសាក្សីក្នុងពិធីចុះអនុស្សរណៈនៃការយោគយល់គ្នានេះ និងមានការចូលរួមពីឯកឧត្តម លោកជំទាវ ថ្នាកដឹកនាំក្រសួងពាណិជ្ជកម្ម តំណាងស្ថានទូត​វៀតណាម​នៅកម្ពុជា សហព័ន្ធដំឡូងមីកម្ពុជា សមាគមដំទ្បូងមីវៀតណាម តំណាងធនាគារ ARDB, ធនា​គា​រ​ SME និងក្រុមហ៊ុនប្រមូលទិញដំឡូងមីកម្ពុជា និងវៀតណាម ព្រមទាំងដៃគូអភិវឌ្ឍន៍ជាច្រើននាក់។

យោងតាមក្រសួងពាណិជ្ជកម្ម បានឱ្យដឹងថា អនុស្សរណៈនេះមានគោលបំណងពង្រឹង និងកែលម្អផលិតកម្ម ការកែច្នៃ និងជំរុញការទិញ-លក់ដំឡូងមី រវាងកម្ពុជា និងវៀតណាម ដែលតាមរយៈនេះនឹងជំរុញការនាំចេញដំឡូងមីស្រស់ពីកម្ពុជាប្រមាណ៩លានតោនក្នុង១ឆ្នាំ។ ក្រៅពីអនុស្សរណៈនៃការយោគយល់គ្នា ក្រុមហ៊ុនប្រមូលទិញដំទ្បូងមីកម្ពុជា-វៀតណាម ចំនួន៤ ក៏បានចុះកិច្ចសន្យាទទួលទិញដំឡូងមីស្រស់ពីកម្ពុជាក្នុងរង្វង់ជាង៣លានតោនក្នុង១ឆ្នាំផងដែរ។

​សូមបញ្ជាក់ថា នៅក្នុងគោលនយោបាយជាតិ ស្ដីពីដំឡូងមី រដ្ឋាភិបាលបានចាត់ទុកដំណាំនេះជាដំណាំធំទី២ បន្ទាប់ពីដំណាំស្រូវ ហើយត្រូវមានការគាំទ្រពិសេសដើម្បីទាញយកប្រយោជន៍ឱ្យបានជាអតិបរមា និងការអភិវឌ្ឍដំណាំនេះឱ្យក្លាយជាកម្លាំងចលករដ៏ខ្លាំងក្លាមួយក្នុងការធ្វើបដិវត្តន៍កសិ-ឧស្សាហកម្មនៅកម្ពុជា ដែលទិសដៅនេះត្រូវបានកំណត់ក្នុងគោលនយោបាយអភិវឌ្ឍន៍ឧស្សាហកម្ម ២០១៥-២០២៥ ដោយរំពឹងថា ផលិតកម្មដំឡូងមីអាចនឹងរួមចំណែកពី៣% ទៅ៤% នៃផលិតផលក្នុងស្រុកសរុប​។

ជារៀងរាល់ឆ្នាំ ថវិកាស្ទើរតែ៣០០លានដុល្លារអាម៉េរិក ត្រូវបានគេវិនិយោគដើម្បីដាំដុះ ខណៈការនាំចេញភាគច្រើននៅក្នុងទម្រង់ជាផលិតផលមិនទាន់កែច្នៃ និងជាចំណិតដំឡូងមីក្រៀម ដែលមានទំហំប្រមាណ ​៧២៨​លាន​ដុល្លារក្នុងមួយឆ្នាំ។

លោក ច្រាយ សុន ប្រធានសហព័ន្ធដំឡូងមីកម្ពុជា បានឱ្យដឹងថា អនុវិស័យដំឡូងមីបានរកចំណូលបានប្រមាណជាង៧០០ លានដុល្លារដល់សេដ្ឋកិច្ចជាតិ ដែលធ្វើឱ្យកម្ពុជា​ក្លាយជាប្រទេសនាំចេញដំឡូងមីធំជាងគេទី៤ នៅអាស៊ី និងទី១០ នៅលើពិភពលោក។ កម្ពុជានាំចេញដំឡូងមីស្រស់ ៩៥% ហើយកែច្នៃក្នុងស្រុក ៥% ដែលបានរួមចំណែកប្រមាណ ៧២៨ លានដុល្លារដល់សេដ្ឋកិច្ចជាតិជាប្រចាំឆ្នាំ។

លោកបានបន្តថា៖ កម្ពុជា ជាប់ចំណាត់ថ្នាក់ជាប្រទេសនាំចេញដំឡូងមីធំជាងគេទី៤ នៅអាស៊ី និងទី១០ នៅលើពិភពលោក ដែលមានផ្ទៃដីដាំដុះដំឡូងមីប្រមាណ ៦០ម៉ឺន ទៅ ៨០ម៉ឺនហិកតា។ មើមដំឡូងមីអាចត្រូវបានកែច្នៃទៅជាផលិតផលច្រើនប្រភេទ រួមមាន ម្សៅដំឡូងមី និងកែច្នៃបន្ត (reprocessing) ទៅជាផលិតផលចំណីអាហារ ដូចជា នំប៉័ង នំស្រួយ ភេសជ្ជៈ ឬចំណីសត្វជាដើម។

យោងទៅតាមក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា នៅក្នុងត្រីមាសទី១ ឆ្នាំ២០២៥ នេះ ការនាំចេញដំឡូងមីស្រស់របស់កម្ពុជា សម្រេចបាន ១,០៨ លានតោន មានការធ្លាក់ចុះជាង ១៦%, ចំណែកចំណិតដំឡូងមី កើន ៣៣,៧០% និងម្សៅដំឡូងមី កើនឡើង ១,៦៧%៕

​