សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បន្ទាប់ពីក្រុមហ៊ុនអភិវឌ្ឍន៍អាកាសយានដ្ឋានអន្តរជាតិតេជោ ( OCIC ) បានប្រកាសពីគម្រោងសាងសង់ផ្លូវទឹកមួយខ្សែមានប្រវែង១០គីឡូម៉ែត្រ ដើម្បីតភ្ជាប់ពីអាកាសយានដ្ឋានទៅគម្រោងព្រែកជីកហ្វូណនតេជោ អ្នកជំនាញក្នុងវិស័យអចលនទ្រព្យបានសាទរ និងរំពឹងទុកខ្ពស់ថា តំបន់នៅជុំវិញព្រលានយន្តហោះថ្មីនេះ នឹងកាន់តែមានភាពទាក់ទាញ ហើយរីកចម្រើនខ្លាំងនាពេលខាងមុខដ៏ខ្លីនេះ ។
អ្នកឧកញ៉ាបណ្ឌិត សំ សុខនឿន ប្រធានសម្ព័ន្ធក្រុមហ៊ុន SAM SN Group និងជាអ្នកជំនាញផ្នែកអចលនទ្រព្យនៅកម្ពុជាមួយរូបបានលើកឡើងថា ការសាងសង់ផ្លូវទឹកតភ្ជាប់ពីព្រលានយន្តហោះអន្តរជាតិទៅព្រែកជីកហ្វូណនតេជោនឹងជួយឱ្យការដឹកជញ្ជូនមានភាពងាយស្រួល កាត់បន្ថយថ្លៃដើមបានច្រើនជាងមុន ហើយនឹងពន្លឿនដល់ការដឹកជញ្ជូនតាមផ្លូវទឹកសាប និងផ្លូវសមុទ្ររបស់កម្ពុជា ពីព្រោះថាក្នុងគម្រោងរបស់ក្រុមហ៊ុនអភិវឌ្ឍន៍អាកាសយានដ្ឋានអន្តរជាតិតេជោ គឺមានច្រើន ដូចជា ការបង្កើតមជ្ឈមណ្ឌលភស្តុភារកម្ម និងការបង្កើតផ្លូវទឹកថ្មីៗជាដើម ។
អ្នកឧកញ៉ាបន្តថា ៖
«យើងគ្រប់គ្នាពិតជាបានដឹងហើយថា ព្រែកជីកហ្វូណនពិតជាមានសារសំខាន់ណាស់សម្រាប់ការដឹកជញ្ជូនក្នុងប្រទេសកម្ពុជាយើង ។ វត្តមានព្រែកជីកហ្វូណនតេជោនេះ នឹងអាចផ្សារភ្ជាប់ផ្លូវដឹកជញ្ជូនកម្ពុជាពីទន្លេទៅសមុទ្រ ហើយអាចកាត់បន្ថយថ្លៃដើមនៃការដឹកជញ្ជូន ខណៈបច្ចុប្បន្ននេះ ការដឹកជញ្ជូនក្នុងប្រទេសកម្ពុជាភាគច្រើនធ្វើឡើងតាមផ្លូវគោក ដែលធ្វើឱ្យថ្លៃដើមនៃការដឹកជញ្ជូនខ្ពស់ »។
អ្នកឧកញ៉ាបន្តទៀតថា នៅពេលគម្រោងព្រែកជីកហ្វូណនតេជោលេចជារូបរាងឡើង នឹងអាចទាក់ទាញវិនិយោគិនបរទេសចូលមកបណ្ដាក់ទុនវិនិយោគនៅក្នុងប្រទេសកម្ពុជាបន្ថែមទៀត ជាពិសេសក្នុងវិស័យឧស្សាហកម្ម ដែលអាចធ្វើឱ្យកម្ពុជាសំបូរទំនិញដែលផលិតក្នុងស្រុក ធ្វើឱ្យតម្លៃទំនិញក្នុងប្រទេសធ្លាក់ចុះមួយកម្រិត ។ អ្វីដែលរឹតតែពិសេស គឺកម្ពុជាផ្ទាល់ក៏អាចដឹកជញ្ជូនទំនិញពីកម្ពុជាទៅទីផ្សារខាងក្រៅបាន ក៏ដូចជាការដឹកជញ្ជូនទំនិញពីខាងក្រៅចូលមកកម្ពុជាផងដែរ។
អ្នកឧកញ៉ាបន្ថែមថា សម្រាប់តំបន់នៅជុំវិញព្រលានយន្តហោះអន្តរជាតិតេជោ នឹងមានមនុស្សទៅរស់នៅកាន់តែច្រើន ជាក់ស្ដែងចាប់តាំងពីព្រលានយន្តហោះអន្តរជាតិនេះចាប់ផ្ដើមសាងសង់រហូតដល់រួចរាល់ មានគម្រោងអភិវឌ្ឍន៍លំនៅឋានជាច្រើន ហើយថ្មីៗនេះ ក្រុមហ៊ុនអភិវឌ្ឍន៍ព្រលានយន្តហោះតេជោ OCIC ក៏បានអភិវឌ្ឍន៍លំនៅឋានតម្លៃសមរម្យ ដែលនឹងអាចទាក់ទាញមនុស្សទៅរស់នៅតំបន់នោះកាន់តែច្រើន ។
អ្នកស្រី អាន សុធីតា នាយិកាប្រតិបត្តិក្រុមហ៊ុនអចលនទ្រព្យ PropNex Cambodia បានលើកឡើងថា ការអភិវឌ្ឍហេដ្ឋារចនាសម្ព័ន្ធច្រើននៅប៉ែកខាងត្បូងរាជធានីភ្នំពេញ បានជំរុញឱ្យក្រុមហ៊ុនអភិវឌ្ឍន៍លំនៅឋានចូលទៅទីនោះច្រើន ហើយទាក់ទាញពលរដ្ឋទៅរស់នៅក៏កាន់តែច្រើន ដែលធ្វើឱ្យកើតមានផ្សារទំនើប និងអាជីវកម្ម ក៏ដូចជាសេវាកម្មផ្សេងៗសម្រាប់បម្រើដល់សេចក្ដីត្រូវការរបស់មនុស្សប្រចាំថ្ងៃចូលទៅកាន់ទីនោះ ដើម្បីផ្គត់ផ្គង់ដល់ការរស់នៅរបស់ពលរដ្ឋ ។
គួររម្លឹកថា ក្រុមហ៊ុនអភិវឌ្ឍន៍អាកាសយានដ្ឋានអន្តរជាតិតេជោ បានប្រកាសពីគម្រោងសាងសង់ផ្លូវទឹកមួយខ្សែតភ្ជាប់ពីអាកាសយានដ្ឋានអន្តរជាតិតេជោទៅទន្លេបាសាក់ និងភ្ជាប់ទៅកាន់ព្រែកជីកហ្វូណនតេជោ ខណៈចក្ខុវិស័យរបស់ក្រុមហ៊ុនគ្រោងនឹងអភិវឌ្ឍន៍តំបន់នៅជុំវិញអាកាសយានដ្ឋានឱ្យក្លាយទៅជាមជ្ឈមណ្ឌលភស្តុភារកម្ម ដោយមានការដឹកជញ្ជូនទាំងផ្លូវគោក ផ្លូវអាកាស និងផ្លូវទឹក៕
Account
Security
Favourite Content