សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កិច្ចប្រជុំរដ្ឋមន្ត្រីនៃវេទិកានយោបាយជាន់ខ្ពស់ ឆ្នាំ២០២៥ ធ្វើនៅទីស្នាក់ការអង្គការសហប្រជាជាតិ នាទីក្រុងញ៉ូយ៉ក សហរដ្ឋអាមេរិក កាលពីពេលថ្មីៗនេះ បានផ្តោតលើបញ្ហាអាទិភាពជាច្រើន ដោយក្នុងនោះផ្តោតសំខាន់ផងដែរ លើការងារសមរម្យ និងកំណើនសេដ្ឋកិច្ច។
ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេសអនុប្រធានទី ២ ក្រុមប្រឹក្សាអភិវឌ្ឍន៍កម្ពុជា បានអញ្ជើញចូលរួម និងថ្លែងក្នុងកិច្ចប្រជុំរដ្ឋមន្ត្រីនៃវេទិកានយោបាយជាន់ខ្ពស់ឆ្នាំ២០២៥ ដែលជាវេទិកាដ៏សំខាន់មួយរបស់អង្គការសហប្រជាជាតិ សម្រាប់តាមដាន និងត្រួតពិនិត្យវឌ្ឍនភាពនៃការអនុវត្តរបៀបវារៈឆ្នាំ២០៣០ ។
ឯកឧត្តមបានមានប្រសាសន៍ថា កិច្ចប្រជុំនេះធ្វើឡើងក្រោមមូលបទស្តីពីការជំរុញដំណោះស្រាយផ្អែកលើសក្ខីកម្ម និងវិទ្យាសាស្ត្រប្រកបដោយចីរភាព និងបរិយាប័ន្ន ចំពោះរបៀបវារៈឆ្នាំ២០៣០ សម្រាប់ការអភិវឌ្ឍប្រកបដោយចីរភាព និងគោលដៅអភិវឌ្ឍន៍ប្រកបដោយចីរភាព ដោយមិនទុកនរណាម្នាក់ចោល។
តំណាងជាន់ខ្ពស់នៃប្រទេសជាសមាជិក និងតំណាងរបស់ប្រព័ន្ធអង្គការសហប្រជាជាតិ ក៏ដូចជាតួអង្គពាក់ព័ន្ធ រួមមានអង្គការសង្គមស៊ីវិល និងវិស័យឯកជន បានប្រជុំពិភាក្សាលើគោលនយោបាយសម្រាប់ពន្លឿនការអនុវត្តរបៀបវារៈឆ្នាំ២០៣០ ដោយត្រួតពិនិត្យលម្អិតលើគោលដៅអភិវឌ្ឍន៍ប្រកបដោយចីរភាពសំខាន់ៗមួយចំនួនដែលមានភាពប្រទាក់ក្រឡាគ្នាជាមួយគោលដៅដទៃទៀត គឺសុខភាពល្អ និងសុខុមាលភាព (គោលដៅទី៣), សមភាពយេនឌ័រ (គោលដៅទី ៥), ការងារសមរម្យ និងកំណើនសេដ្ឋកិច្ច(គោលដៅទី ៨), ជីវិតក្រោមទឹក (គោលដៅទី ១៤) និងភាពជាដៃគូ (គោលដៅទី១៧) ។
ក្នុងកិច្ចប្រជុំនេះ ឯកឧត្តម ឈៀង យ៉ាណារ៉ា បានលើកឡើងអំពីកិច្ចខិតខំប្រឹងប្រែងឥតងាករេរបស់រាជរដ្ឋាភិបាល និងប្រជាពលរដ្ឋកម្ពុជាក្នុងការអភិវឌ្ឍ ផ្លាស់ប្តូរមុខមាត់ប្រទេសធ្លាប់ឆ្លងកាត់នូវសង្គ្រាមរ៉ាំរៃទៅជាប្រទេសមានសន្តិភាព និងសេចក្តីថ្លៃថ្នូរ ដែលឆ្លុះបញ្ចាំងអំពីការប្តេជ្ញាចិត្ត ជាពិសេសរបស់កម្ពុជាក្នុងការថែរក្សានូវសុខសន្តិភាព, ការគោរពច្បាប់អន្តរជាតិ និងការឈានទៅសម្រេចគោលដៅអភិវឌ្ឍន៍ប្រកបដោយចីរភាព ។
ឯកឧត្តមក៏បានគូសរំលេចអំពីអភិក្រម និង/ឬការប្តេជ្ញាចិត្តគួរឱ្យកត់សម្គាល់មួយចំនួនរបស់កម្ពុជា ដែលឆ្លើយតបទៅនឹងការចូលរួមសម្រេចរបៀបវារៈសកល ជាក់ស្តែងការប្តេជ្ញាចិត្តលុបបំបាត់មេរោគ/ជំងឺអេដស៍(គាំទ្រដល់គោលដៅទី៣), ការដាក់ចេញនូវគំនិតផ្តួចផ្តើម សម្រាប់ពង្រឹងភាពអង់អាចស្ត្រី (គោលដៅទី៤), ការធ្វើពិពិធកម្មសេដ្ឋកិច្ចនិងឌីជីថលនវានុវត្តន៍(គោលដៅទី៨), ការពង្រឹងអភិបាលកិច្ចជលផល(គោលដៅទី ១៤), និងការលើកកម្ពស់ការសម្រេចចិត្តប្រកបដោយបរិយាប័ន្ន (គោលដៅទី១៧) ។
Account
Security
Favourite Content