សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តំណាងសមាគមវាយនភណ្ឌ សំលៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) បានថ្លែងកោតសរសើរចំពោះការខិតខំប្រឹងប្រែងរបស់រោងចក្រដែលជាសមាជិកសមាគម ចំនួន៤៥ សម្រាប់ការបញ្ចប់ដោយជោគជ័យនៃកម្មវិធី Model Green Factory Program (គំរូរោងចក្រដែលផ្តួចផ្ដើមបៃតង) ក្រោមកិច្ចគាំទ្រពី GIZ FABRIC Cambodia របស់ប្រទេសអាល្លឺម៉ង់ រួមទាំងក្រុមហ៊ុន GOPA ជាមួយនឹងការរៀបចំសិក្ខាសាលាស្តីពី “ការធ្វើរបាយការណ៍អំពីតម្រូវការ ការគោរពសិទ្ធិមនុស្ស និងបរិស្ថាន (HRED) និងនិរន្តរភាពសម្រាប់អ្នកបញ្ជាទិញអន្តរជាតិ” ។
សិក្ខាសាលាដែលបានធ្វើឡើងនៅទីស្នាក់ការកណ្តាលរបស់ TAFTAC កាលពីពេលថ្មីៗនេះបានសាទរចំពោះភាពជោគជ័យក្នុងជំហានឈានឆ្ពោះទៅមុខដ៏មានសារសំខាន់សម្រាប់ការផលិតប្រកបដោយនិរន្តរភាពនៅក្នុងប្រទេសកម្ពុជាលើវិស័យកាត់ដេរ ស្បែកជើង និងផលិតផលធ្វើដំណើរ (GFT)។
លោក Albert Tan អនុប្រធានសមាគម TAFTAC បានថ្លែងថា Model Green Factory Program បានបើកទ្វារឆ្ពោះទៅរកយុគសម័យថ្មីនៃនវានុវត្តន៍នៅក្នុងរោងចក្រ ដោយផ្តោតលើការបណ្តុះបណ្តាល និងការគ្រប់គ្រងទិន្នន័យ ព្រមទាំងការធ្វើជាគំរូក្នុងកិច្ចអនុវត្តប្រកបដោយចីរភាព។
លោក Albert Tan បានថ្លែងបន្តថា ចំណេះដឹងអំពីការអនុវត្តកម្មវិធី HIGG ពិតជាមានសារៈសំខាន់ ព្រោះវាជាស្តង់ដាវាយតម្លៃក្នុង ឧស្សាហកម្ម វាយនភណ្ឌ និងស្បែកជើងដើម្បីវាស់វែងពីនិរន្តរភាពនៃបរិស្ថាន និងសង្គមនៅក្នុងខ្សែច្រវាក់ផ្គត់ផ្គង់របស់រោងចក្រ។ HIGG ដែលជាគន្លឺះនៃការប៉ាន់ស្មានតម្លៃនិរន្តរភាពដែលអនុញ្ញាតឱ្យមានមធ្យោបាយវាស់វែង និងវាយតម្លៃនូវគុណភាពបរិស្ថានពីមួយឆ្នាំទៅមួយឆ្នាំ និងជំរុញភាពជាដៃគូប្រកបដោយផលិតភាពរវាងក្រុមហ៊ុន និងអ្នកបញ្ជាទិញផងដែរ ត្រូវបានបង្កើតឡើងនៅឆ្នាំ២០១២ ដោយសម្ព័ន្ធសម្លៀកបំពាក់ប្រកបដោយនិរន្តរភាព (Sustainable Clothing Alliance) ដែលជាស្ថាប័នមិនស្វែងរកប្រាក់ចំណេញមួយក្រោមការចូលរួមពីសំណាក់ម្ចាស់ម៉ាកយីហោធំៗ អ្នកលក់រាយ ម្ចាស់ក្រុមហ៊ុន ស្ថាប័នអប់រំ អង្គការមិនស្វែងរកប្រាក់ចំណេញ (NGOs) រដ្ឋាភិបាល និងភាគីពាក់ព័ន្ធជាច្រើនទៀត ដោយមានចំនួនសរុបជាង៣០០ស្ថាប័ន។
លោកបញ្ជាក់ថា គ្រប់រោងចក្រទាំងអស់ត្រូវបានរៀបចំប្រព័ន្ធគ្រប់គ្រងទិន្នន័យរបស់ខ្លួនឡើងវិញសម្រាប់ការវាយតម្លៃកម្រិតមូលដ្ឋាន។ ការណ៍នេះ មិនត្រឹមតែអាចធានាបាននូវភាពត្រឹមត្រូវក្នុងការប្រមូលទិន្នន័យប៉ុណ្ណោះទេ ថែមទាំងការវិភាគទិន្នន័យប្រតិបត្តិការផងដែរដោយនាំមកនូវតម្លាភាព និងគណនេយ្យភាព ព្រមទាំងធានាបាននូវការកែលម្អជាបន្តបន្ទាប់ ។
សូមជម្រាបថា វិស័យឧស្សាហកម្ម វាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា គឺជាវិស័យមួយដែលបានដើរតួនាទីយ៉ាងសំខាន់ក្នុងការជួយជំរុញឱ្យមានកំណើនសេដ្ឋកិច្ច ខណៈដែល រោងចក្រ-សហគ្រាសក៏ត្រូវបានបង្កើត និងបង្កើននៅតាមបណ្តាខេត្តនានាស្ទើរទូទាំងប្រទេស ដោយកើនពីចំនួន ៦៤រោងចក្រ និងមានកម្មករនិយោជិតត្រឹមប្រមាណ ៨ម៉ឺននាក់ កាលពីឆ្នាំ១៩៩៧ ដល់ចំនួន ៤០,៨៤០ រោងចក្រ សហគ្រាស និងមានកម្មករនិយោជិតសរុបប្រមាណ ១,៧ លាននាក់ គិតត្រឹមខែធ្នូ ឆ្នាំ២០២៣ ។ ក្នុងនោះដែរ វិស័យវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរ និងកាបូប មានចំនួន ១,៦៨០ រោងចក្រ និងមានកម្មករនិយោជិតសរុបចំនួន ៩១៨,៧១៨នាក់ ដោយមានទំហំទឹកប្រាក់ប្រហែល ៣ពាន់លានដុល្លារក្នុងមួយឆ្នាំ៕
Account
Security
Favourite Content