ភ្នំពេញ ៖ បើមើលក្នុងរូបភាពមួយជ្រុងតូច ការសន្សំគ្រាន់តែជាវិន័យនៅក្នុងការបែងចែកសាច់ប្រាក់មួយចំណែក​របស់បុគ្គលបម្រុងទុកសម្រាប់គោលដៅអ្វីមួយ។ ប៉ុន្តែបើគេមើលក្នុងរូបភាពជារួម ប្រាក់សន្សំរបស់ប្រជាជនស្មើទៅនឹងការកសាងទ្រព្យរបស់ប្រទេសជាតិមួយទាំងមូលតែម្ដង។ បើទោះបីជាយ៉ាងនេះក្ដី ការសន្សំ ជាទម្លាប់ដ៏លំបាកមួយដែលទាមទារឱ្យបុគ្គលម្នាក់ៗ​ប្រកាន់ខ្ជាប់​នូវវិន័យយ៉ាងតឹងរឹង ទើបអាចសម្រេចផែនការសន្សំបាន។ ផ្អែកលើគុណប្រយោជន៍ដ៏ធំធេងនៃការសន្សំនេះផងដែរ កន្លងមកស្ថាប័នពាក់ព័ន្ធតែងតែលើកទឹកចិត្តប្រជាជនឱ្យចាប់ផ្ដើមសន្សំ បើទោះបីជាមានប្រាក់ចំណូលតិចតួចក៏ដោយ។

លោក រ័ត្ន សោភ័ណ ប្រធានសមាគមធនាគារនៅកម្ពុជា ក៏បានមានប្រសាសន៍ថា ការសន្សំ​ គឺត្រូវចាប់ផ្ដើមពីការសន្សំតិចៗ ហើយបង្កើនអាត្រាសន្សំទៅ​តាមពេលវេលា និងកំណើននៃទំហំប្រាក់ចំណូល។

«យើងទាំងអស់គ្នាមានពេលវេលាធ្វើការពី ៣៥ឆ្នាំ ទៅ ៤០ឆ្នាំ ហើយចំណូលដែលយើងបាន​ពីការធ្វើការនេះគឺមានគោលដៅពីរ ទី១គឺដើម្បីបំពេញតម្រូវការបច្ចុប្បន្នរបស់ខ្លួន ក្រុមគ្រួសារ​របស់ខ្លួន ហើយសំខាន់មួយទៀតគឺការសន្សំសម្រាប់ពេលចូលនិវត្តន៍។ ដូច្នេះមិនអាចចាំដល់ជិត​ចូលនិវត្តន៍ទើបសន្សំទេ ត្រូវចាប់ផ្ដើមការសន្សំពីពេលដែលមានចំណូល​ទៅ»។ នេះបើតាមប្រ​សាសន៍​របស់​លោកប្រធានសមាគមធនាគារ នាឱកាសទិវាសន្សំអាស៊ាន កាលពីពេលកន្លងទៅ។

លោក រ័ត្ន សោភ័ណ ក៏បានបន្តឱ្យដឹងទៀតថា ការសន្សំនេះទៀតសោត​មិនមែនចាំទាល់តែ​មានលុយ​ច្រើនទើបសន្សំទេ គួរតែមានទម្លាប់សន្សំតាំងពីក្មេងមក។ ហេតុដូច្នេះហើយបាន​ជា​សមាគម​ទាំងពីរ (សមាគមធនាគារនៅកម្ពុជា និងសមាគមមីក្រូហិរញ្ញវត្ថុនៅកម្ពុជា) ​បានចំណាយធនធានធ្វើកម្មវិធី ដើម្បីអប់រំជា​សាធារណៈទៅដល់បងប្អូនទាំងអស់​អំពីការប្រើប្រាស់​សេវាហិរញ្ញវត្ថុផ្លូវការ ជាពិសេស​ទាក់ទិននឹងការសន្សំ ដោយជំរុញទឹកចិត្តប្រជាជនឱ្យចាប់ផ្ដើមសន្សំមុនប្រើប្រាស់កម្ចីផ្លូវការ។

ប្រធានសមាគមធនាគារខាងលើនេះ ក៏បានសង្កត់ធ្ងន់ផងដែរថា​ ការសន្សំ គឺជាគំនិតផ្តួចផ្តើមល្អ ហើយប្រសិនបើប្រជាជន​ជាទូទៅចាប់ផ្ដើមសន្សំច្រើន នោះក៏ស្មើទៅនឹងការចូលរួមកសាងទ្រព្យរបស់ប្រទេសជាតិផងដែរ។ កាលណាមានការសន្សំច្រើន នឹងធ្វើឲ្យទ្រព្យ​របស់​បុគ្គលកើនឡើង នៅពេលដែលទ្រព្យបុគ្គល​កើនឡើង ទ្រព្យរបស់គ្រួសារក៏កើនឡើង​ ហើយប្រសិនបើទ្រព្យរបស់​គ្រួសារនីមួយៗកើនឡើង វានឹងបន្តជំរុញឱ្យទ្រព្យរបស់សង្គមជាតិកើនឡើងដូចគ្នា។

គួររំលឹកថា គិតត្រឹមឆមាសទី១ ឆ្នាំ២០២៤ ចំនួនប្រជាពលរដ្ឋដែលបានដាក់ប្រាក់សន្សំ (បញ្ញើ) ក្នុងប្រព័ន្ធធនាគារ និងគ្រឹះស្ថានមីក្រូហិរញ្ញវត្ថុមានសរុបចំនួនជាង ២៣លានគណនី ដែលស្មើនឹង​ទឹកប្រាក់ ៥៤ប៊ីលានដុល្លារអាមេរិក។ នេះបើតាមការថ្លែងរបស់ប្រធានសមាគមធនាគារនៅកម្ពុជា (ABC) និងប្រធានសមាគមមីក្រូហិរញ្ញវត្ថុកម្ពុជា (CMA)។​

ក្នុងរយៈពេលដូចគ្នានេះ ប្រាក់បញ្ញើអតិថិជន ក៏បានកើនឡើងគួរឱ្យកត់សម្គាល់ ជាមួយនឹងកំណើន​ជិត ១៣.៤% ឬប្រមាណជាង ៥១.៩ប៊ីលានដុល្លារអាមេរិក ដោយចំនួនគណនីប្រាក់​បញ្ញើអតិថិជន​បានកើនឡើងដល់ ២១.៣ លានគណនីនៅក្នុងវិស័យធនាគារ៕