សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ផ្ដើមចេញពីចំណង់ចំណូលចិត្តដាំដំណាំ បន្លែបង្កា តាំងពីនៅកុមារភាព លោក យន់ សុផាត ទទួលបានឱកាសទៅបន្តការសិក្សានៅប្រទេសអូស្ត្រាលី លើផ្នែកកសិកម្ម ជំនាញដំណាំតំបន់ត្រូពិក។
នៅក្នុងអំឡុងពេលនៃការសិក្សារនោះ លោកបានចាប់អារម្មណ៍ខ្លាំងទៅលើបរិស្ថានប្រទេសអូស្រ្តាលី ដែលតែងតែស្អាតជាប់ជានិច្ច ដោយសារតែចលនាកែច្នៃនៅក្នុងស្រុកមានការផុសផុលខ្លាំង។ មិនត្រឹមតែប៉ុណ្ណោះ ប្រជាជនហាក់យល់ច្បាស់ទៅលើការបែងចែកកាកសំណល់សម្រាប់កែច្នៃឡើងវិញ និងកាកសំណល់ដែលអាចយកទៅផលិតជាជីកំប៉ុសបាន។
ដោយមើលឃើញនូវគំរូដ៏ល្អនេះ លោក យន់ សុផាត បានបណ្ដុះគំនិតជាប់ខ្លួនថា ចង់ក្លាយជាចំណែកមួយដែលធ្វើឱ្យបរិស្ថានក្នុងប្រទេសកម្ពុជាស្រស់ស្អាត និងគ្មានកាកសំណល់។
បន្ទាប់ពីបានបញ្ចប់ការសិក្សាសព្វគ្រប់ លោកបានត្រឡប់មកកម្ពុជាវិញដោយបង្កើតអាជីវកម្មផលិតជីធម្មជាតិនៅក្នុងឆ្នាំ២០១៣ ជាមួយនឹងសមាជិកត្រឹមតែ៦នាក់ ដោយការផលិតភាគច្រើនគឺធ្វើដោយដៃ។ ពីមួយឆ្នាំទៅមួយឆ្នាំ លោកបានរៀនសូត្រច្រើនអំពីការគ្រប់គ្រងអាជីវកម្ម និងការផ្សព្វផ្សាយរហូតអាជីវកម្មនេះបានរីកធំធាត់ជាលំដាប់។
មានទីតាំងនៅក្នុងខេត្តកំពង់ស្ពឺ អាជីវកម្មផលិតជីធម្មជាតិ ហ៊ុយ យន់ ផ្ដោតសំខាន់ទៅលើការផលិតជី៣ប្រភេទគឺ ជីគ្រាប់ ជីទឹក និងម្សៅកំបោរកសិកម្ម។
បើតាមលោក យន់ សុផាត ដែលជាស្ថាបនិកក្រុមហ៊ុន ហ៊ុយ យន់ អាហ្គ្រីខលឈ័រ បានឱ្យដឹងថា៖
«វត្ថុធាតុដើមសំខាន់ៗសម្រាប់ការផលិតជីធម្មជាតិរបស់យើងគឺកាកសំណល់ផ្ទះបាយ និងលាមកសត្វ ដោយកាកសំណល់គឺយើងប្រមូលចេញពីផ្សារ។»
រហូតមកដល់បច្ចុប្បន្ននេះ លោកមានបុគ្គលិកប្រមាណជា ២០០នាក់ រីឯការផលិតភាគច្រើនធ្វើដោយម៉ាស៊ីន។
លោក យន់ សុផាត បានឱ្យដឹងទៀតថា៖
«ពីមុនមកប្រជាជនយើងនិយមប្រើជីនាំចូល ហើយមិនសូវគាំទ្រផលិតផលជីក្នុងស្រុកទេ តែបច្ចុប្បន្នការគាំទ្រមានភាពប្រសើរឡើងច្រើន ដោយមួយថ្ងៃយើងផលិតជីបានប្រមាណជា ៥តោន ដែលស្របទៅតាមតម្រូវការរបស់អតិថិជនជាក់ស្ដែង។»
បច្ចុប្បន្ននេះដែរ លោកកំពុងផ្គត់ផ្គង់ជីសរីរាង្គទៅកាន់ទីផ្សារនៅទូទាំងប្រទេសតែម្ដង ហើយលោកក៏មានគម្រោងពង្រីកផលិតកម្មបន្ថែមទៀត ដើម្បីបន្តគោលដៅធ្វើឱ្យបរិស្ថាននៅក្នុងស្រុកកាន់តែស្រស់ស្អាតជាងនេះថែមទៀត៕
Account
Security
Favourite Content